ദുബായ്: ഈ വര്‍ഷത്തെ ഹജ്ജ് സീസണിന്റെ ഭാഗമായി ഈ മാസം 23 മുതലാണ് സഊദി അറേബ്യ വാര്‍ഷിക ഹജ്ജ് പ്രവേശന ചട്ടങ്ങള്‍ നടപ്പിലാക്കി തുടങ്ങുന്നത്. വിശുദ്ധ നഗരമായ മക്കയില്‍ പ്രവേശിക്കാന്‍ ആഗ്രഹിക്കുന്ന എല്ലാ പ്രവാസികളും സന്ദര്‍ശകരും ഔദ്യോഗിക പ്രവേശന അനുമതി നേടിയിരിക്കണമെന്നതുള്‍പ്പെടെയുള്ള മാര്‍ഗനിര്‍ദേശങ്ങള്‍ പബ്ലിക് സെക്യൂരിറ്റി ഡയറക്ടറേറ്റ് പ്രഖ്യാപിച്ചു. വാര്‍ഷിക ഹജ്ജ് തീര്‍ത്ഥാടനത്തിന്റെ സുരക്ഷയും സംഘാടനവും ഉറപ്പാക്കുന്നതിന്റെ ഭാഗമാണ് ഈ നിര്‍ദ്ദേശം. ഇവ സഊദി പൗരന്മാര്‍ക്കും പ്രവാസികള്‍ക്കും ഒരുപോലെ ബാധകമാണ്.

മക്കയിലേക്ക് കടക്കാന്‍ പെര്‍മിറ്റ്

ഏപ്രില്‍ 29 മുതല്‍ ഹജ്ജ് പെര്‍മിറ്റുകളില്ലാതെ മക്കയിലേക്കുള്ള പ്രവേശനത്തിന് വിലക്കുണ്ട്. സൗദി പൗരന്മാര്‍ക്കും താമസക്കാര്‍ക്കും ഇനി ഹജ്ജ് പെര്‍മിറ്റ് ഉണ്ടെങ്കില്‍ മാത്രമെ മക്കയിലേക്ക് പ്രവേശിക്കാന്‍ കഴിയൂ. സാധുവായ രേഖകള്‍ ഇല്ലാത്തവരെ നഗരത്തിന് ചുറ്റുമുള്ള സുരക്ഷാ ചെക്ക്‌പോസ്റ്റുകളില്‍ നിന്ന് തിരിച്ചയക്കും. ഉംറ, വിസിറ്റ് വിസ, ടൂറിസ്റ്റ് വിസകള്‍ എന്നിവ ഹജ്ജ് കര്‍മ്മങ്ങളില്‍ പങ്കെടുക്കാനുള്ള അനുമതിയല്ല.
ദശലക്ഷക്കണക്കിന് തീര്‍ത്ഥാടകരുടെ വരവിനായി രാജ്യം തയ്യാറെടുക്കുമ്പോള്‍ പ്രവേശനം സുഗമമാക്കുന്നതിനും തിരക്ക് തടയുന്നതിനും സുരക്ഷ വര്‍ദ്ധിപ്പിക്കുന്നതിനുമാണ് ഈ നയം രൂപകല്‍പ്പന ചെയ്തിരിക്കുന്നത്.

മക്കയില്‍ പ്രവേശിക്കാന്‍ ഇതില്‍ ഒരു രേഖ നിര്‍ബന്ധം

• 1 മക്കയില്‍ ജോലി ചെയ്യുന്നതിന് ബന്ധപ്പെട്ട അധികൃതര്‍ അംഗീകരിച്ച സാധുവായ പെര്‍മിറ്റ്
• 2 മക്കയില്‍ രജിസ്റ്റര്‍ ചെയ്ത താമസ രേഖ
• 3 ഔദ്യോഗിക ഹജ്ജ് പെര്‍മിറ്റ്

എന്‍ട്രി പെര്‍മിറ്റിന് എങ്ങനെ അപേക്ഷിക്കാം

ഏകീകൃത പെര്‍മിറ്റ് സംവിധാനമായ തസ്രീഹുമായി (Tasreeh) ഏകോപിപ്പിച്ച് ആഭ്യന്തര മന്ത്രാലയത്തിന്റെ ഡിജിറ്റല്‍ പ്ലാറ്റ്‌ഫോമുകളായ അബ്ഷര്‍ (Absher Individuals), മുഖീം (Muqeem) എന്നിവ വഴി ഇലക്ട്രോണിക് രീതിയില്‍ എന്‍ട്രി പെര്‍മിറ്റ് നേടാവുന്നതാണ്. ഹജ്ജ് സീസണില്‍ ജോലി ചെയ്യുന്ന പ്രവാസികള്‍ക്ക് പാസ്‌പോര്‍ട്ട് ഓഫീസുകളോ മറ്റ് കേന്ദ്രങ്ങളോ സന്ദര്‍ശിക്കാതെ തന്നെ ഈ പോര്‍ട്ടലുകള്‍ വഴി അപേക്ഷിക്കാം.

