ആഘോഷവേളകളില്‍ പലപ്പോഴും നമ്മുടെ ഫുഡിന്റെ കണ്‍ട്രോള്‍ തെറ്റാറുണ്ട്. ഇങ്ങനത്തെ സമയങ്ങളില്‍ ശരീരഭാരവും ആരോഗ്യവുമൊക്കെ എങ്ങനെയാണ് സംരക്ഷിക്കേണ്ടത്. പലരും ചിന്തിക്കുന്ന ഒരു കാര്യമാണിത്. പ്രത്യേകിച്ചും പ്രമേഹവും ഹൈപ്പര്‍ ടെന്‍ഷനും ഹൃദ്രോഗം തുടങ്ങിയ അസുഖങ്ങളുള്ളവര്‍ക്ക്. 

അങ്ങനെയുള്ളവര്‍ ഇക്കാര്യങ്ങള്‍ ശ്രദ്ധിച്ചാല്‍ നന്നായിരിക്കും. ആഘോഷവേളകളില്‍ ഇറക്കുന്ന മിഠായികളും മധുര പലഹാരങ്ങളുമൊക്കെ ഗുണനിലവാരമുളളതാണോ പഞ്ചസാരയ്ക്കു പകരമായി മറ്റു വല്ലതും ഉപയോഗിച്ചിട്ടുണ്ടോ നെയ്യ് ഗുണനിലവാരം ഉള്ളതാണോ ഇവയ്ക്കു പകരമായി വേറെന്തെങ്കിലും ഉപയോഗിച്ചിട്ടുണ്ടോ എന്നൊക്കെയുള്ള നിരവധി സംശയങ്ങള്‍  നമ്മുടെ മനസിലുണ്ടാവും.

അതിനായി വിശേഷാവസരത്തില്‍ ലഭിക്കുന്ന മിഠായികളും പലഹാരങ്ങളും കഴിയുന്നതും സ്വന്തമായി വീട്ടില്‍ തന്നെ ഉണ്ടാക്കി നോക്കാന്‍ ശ്രമിക്കുക. ലഡു, ബര്‍ഫി മറ്റു മധുരപലഹാരങ്ങള്‍ എന്നിവ ഓര്‍ക്കുമ്പോള്‍ തന്നെ വായില്‍ വെള്ളമൂറും. അതിനായി ഇവ വീട്ടില്‍ തന്നെ വളരെ എളുപ്പത്തില്‍ ഉണ്ടാക്കിയെടുക്കാവുന്നതാണ്.

റാഗി പൊടി, ചോളപ്പൊടി, കടലമാവ് ഇവയൊക്കെയാണ് ഇതിനു വേണ്ടത്. ഇവയിലാണെങ്കില്‍ ധാരാളം ഫൈബറുമുണ്ട്. ശര്‍ക്കരയും നാടന്‍ നെയ്യുമാണെങ്കില്‍ ഇവയില്‍ കലോറിയും വളരെ കുറവാണ്. 

പഞ്ചസാരയ്ക്കു പകരമായി കടകളില്‍ സിന്തറ്റിക് സ്വീറ്റ്‌നേഴ്‌സ് ഉപയോഗിക്കാറുണ്ട്. അതുകൊണ്ട് തന്നെ അമിതമായി ഇവ കഴിച്ചാല്‍ പാര്‍ശ്വഫലങ്ങളും ഉണ്ടാവും.
മിഠായി, പായസം, കസ്റ്റാര്‍ഡ് എന്നിവ തയാറാക്കാന്‍ ടോണ്‍ഡ് മില്‍ക്കും ഉപയോഗിക്കാറുണ്ട്. പാലിന് പകരം സോയാമില്‍ക്ക് ഉപയോഗിക്കുന്നത് നല്ലതാണ്. ഇതില്‍ ധാരാളം പ്രോട്ടീനും ഫൈബറും അടങ്ങിയിട്ടുണ്ട് മാത്രമല്ല കലോറിയും കുറവായിരിക്കും.

പുഡിങ് തയാറാക്കാനാണെങ്കില്‍ പഞ്ചസാരയ്ക്കു പകരം മധുരമുള്ള പഴങ്ങളുടെ ജ്യൂസ് അല്ലെങ്കില്‍ ഈന്തപ്പഴമോ അത്തിപ്പഴമോ കിസ്മിസോ അരച്ചു ചേര്‍ക്കാവുന്നതാണ്. ചുരുക്കിപ്പറഞ്ഞാല്‍ മധുരം ഉപയോഗിക്കുന്നതില്‍ കുറച്ച് നിയന്ത്രണം വേണമെന്ന്.

മധുര പലഹാരമോ മിഠായിയോ കഴിക്കണമെന്നു തോന്നുമ്പോള്‍ പഴങ്ങള്‍ കഴിക്കാം. സാലഡ് കഴിക്കാം. വീട്ടില്‍ വരുന്നവര്‍ക്ക് പഴങ്ങള്‍ നല്‍കി സല്‍കരിക്കുകയുമാവാം. ഗ്രീന്‍ ടീയും കരിക്കിന്‍ വെള്ളവും കുടിക്കാവുന്നതാണ്. ഇതിനു പുറമേ നന്നാറി സര്‍ബത്തില്‍ കസ് കസ് ചേര്‍ത്ത് മധുരത്തിനു കുറച്ചു തേനും ഒഴിച്ചു കുടിക്കാവുന്നതാണ്. 

 ബ്രേക്ക് ഫാസ്റ്റോ ഉച്ചഭക്ഷണമോ എന്തായാലും ശരി എണ്ണയില്‍ വറുത്തെടുത്ത ഭക്ഷ്യവസ്തുക്കള്‍ ഒഴിവാക്കുന്നതാണ് നല്ലത്. പകരം സ്റ്റഫ് ചെയ്ത ചപ്പാത്തി റവ ഇഡ്ഡലി ദോശ എന്നിവയും കഴിക്കാവുന്നതാണ്.