ന്യൂഡൽഹി: ഡൽഹിയിലെ മുസ്തഫാബാദിൽ ശക്തി വിഹാർ പ്രദേശത്ത് ശക്തമായ മഴയ്ക്കും ഇടിമിന്നലിനും പിന്നാലെ നാലുനില കെട്ടിടം തകർന്നുവീണ് മരിച്ചവരുടെ എണ്ണം 11 ആയി. ശനിയാഴ്ച പുലർച്ചെ മൂന്ന് മണിയോടെയാണ്  ദുരന്തമുണ്ടായത്. മരിച്ചവരിൽ എട്ട് പേർ ഒരേ കുടുംബത്തിലെ അംഗങ്ങളാണ്. കെട്ടിടത്തിൽ ഏകദേശം 20 പേർ താമസിച്ചിരുന്നതായാണ് റിപ്പോർട്ട്. ദേശീയ ദുരന്തനിവാരണ സേന (എൻഡിആർഎഫ്), ഡൽഹി ഫയർ സർവീസ്, ഡൽഹി പോലീസ് എന്നിവരുടെ നേതൃത്വത്തിലാണ് രക്ഷാപ്രവർത്തനം നടക്കുന്നത്. 

കെട്ടിടത്തിന്റെ രണ്ടാം നിലയിൽ താമസിച്ചിരുന്ന ചന്ദിന്റെ കുടുംബമാണ് ദുരന്തത്തിൽപ്പെട്ടത്. ഇദ്ദേഹത്തിന്റെ പിതാവിന്റെ പേരിലാണ് തകർന്ന കെട്ടിടം. വെള്ളിയാഴ്ച രാത്രി ഡൽഹിയുടെ വിവിധ ഭാഗങ്ങളിൽ കനത്ത മഴയും ഇടിമിന്നലും ഉണ്ടായിരുന്നു.

കെട്ടിടത്തിന് ഏകദേശം 20 വർഷം പഴക്കമുണ്ടെന്നും അനധികൃത നിർമ്മാണമാണെന്നും ഡൽഹി മുനിസിപ്പൽ കോർപ്പറേഷൻ (എംസിഡി) വ്യക്തമാക്കി. സുരക്ഷാ അനുമതികളെക്കുറിച്ച് ചോദ്യങ്ങൾ ഉയർന്നതിനെ തുടർന്ന് മുഖ്യമന്ത്രി രേഖ ഗുപ്ത സംഭവത്തിൽ അന്വേഷണത്തിന് ഉത്തരവിട്ടു. “ഈ വീടുകൾ ഒഴിപ്പിക്കാത്ത എംസിഡി ഉദ്യോഗസ്ഥർക്കെതിരെ കർശന നടപടി സ്വീകരിക്കും,” സ്ഥലം സന്ദർശിച്ച ശേഷം ഡൽഹി മന്ത്രി കപിൽ മിശ്ര പറഞ്ഞു. രാഷ്ട്രപതി ദ്രൗപതി മുർമുവും പ്രധാനമന്ത്രി നരേന്ദ്ര മോദിയും മരണങ്ങളിൽ അനുശോചനം രേഖപ്പെടുത്തി. ദുരന്തത്തിന്റെ കാരണവും ഉത്തരവാദിത്തവും കണ്ടെത്താൻ അന്വേഷണം തുടരുകയാണ്.