കൊച്ചി: നടന്‍ ഷൈന്‍ ടോം ചാക്കോയ്ക്കെതിരെ നടി വിന്‍സി അലോഷ്യസ് നല്‍കിയ പരാതി ഒത്തുതീര്‍പ്പിലേക്കെന്ന് സൂചന. തനിക്ക് ഉണ്ടായ ബുദ്ധിമുട്ടിനെ കുറിച്ചാണ് താന്‍ പറഞ്ഞതെന്നും പരാതിയില്ലെന്നും വിന്‍സി ഐ.സി.സിയെ അറിയിച്ചതായാണ് വിവരം. വിഷയത്തില്‍ ഷൈന്‍ ടോം ചാക്കോ ഖേദം പ്രകടിപ്പിക്കുകയും ചെയ്തിട്ടുണ്ട്. ഇരുവരും കൂടിക്കാഴ്ച നടത്തിയെന്നും ശേഷം കൈകൊടുത്ത് പിരിഞ്ഞെന്നും റിപ്പോര്‍ട്ടുകള്‍ പറയുന്നു. ഐ.സി.സി റിപ്പോര്‍ട്ട് ഉടന്‍ കൈമാറും.

അതിനിടെ, ഷൈന്‍ ടോം ചാക്കോ പ്രതിയായ ലഹരി കേസില്‍ പൊലിസിന്റെ തുടര്‍നടപടികളുണ്ടാവും. അതേസമയം, തെളിവുകള്‍ ഇല്ലാത്തതിനാല്‍ ഷൈനെ വീണ്ടും ചോദ്യം ചെയ്യുന്നതില്‍ കാര്യമില്ലെന്നാണ് പൊലിസ് പറയുന്നത്. 

അതിനാല്‍ തുടര്‍നടപടികള്‍ നീണ്ടേക്കുമെന്നാണ് സൂചന. ലഹരി പരിശോധനാ ഫലം വരാന്‍ രണ്ടുമാസം കഴിയുമെന്നാണ് റിപ്പോര്‍ട്ട്. കസ്റ്റഡിയിലെടുത്ത ഫോണുകളുടെ ഫോറെന്‍സിക് പരിശോധന ഫലവും വൈകും. എപ്പോള്‍ വിളിച്ചാലും ഹാജരാകാമെന്ന് ഷൈന്‍ അറിയിച്ചതിനാല്‍ തിടുക്കം കാണിക്കേണ്ട എന്ന നിലപാടിലാണ് ഇപ്പോള്‍ പൊലിസ്. 

അതിനിടെ, ഫിലിം ചേംബറിന്റെ നേതൃത്വത്തിലുള്ള മോണിറ്ററിംഗ് കമ്മിറ്റിയുടെയും യോഗം ഇന്നലെ കൊച്ചിയില്‍ ചേര്‍ന്നിരുന്നു. ഐ.സിസിയുടെ അന്തിമ റിപ്പോര്‍ട്ടിന് ശേഷമാകും ഫിലിം ചേംബറിന്റെ തുടര്‍നടപടികളുണ്ടാവുക. കൂടാതെ, താര സംഘടന അമ്മ നിയോഗിച്ച മൂന്നംഗ സമിതിയുടെ അന്വേഷണവും തുടരുകയാണ്.

Actor Shine Tom Chacko and actress Vinci Aloysius reportedly settle their recent dispute amicably. While the ICC report is awaited, police continue their investigation into Shine Tom's drug case, with forensic results still pending.