ശ്രീനഗർ:  ജമ്മു കശ്മീരിലെ പഹൽഗാമിൽ വിനോദസഞ്ചാരികൾക്ക് നേരെ നടന്ന ഭീകരാക്രമണത്തിൽ അപലപിച്ച് ഇന്ത്യൻ ക്രിക്കറ്റ് താരം വിരാട് കോഹ്‌ലി. ഇരകളുടെ കുടുംബങ്ങൾക്ക് അനുശോചനം രേഖപ്പെടുത്തുകയും ഈ ക്രൂരത ചെയ്തവർക്ക് ശിക്ഷ നൽകണമെന്നും കോഹ്‌ലി തന്റെ സോഷ്യൽ മീഡിയ അക്കൗണ്ടിലൂടെ അറിയിക്കുകയായിരുന്നു. 

''ഹൽഗാമിൽ നിരപരാധികളായ ആളുകൾക്ക് നേരെയുണ്ടായ ഈ ഹീനമായ അക്രമത്തിൽ അഗാധമായ ദുഃഖം രേഖപ്പെടുത്തുന്നു. ഇരകളുടെ കുടുംബത്തിന് ഹൃദയത്തിൽ നിന്നും അനുശോചനം അറിയിക്കുന്നു. ജീവൻ നഷ്ടപ്പെട്ട എല്ലാവരുടെയും കുടുംബങ്ങൾക്ക് സമാധാനവും ശക്തിയും ലഭിക്കുവാനും ഈ ക്രൂരമായ പ്രവൃത്തിക്ക് നീതി ലഭിക്കാനും പ്രാർത്ഥിക്കുന്നു'' കോഹ്‌ലി സോഷ്യൽ മീഡിയയിൽ അനുശോചനം രേഖപ്പെടുത്തി.

 

ഭീകരാക്രമണത്തിൽ കൊല്ലപ്പെട്ടവർക്കായി ബിസിസിഐയും ഐക്യദാർഢ്യം നൽകും. ഭീകരാക്രമണത്തിൽ കൊല്ലപ്പെട്ടവർക്കായുള്ള ആദരസൂചകമായി ഇന്ന് ഐപിഎല്ലിൽ നടക്കുന്ന മുംബൈ ഇന്ത്യൻസ്-സൺറൈസേഴ്‌സ് ഹൈദരാബാദ് മത്സരത്തിൽ ഇരു ടീമുകളിലെയും താരങ്ങളും അമ്പയർമാരും കറുത്ത ആം ബാൻഡ് ധരിച്ചായിരിക്കും കളത്തിൽ ഇറങ്ങുക. മത്സരം തുടങ്ങുന്നതിന് മുന്നോടിയായി ഒരു മിനിറ്റ് മൗനമാചരിക്കുകയും ചെയ്യും. ഇതിനു പുറമെ മത്സരത്തിനിടെയുള്ള വെടിക്കെട്ട്, ചിയർലീഡർമാർ പ്രകടനം എന്നിവയും ഉണ്ടാവില്ല. 

കഴിഞ്ഞദിവസമാണ് രാജ്യത്തെ ഞെട്ടിച്ച ജമ്മു കശ്മീരിലെ ഭീകരാക്രമണം നടന്നത്. അക്രമത്തിൽ 27ലധികം നിരപരാധികളായ വിനോദസഞ്ചാരികൾ ആണ് കൊല്ലപ്പെട്ടത്. ട്രക്കിങിനായി പോയവർക്ക് നേരെയാണ് ആക്രമണം നടന്നത്. 2019ന് ശേഷം ജമ്മു കശ്മീരിൽ നടക്കുന്ന ഏറ്റവും വലിയ ഭീകരാക്രമണമാണ് പഹൽഗാമിൽ നടന്നത്. അജ്ഞാതരായ തോക്കുധാരികൾ വിനോദസഞ്ചാരികൾക്ക് അടുത്ത് വന്ന് വെടിയുതിർക്കുകയായിരുന്നുവെന്ന് ദൃക്സാക്ഷികൾ പറഞ്ഞത്. 

Justice must be given to those killed in Pahalgam terror attack Kohli condemns