എല്ലാ തീര്‍ത്ഥാടകരും തസ്രീഹ് സംവിധാനവുമായി യുമായി ബന്ധിപ്പിച്ചിരിക്കുന്ന ഔദ്യോഗിക 'നുസുക്' പ്ലാറ്റ്‌ഫോം വഴി മാത്രമേ ഹജ്ജ് പെര്‍മിറ്റുകള്‍ നേടാവൂവെന്ന് ഹജ്ജ്, ഉംറ മന്ത്രാലയം അറിയിച്ചു.

വ്യാജ ഹജ്ജ് വിസക്കെതിരേ മുന്നറിയിപ്പ്

ലൈസന്‍സില്ലാത്ത താമസസൗകര്യമോ ഗതാഗതമോ വാഗ്ദാനം ചെയ്യുന്ന സോഷ്യല്‍ മീഡിയയില്‍ പ്രചരിക്കുന്ന വ്യാജ ഹജ്ജ് കാമ്പെയ്‌നുകള്‍ക്കെതിരെ അധികാരികള്‍ മുന്നറിയിപ്പ് നല്‍കി. അടിയന്തര ഹോട്ട്‌ലൈനുകള്‍ വഴിയോ പ്രാദേശിക അധികാരികളെയോ അത്തരം ലംഘനങ്ങള്‍ റിപ്പോര്‍ട്ട് ചെയ്യാന്‍ പൗരന്മാരോടും പ്രവാസികളോടും അധികൃതര്‍ അഭ്യര്‍ത്ഥിച്ചു.

പെര്‍മിറ്റുകള്‍ക്ക് തസ്രീഹ് പ്ലാറ്റ്‌ഫോം

സൗദി ഡാറ്റ ആന്‍ഡ് ആര്‍ട്ടിഫിഷ്യല്‍ ഇന്റലിജന്‍സ് അതോറിറ്റി (എസ്ഡിഎഎഎ) യുമായി സഹകരിച്ച് ആഭ്യന്തര മന്ത്രാലയം അടുത്തിടെയാണ് തസ്രീഹ് പ്ലാറ്റ്‌ഫോം ആരംഭിച്ചത്.

മക്കയിലേക്കും മറ്റ് പുണ്യസ്ഥലങ്ങളിലേക്കും പ്രവേശിക്കുന്ന തീര്‍ത്ഥാടകര്‍, തൊഴിലാളികള്‍, സന്നദ്ധപ്രവര്‍ത്തകര്‍, അംഗീകൃത വാഹനങ്ങള്‍ എന്നിവയ്ക്ക് ഈ കേന്ദ്രീകൃത സംവിധാനം ആണ് പെര്‍മിറ്റ് നല്‍കുന്നത്. പെര്‍മിറ്റ് ഉടമകള്‍ക്ക് 'തവക്കല്‍നാ' ആപ്പ് (Tawakkalna app) വഴി അവരുടെ അനുമതികള്‍ ആക്‌സസ് ചെയ്യാന്‍ കഴിയും.

ഉംറ വിസ സമയപരിധി

ഹജ്ജ് സീസണിന് മുന്നോടിയായി നിലവില്‍ രാജ്യത്തുള്ള ഉംറ വിസയില്‍ എത്തിയവര്‍ ഏപ്രില്‍ 29ന് മുമ്പായി രാജ്യം വിടേണ്ടതാണ്. അതിന് ശേഷം രാജ്യത്ത് ഉംറ വിസയിലെത്തി തങ്ങുന്നവര്‍ കടുത്ത നടപടി നേരിടേണ്ടിവരും. ഈ തീയതിക്ക് ശേഷം ഇവിടെ താമസിക്കുന്ന ഉംറ തീര്‍ത്ഥാടകര്‍ നാടുകടത്തല്‍, തടവ്, കനത്ത പിഴ എന്നിവ നേരിടേണ്ടിവരുമെന്ന് അധികൃതര്‍ മുന്നറിയിപ്പ് നല്‍കിയിട്ടുണ്ട്. 

New Hajj regulations explained a complete guide to entry rules, permits, and penalties