കൊച്ചി: എറണാകുളം പെരുമ്പാവൂര്‍ മുടിക്കലില്‍ ഒഴുക്കില്‍പ്പെട്ട് 19 വയസുള്ള യുവതി മരിച്ചു. പുളിക്ക കുടി ഷാജിയുടെ മകള്‍ ഫാത്തിമയാണ് മരിച്ചത്. പുഴയരികിലെ പാറയില്‍ നിന്ന് കാല്‍ വഴുതി വെള്ളത്തില്‍ വീഴുകയായിരുന്നു. ഇവര്‍ക്കൊപ്പമുണ്ടായിരുന്ന സഹോദരി ഫര്‍ഹത്തിനെ(15) രക്ഷപ്പെടുത്തി.

മുടിക്കലില്‍ രാവിലെ പുഴയരികില്‍ നടക്കാനിറങ്ങിയതായിരുന്നു സഹോദരിമാര്‍. മുടിക്കല്‍ ഡിപ്പോ കടവിലാണ് സംഭവം. രാവിലെ നടത്തം കഴിഞ്ഞ് പുഴയരികിലെ പാറയില്‍ നില്‍ക്കുമ്പോഴാണ് കാല്‍വഴുതി ഇവര്‍ വെള്ളത്തിലേക്ക് വീഴുന്നത്. സമീപത്ത് ചൂണ്ട ഇട്ടുകൊണ്ടിരുന്നയാള്‍ അപ്പോഴേക്കും വെള്ളത്തിലിറങ്ങി ഫര്‍ഹത്തിനെ രക്ഷപ്പെടുത്തി നാട്ടുകാരുടെ സഹായത്തോടെ ആശുപത്രിയില്‍ എത്തിക്കുകയായിരുന്നു. ഫാത്തിമ പെരുമ്പാവൂര്‍ മാര്‍ത്തോമ കോളജിലെയും ഫര്‍ഹത് മുടിക്കല്‍ മേരി സ്‌കൂളിലെയും വിദ്യാര്‍ഥികളാണ്.