കൊച്ചി: സോഷ്യൽ മീഡിയയിൽ വനിതാ നടിക്കെതിരെ ലൈംഗിക ചുവയുള്ള പരാമർശം നടത്തിയ യൂട്യൂബർ 'ആറാട്ടണ്ണൻ' എന്നറിയപ്പെടുന്ന സന്തോഷ് വർക്കി അറസ്റ്റിൽ. എറണാകുളം ടൗൺ നോർത്ത് പൊലീസാണ് ഇയാളെ കസ്റ്റഡിയിലെടുത്തത്. ചലച്ചിത്ര താരം ഉഷ ഹസീനയുടെ പരാതിയിലാണ് കൊച്ചി സിറ്റി പൊലീസ് ജാമ്യമില്ലാ വകുപ്പുകൾ ചുമത്തി കേസെടുത്തത്.

സിനിമകളെക്കുറിച്ചുള്ള അതിരുകടന്ന അഭിപ്രായങ്ങൾക്ക് പേര് കേട്ട സന്തോഷ് വർക്കി, സോഷ്യൽ മീഡിയയിൽ സിനിമാ മേഖലയിലെ സ്ത്രീകളെ മോശം സ്വഭാവക്കാരാണെന്ന് ചിത്രീകരിച്ച് അപമാനകരമായ പരാമർശങ്ങൾ നടത്തിയതായി പരാതിയിൽ പറയുന്നു. ഉഷ ഹസീനയെ കൂടാതെ, ചലച്ചിത്ര പ്രവർത്തകരായ ഭാഗ്യലക്ഷ്മി, കുക്കു പരമേശ്വരൻ തുടങ്ങിയവരും സന്തോഷിനെതിരെ പരാതി നൽകിയിരുന്നു. ഇയാളുടെ തുടർച്ചയായ അശ്ലീല പരാമർശങ്ങൾ സ്ത്രീത്വത്തെ അപമാനിക്കുന്നതാണെന്ന് നടിമാർ ആരോപിച്ചു.

നേരത്തെയും സിനിമാ താരങ്ങൾക്കെതിരെ സമാനമായ പരാമർശങ്ങൾ നടത്തിയിട്ടുള്ള സന്തോഷ് വർക്കിക്കെതിരെ കർശന നടപടി വേണമെന്ന് പരാതിക്കാർ ആവശ്യപ്പെട്ടു. സ്ത്രീകളെ അപമാനിക്കുന്ന ഇത്തരം പ്രവൃത്തികൾക്കെതിരെ അധികൃതർ ശക്തമായ നിയമനടപടികൾ സ്വീകരിക്കണമെന്നും പരാതിയിൽ ചൂണ്ടിക്കാട്ടുന്നു.