അഹമ്മദാബാദ്: ഐപിഎല്ലിൽ ഡൽഹി ക്യാപ്പിറ്റൽസിനെ ഏഴ് വിക്കറ്റുകൾക്ക് തകർത്ത് ഗുജറാത്ത് ടൈറ്റൻസ്. ഗുജറാത്തിന്റെ തട്ടകമായ അഹമ്മദാബാദ് നരേന്ദ്രമോദി സ്റ്റേഡിയത്തിൽ നടന്ന മത്സരത്തിൽ നഷ്ടപ്പെട്ട് ആദ്യം ബാറ്റ് ചെയ്ത ഡൽഹി ക്യാപ്പിറ്റൽസ് 20 ഓവറിൽ എട്ട് വിക്കറ്റ് നഷ്ടത്തിൽ 203 റൺസ് ആണ് നേടിയത്. വിജയലക്ഷ്യം പിന്തുടർന്നിറങ്ങിയ ഗുജറാത്ത് നാല് പന്തുകളും ഏഴ് വിക്കറ്റുകളും ബാക്കിനിൽക്കെ ലക്ഷ്യം മറികടക്കുകയായിരുന്നു. 

ഈ വിജയത്തിന് മറ്റൊരു പ്രത്യേകത കൂടിയുണ്ട്. ഐപിഎല്ലിൽ ഡൽഹിക്കെതിരെ 200+ റൺസ് ചെയ്സ് ചെയ്ത് വിജയിക്കുന്ന ആദ്യ ടീമായാണ് ഗുജറാത്ത് മാറിയത്. ഇതിനു മുമ്പ് ഐപിഎല്ലിൽ മറ്റൊരു ടീമിനും ഡൽഹിക്കെതിരെ 200 റൺസ് പിന്തുടർന്ന് വിജയിക്കാൻ സാധിച്ചിട്ടില്ല. 

ജോസ് ബട്ലർ തകർപ്പൻ ഇന്നിങ്സിന്റെ കരുത്തിലാണ് ഗുജറാത്ത് വിജയം സ്വന്തമാക്കിയത്. 54 പന്തിൽ പുറത്താവാതെ 97 റൺസാണ് താരം നേടിയത്. 11 ഫോറുകളും നാല് സിക്സുകളും ആണ് താരം നേടിയത്. 34 പന്തിൽ 43 റൺസ് നേടി ഷെർഫാനെ റൂഥർഫോഡും 21 പന്തിൽ 36 റൺസും നേടി സായ്‌ സുദർശനും ഗുജറാത്തിന്റെ വിജയത്തിൽ നിർണായകമായി. 

നേരത്തെ ആദ്യം ബാറ്റ് ചെയ്ത ഡെൽഹിക്കായി ക്യാപ്റ്റൻ അക്സർ പട്ടേൽ 39 റൺസും അശുതോഷ് ശർമ 37 റൺസും  ട്രിസ്റ്റൻ സ്റ്റംപ്സ്, കരുൺ നായർ എന്നിവർ 31 റൺസും നേടി മികച്ചു നിന്നു. കെഎൽ രാഹുൽ 14 പന്തിൽ 28 റൺസും നേടി മികച്ച പ്രകടനം നടത്തി. 

ഗുജറാത്തിന്റെ ബൗളിങ് നിരയിൽ നാല് വിക്കറ്റുകൾ നേടി പ്രസിദ് കൃഷ്ണ മികച്ച പ്രകടനമാണ് നടത്തിയത്. മുഹമ്മദ് സിറാജ്, അർഷാദ് ഖാൻ, ഇശാന്ത് ശർമ, സായ് കിഷോർ എന്നിവർ ഓരോ വിക്കറ്റുകളും സ്വന്തമാക്കി.

വിജയത്തോടെ ഒന്നാം സ്ഥാനത്തെത്താനും ഗില്ലിനും സംഘത്തിനും സാധിച്ചു. ഏഴ് മത്സരങ്ങളിൽ നിന്നും അഞ്ചു ജയവും രണ്ട് തോൽവിയും അടക്കം 10 പോയിന്റാണ് ഗുജറാത്തിനുള്ളത്. ഇത്ര തന്നെ പോയിന്റുള്ള ഡൽഹി രണ്ടാം സ്ഥാനത്തുമാണ്. 

Gujarat Titans beat Delhi Capitals in IPL 2025