തിരുവനന്തപുരം: സംസ്ഥാനത്തെ ഐടി പാര്‍ക്കുകളില്‍ മദ്യം വിളമ്പാന്‍ ഉത്തരവായി. ഐടി കമ്പനികളുടെ ഔദ്യോഗിക സന്ദര്‍ശകര്‍ക്കും, അതിഥികള്‍ക്കും മദ്യം വില്‍ക്കാമെന്നാണ് വ്യവസ്ഥ. പത്ത് ലക്ഷം രൂപ കെട്ടിവെച്ചാല്‍ വാര്‍ഷിക ലൈസന്‍സ് ലഭിക്കും. സര്‍ക്കാര്‍-സ്വകാര്യ സ്ഥാപനങ്ങള്‍ക്ക് ലൈസന്‍സിന് അപേക്ഷിക്കാമെന്നും വ്യവസ്ഥയുണ്ട്. പ്രതിപക്ഷ എതിര്‍പ്പ് അവഗണിച്ചാണ് സര്‍ക്കാര്‍ നടപടി. 

മദ്യം അനുവദിക്കുന്നതിന് ചില നിബന്ധനകളും സര്‍ക്കാര്‍ മുന്നോട്ട് വെച്ചിട്ടുണ്ട്. ഉച്ചക്ക് 12 മുതല്‍ രാത്രി 12 വരെയാണ് മദ്യശാലകള്‍ക്ക് പ്രവര്‍ത്തനാനുമതി ഉണ്ടായിരിക്കൂ. ഒരു സ്ഥാപനത്തിന് ഒരു ലൈസന്‍സ് മാത്രമേ അനുവദിക്കൂ. സ്ഥാപനത്തിലെ ഔദ്യോഗിക  ജീവനക്കാര്‍ക്കും, സന്ദര്‍ശകര്‍ക്കും മാത്രമേ മദ്യം ലഭിക്കൂ. പുറത്ത് നിന്നുള്ളവര്‍ക്ക് മദ്യം വിളമ്പാന്‍ പാടില്ലെന്നും കര്‍ശന നിര്‍ദേശമുണ്ട്. മദ്യശാലകള്‍ കമ്പനിയോട് ചേര്‍ന്ന് തന്നെ സ്ഥാപിക്കാമെങ്കിലും, ഓഫീസുകളുമായി ബന്ധമുണ്ടാവാന്‍ പാടില്ല. 

സര്‍ക്കാര്‍ നിശ്ചയിച്ച ദിവസങ്ങളിലും, ഒന്നാം തീയതിയും മദ്യം നല്‍കരുതെന്നും വ്യവസ്ഥയുണ്ട്. പാര്‍ക്കുകളിലെ മദ്യം വിളമ്പലില്‍ പരാതികള്‍ ഉണ്ടെങ്കില്‍ ഡെപ്യൂട്ടി എക്‌സൈസ് കമ്മീഷണര്‍ക്ക് തുല്യമായ തസ്തികയിലുള്ള ഉദ്യോഗസ്ഥന് നടപടിയെടുത്ത് പിഴയടയ്ക്കാമെന്നും നിര്‍ദേശമുണ്ട്.

​The Kerala government has allowed the sale of alcohol in specific areas within IT parks, but only for employees and official visitors.​