ബെർക്ഷെയർ ഹാത്‌വേയുടെ ഇതിഹാസ നിക്ഷേപകനും സിഇഒയുമായ വാറൻ ബഫറ്റ്, 94-ാം വയസ്സിൽ 2025 അവസാനത്തോടെ വിരമിക്കുന്നതായി പ്രഖ്യാപിച്ചു. നെബ്രാസ്കയിൽ നടന്ന കമ്പനിയുടെ വാർഷിക ഷെയർഹോൾഡർമാരുടെ യോഗത്തിലാണ് ഈ പ്രഖ്യാപനം നടന്നത്. ആറ് പതിറ്റാണ്ട് നീണ്ട പ്രവർത്തനത്തിന് വിരാമമിടുന്ന ഈ നീക്കം, ഒരു തുണിത്തൊഴിൽ യൂണിറ്റിൽ നിന്ന് ഒരു ട്രില്യൺ ഡോളർ മൂല്യമുള്ള സാമ്രാജ്യമായി ബെർക്ഷെയർ ഹാത്‌വേയെ മാറ്റിയെടുത്ത ഒരു യുഗത്തിന്റെ അന്ത്യത്തെയാണ് വരച്ചുകാട്ടുന്നത്. ബഫറ്റിന്റെ നിക്ഷേപ തത്ത്വചിന്തകൾ ധാരാളം നിക്ഷേപകർക്ക് തൂണും തണലുമായിട്ടുണ്ട്.

ഒരു മഹത്തായ കരിയറിന്റെ സമാപനം
“Oracle of Omaha” എന്നറിയപ്പെടുന്ന ബഫറ്റ്, 1965-ൽ ബെർക്ഷെയർ ഹാത്‌വേയുടെ നിയന്ത്രണം ഏറ്റെടുത്ത്, ആപ്പിൾ, കൊക്കകോള, അമേരിക്കൻ എക്സ്പ്രസ് തുടങ്ങിയ കമ്പനികളിൽ പ്രധാന ഓഹരികൾ ഉൾപ്പെടെ വൈവിധ്യമാർന്ന ഹോൾഡിംഗുകളുള്ള ഒരു ശക്തികേന്ദ്രമായി കമ്പനിയെ രൂപാന്തരപ്പെടുത്തി. ഗുരു ബെഞ്ചമിൻ ഗ്രഹാമിൽ നിന്ന് പഠിച്ച മൂല്യനിക്ഷേപ തത്ത്വങ്ങളിൽ വേരൂന്നിയ അദ്ദേഹത്തിന്റെ സമീപനം, ശക്തമായ അടിത്തറയുള്ള, കുറഞ്ഞ മൂല്യമുള്ള കമ്പനികളിൽ ദീർഘകാല നിക്ഷേപങ്ങളെ ലക്ഷ്യം  വെച്ചായിരുന്നു. 60 വർഷത്തിനിടെ, ബഫറ്റിന്റെ തന്ത്രം പലപ്പോഴായും അഭൂതപൂർവമായ ലാഭം നൽകി, ഏകദേശം 169 ബില്യൺ ഡോളറിന്റെ വ്യക്തിഗത സമ്പത്ത് സൃഷ്ടിച്ച്, ലോകത്തെ ഏറ്റവും സ്വാധീനമുള്ള നിക്ഷേപകരിൽ ഒരാളായി അദ്ദേഹത്തെ മാറ്റി.

വിരമിക്കൽ പ്രഖ്യാപനം, ഷെയർഹോൾഡർ യോഗത്തിലെ അഞ്ച് മണിക്കൂർ നീണ്ട ചോദ്യോത്തര വേളയുടെ അവസാനത്തിലാണ് വന്നത്. 40,000-ലധികം ആളുകൾ പങ്കെടുത്ത യോഗത്തിൽ മുൻ യു.എസ്. സ്റ്റേറ്റ് സെക്രട്ടറി ഹിലരി ക്ലിന്റൺ ഉൾപ്പെടെയുള്ള പ്രമുഖർ ഉണ്ടായിരുന്നു. പ്രഖ്യാപനം പലരെയും അമ്പരപ്പിച്ചു, അദ്ദേഹത്തിന്റെ നിയുക്ത പിൻഗാമിയായ ഗ്രെഗ് ആബെലിനെപ്പോലും. 

