ചില നേരത്തെങ്കിലും 500 രൂപയ്ക്ക് ചില്ലറ ലഭിക്കാനായി ഓടിനടക്കാറുണ്ട്. എന്നാലിനി അതിന്റെ ആവശ്യം വരില്ല. ഇനി എടിഎമ്മില്‍ നിന്നും 100,200 രൂപ നോട്ടുകള്‍ ലഭിക്കും. ബാങ്കുകളില്‍ ചെറിയ തുകയുടെ നോട്ടുകള്‍ ലഭിക്കുന്നില്ലെന്ന പരാതിയില്‍ ഇടപെട്ട് റിസര്‍വ് ബാങ്ക് ഓഫ് ഇന്ത്യ. 100, 200 രൂപ നോട്ടുകളുടെ ലഭ്യത ഉറപ്പുവരുത്തണമെന്ന് ആര്‍.ബി.ഐ ബാങ്കുകളോടും വൈറ്റ് ലേബല്‍ എ.ടി.എം ഓപ്പറേറ്റര്‍മാരോടും നിര്‍ദേശിച്ചിട്ടുണ്ട്.

ചെറിയ തുകയുടെ നോട്ടുകള്‍ എ.ടി.എം വഴി ലഭ്യമല്ലാത്തത് സാധാരണക്കാരില്‍ സാമ്പത്തിക ക്രയവിക്രയങ്ങള്‍ കുറയാന്‍ ഇടയാക്കുമെന്ന് ധനകാര്യ വിദഗ്ധര്‍ മുന്നറിയിപ്പ് നല്കിയിരുന്നു. ഇതോടെയാണ് റിസര്‍വ് ബാങ്ക് വിഷയത്തില്‍ ഇടപെട്ടത്. കൃത്യമായ ഇടവേളയില്‍ ചെറിയ തുകകളുടെ നോട്ടുകള്‍ എ.ടി.എമ്മില്‍ നിറയ്ക്കണമെന്നാണ് നിര്‍ദേശം.

അതേസമയം മെയ് 1 മുതല്‍ എടിഎം വഴിയുള്ള ട്രാന്‍സാക്ഷന്‍ നിരക്ക് കൂട്ടി. സൗജന്യ സേവനങ്ങള്‍ക്ക് ശേഷം നടത്തുന്ന ഇടപാടുകള്‍ക്കുള്ള ചാര്‍ജാണ് ആര്‍.ബി.ഐ വര്‍ധിപ്പിച്ചത്. ഇതോടെ രണ്ട് രൂപയുടെ വര്‍ധനവാണ് ഉണ്ടാവുക. അതായത് എ.ടി.എമ്മില്‍ നിന്ന് സൗജന്യ ഇടപാടുകള്‍ക്ക് ശേഷം പണം പിന്‍വലിക്കണമെങ്കില്‍ 23 രൂപ നല്‍കണം.

അതേസമയം സൗജന്യ എ.ടി.എം ഇടപാടുകളുടെ എണ്ണം ഗ്രാമനഗരങ്ങള്‍ക്കനുസരിച്ച് വ്യത്യാസമുണ്ടാകും. ഗ്രാമീണ മേഖലകളില്‍ മറ്റ് ബാങ്കുകളുടെ എ.ടി.എമ്മുകളില്‍ അഞ്ച് ഇടപാടുകള്‍ സൗജന്യമാണെങ്കില്‍ നഗരമേഖലകളില്‍ മൂന്ന് ഇടപാടുകള്‍ മാത്രമേ ഇത്തരത്തില്‍ സൗജന്യമായി ലഭിക്കുകയുള്ളു.

എടിഎം കൗണ്ടറുകളുടെ നടത്തിപ്പിനും സെക്യൂരിറ്റി സംവിധാനങ്ങള്‍ നടപ്പാക്കുന്നതിനും വലിയ ചെലവ് വരുന്നുണ്ടെന്ന ബാങ്കുകളുടെ അഭ്യര്‍ഥന മാനിച്ചാണ് ആര്‍ബിഐ നിരക്ക് വര്‍ധനയ്ക്ക് അനുകൂലമായ നിലപാട് സ്വീകരിച്ചത്.

വിവിധ ബാങ്കുകള്‍ ചാര്‍ജ് മാറുന്നത് സംബന്ധിച്ച് ഉത്തരവും പുറത്തിറക്കിയിട്ടുണ്ട്. ചാര്‍ജില്‍ രണ്ട് രൂപയുടെ വര്‍ധനയുണ്ടാകുമെന്നാണ് എച്ച്.ഡി.എഫ്.സി ബാങ്ക് അറിയിച്ചത്. പി.എന്‍.ബി ബാങ്ക് ഫിനാന്‍ഷ്യല്‍ ട്രാന്‍സാക്ഷന്‍ നിരക്ക് 23 രൂപയായും നോണ്‍ ഫിനാന്‍ഷ്യല്‍ ട്രാന്‍സാക്ഷന്‍ നിരക്ക് 11 രൂപയായു വര്‍ധിച്ചുവെന്ന് അറിയിച്ചു. ഇന്‍ഡസ്‌ലാന്‍ഡ് ബാങ്കും നിരക്ക് 23 രൂപയായി വര്‍ധിപ്പിച്ചിട്ടുണ്ട്.