ആലപ്പുഴ: ഓൺലൈൻ ജോബ് ടാസ്കിന്റെ പേരിൽ ആലപ്പുഴയിലെ തഴക്കര സ്വദേശിയുടെ 25,000 രൂപ തട്ടിയ കേസിലെ പ്രതി അറസ്റ്റിൽ. മഹാരാഷ്ട്ര താനെ സ്വദേശി ആദിൽ അക്രം ഷെയ്ഖ് (30) എന്നയാളെ ആലപ്പുഴ സൈബർ ക്രൈം പൊലീസ് മഹാരാഷ്ട്രയിലെ ഡോംഗ്രിയിൽ നിന്ന് പിടികൂടുകയായിരുന്നു.

ഓൺലൈൻ മാർക്കറ്റിംഗ് കമ്പനിയുടെ പ്രതിനിധിയാണെന്ന് പറ‍ഞ്ഞ് ആൾമാറാട്ടം നടത്തിയാണ് ഇയാൾ തട്ടിപ്പിനൊരുങ്ങിയത്. വാട്സാപ്പ് വഴിയാണ് ഇയാൾ പരാതിക്കാരനെ ബന്ധപ്പെടുന്നത്. ആദ്യം "ഗൂഗിൾ മാപ്പ് റേറ്റിംഗ് ടാസ്ക്" എന്ന പേരിൽ ഹോട്ടലുകൾക്ക് റേറ്റിങ് ചെയ്യാനുള്ള ലിങ്ക് അയച്ചുകൊടുത്ത് ഓരോ റേറ്റിംഗിനും ചെറിയ പ്രതിഫലം നൽകിയാണ് വിശ്വാസം നേടിയെടുത്തത്.

തുടർന്നാണ് "ഇൻവെസ്റ്റ്മെന്റ് ടാസ്ക്" എന്ന പേരിൽ വലിയ തുകയുടെ ഇടപാടുകളിലേക്ക് യുവാവിനെ തള്ളിയത്. വിവിധ വ്യാജ വാഗ്ദാനങ്ങൾ നൽകി, പരാതിക്കാരനോട് രണ്ട് തവണയായി മൊത്തം 25,000 രൂപ പ്രതികളുടെ ബാങ്ക് അക്കൗണ്ടിലേക്ക് അയപ്പിക്കുകയായിരുന്നു.

തട്ടിപ്പിലൂടെ പണം സ്വീകരിച്ച അക്കൗണ്ടിന്റെ ഉടമയാണ് പിടിയിലായ ആദിൽ അക്രം. ഇതേ കേസിൽ നേരത്തെ ഡൽഹി ഉത്തംനഗർ സ്വദേശി ആകാശ് ശ്രീവാസ്തവ (28)യെ ഡൽഹിയിലെ ബുദ്ധവിഹാർ എന്ന സ്ഥലത്ത് നിന്ന് അറസ്റ്റ് ചെയ്തിരുന്നു.

ആലപ്പുഴ ചീഫ് ജുഡീഷ്യൽ മജിസ്‌ട്രേറ്റ് കോടതിയുടെ നിർദേശപ്രകാരം പ്രതിക്ക് സമൻസ് അയച്ചിരുന്നുവെങ്കിലും ഹാജരാകാത്തതിനെ തുടർന്ന് അറസ്റ്റ് വാറന്റാണ് പുറപ്പെടുവിച്ചത്. തുടർന്ന് മഹാരാഷ്ട്രയിലെ താനെയിൽ നടത്തിയ അന്വേഷണത്തിലാണ് പ്രതിയെ കണ്ടെത്തി അറസ്റ്റ് ചെയ്തത്. പ്രതിയെ ആലപ്പുഴ കോടതിയിൽ ഹാജരാക്കി റിമാൻഡ് ചെയ്തു.

Alappuzha Cyber Crime Police arrested Adil Akram Shaikh (30) from Thane, Maharashtra, for allegedly cheating a Thazhakkara native of ₹25,000 through a fake online job task scam. The accused initially gained the victim’s trust by paying small rewards for rating hotels via Google Maps. Later, he manipulated the victim into sending money under the guise of investment tasks. He was arrested after failing to appear in court despite a summons.