“പലർക്കും ഇതാ ഒരു പുതിയ വാർത്ത, ഗ്രെഗ് ഈ വർഷാവസാനം കമ്പനിയുടെ ചീഫ് എക്സിക്യൂട്ടീവ് ഓഫീസറാകേണ്ട സമയമായെന്ന് ഞാൻ കരുതുന്നു” ബഫറ്റ് പറഞ്ഞു.

വിപണിയുടെ ലോകത്ത്, ബഫറ്റിന്റെ സ്വാധീനം അഗാധമാണ്. ക്ഷമ, അച്ചടക്കം, സമഗ്രമായ ഗവേഷണം എന്നിവയിൽ ഊന്നൽ നൽകുന്ന അദ്ദേഹത്തിന്റെ തത്ത്വങ്ങൾ, വിപണിയിലെ ചാഞ്ചാട്ടവും വളർച്ചാ സാധ്യതകളും മാറിമറിയുന്ന ലോക വിപണിയിൽ ശക്തമായ പ്രതിധ്വനി സൃഷ്ടിക്കുന്നു. പ്രാദേശിക നിക്ഷേപ ഫോറങ്ങൾ, ധനകാര്യ ഉപദേശകർ എന്നിവർ പലപ്പോഴും ബഫറ്റിന്റെ തത്ത്വങ്ങൾ ഉദ്ധരിക്കാറുണ്ട്, പ്രത്യേകിച്ച് “സ്റ്റോക്കുകൾ വാങ്ങരുത്, ബിസിനസുകൾ വാങ്ങുക” എന്നതും ദശാബ്ദങ്ങൾ നീണ്ട കാഴ്ചപ്പാടോടെ നിക്ഷേപിക്കുക എന്നതുമൊക്കെ. 

“നിന്റെ ഉറക്കത്തിനിടയിലും പണം ഉണ്ടാക്കാനുള്ള വഴി കണ്ടെത്തിയില്ലെങ്കിൽ, നിന്റെ മരണം വരെ നിനക്ക് ജോലി ചെയ്യേണ്ടി വരും.”ബഫറ്റിന്റെ ഈ വാക്യങ്ങൾ പലരും ജീവിത മന്ത്രം പോലെ കൊണ്ട് നടക്കുന്നു. 

ബഫറ്റിന്റെ സ്വാധീനം ധനകാര്യത്തിനപ്പുറമാണ്. ഗിവിംഗ് പ്ലെഡ്ജ്, ബിൽ ആൻഡ് മെലിൻഡ ഗേറ്റ്സ് ഫൗണ്ടേഷനിലേക്കുള്ള ഗണ്യമായ സംഭാവനകൾ എന്നിവയിലൂടെ, ശതകോടീശ്വരന്മാർക്ക് ഒരു ആഗോള മാനദണ്ഡം സ്ഥാപിച്ച അദ്ദേഹത്തിന്റെ ജനകീയ പ്രതിബദ്ധത, കോർപ്പറേറ്റ് സോഷ്യൽ റെസ്‌പോൺസിബിലിറ്റി വളർന്നുവരുന്ന ലോകത്ത്, ശതകോടീശ്വരന്മാർക്ക് മാതൃകയായി പലപ്പോഴും ഉദ്ധരിക്കപ്പെടുന്നു. സിഇഒ സ്ഥാനം ഒഴിയുമെങ്കിലും, ബെർക്ഷെയർ ഹാത്‌വേയിൽ “ചുറ്റിപ്പറ്റി” നിൽക്കുമെന്ന് ബഫറ്റ് സൂചിപ്പിച്ചു, ഒരുപക്ഷേ ചെയർമാനോ ഉപദേശകനോക്കെയുമായി..