തിരുവനന്തപുരം: പ്രമുഖ കാറ്റാടിയന്ത്ര ടർബൈൻ നിർമാണ കമ്പനിയായ എസ്.ജി.ആർ.ഇയുടെ പേര് ദുരുപയോഗം ചെയ്ത് വൻ നിക്ഷേപത്തട്ടിപ്പ്. പൊതുജനങ്ങൾ ജാഗ്രത പാലിക്കണമെന്ന് പൊലീസ് മുന്നറിയിപ്പ് നൽകി.

വാട്‌സാപ് ഗ്രൂപ്പുകളിലേക്ക് ക്ഷണിക്കുന്ന സന്ദേശങ്ങളിലൂടെയാണ് തട്ടിപ്പിന്റെ തുടക്കം. സുഹൃത്തുക്കളോ കുടുംബാംഗങ്ങളോ അയക്കുന്നതായി തോന്നുന്ന സന്ദേശങ്ങളിലെ ലിങ്കിൽ ക്ലിക്ക് ചെയ്യാൻ പ്രേരിപ്പിക്കും. ലിങ്ക് വഴി വെബ്‌സൈറ്റിൽ രജിസ്റ്റർ ചെയ്യുന്നവരെ ഒരു വാട്‌സാപ് ഗ്രൂപ്പിൽ അംഗമാക്കും. തുടർന്ന്, കമ്പനിയുടേതെന്ന് അവകാശപ്പെടുന്ന വ്യാജ ആപ്പ് ഇൻസ്റ്റാൾ ചെയ്യാൻ ആവശ്യപ്പെടും.

ഈ ആപ്പ് വഴി കാറ്റാടിയന്ത്ര നിർമാണ കമ്പനിയിൽ നിക്ഷേപം നടത്തിയാൽ ഉയർന്ന ലാഭം ലഭിക്കുമെന്ന് വാഗ്ദാനം ചെയ്യും. തുടക്കത്തിൽ ചെറിയ തുകകൾ ലാഭവിഹിതമായി നൽകി വിശ്വാസം നേടും. കൂടുതൽ ആളുകളെ നിക്ഷേപകരായി ചേർക്കുന്നവർക്ക് അധിക ലാഭം വാഗ്ദാനം ചെയ്ത് മണിചെയിൻ മാതൃകയിൽ തട്ടിപ്പ് വ്യാപിപ്പിക്കുന്നു. എന്നാൽ, നിക്ഷേപകർ പണം തിരികെ ആവശ്യപ്പെടുമ്പോൾ വിവിധ കാരണങ്ങൾ പറഞ്ഞ് തുക നൽകാതിരിക്കും. ഇതോടെയാണ് തട്ടിപ്പിനിരയായ വിവരം നിക്ഷേപകർ തിരിച്ചറിയുന്നത്.

അജ്ഞാത ലിങ്കുകളിൽ ക്ലിക്ക് ചെയ്യരുതെന്നും അപരിചിത ആപ്പുകൾ ഇൻസ്റ്റാൾ ചെയ്യുന്നത് ഒഴിവാക്കണമെന്നും പൊലീസ് അറിയിച്ചു. തട്ടിപ്പിനിരയായവർ ഉടൻ പൊലീസിൽ പരാതിപ്പെടണമെന്നും അധികൃതർ വ്യക്തമാക്കി.