കോട്ടയം: സുഹൃത്തിനെ തലയ്ക്കടിച്ച് കൊലപ്പെടുത്തി മൃതദേഹം കഷ്ണങ്ങളാക്കി ചാക്കിൽ കെട്ടി പലയിടത്തായി ഉപേക്ഷിച്ച കേസിൽ പ്രതിയും ഭാര്യയും കുറ്റക്കാരാണെന്ന് കോടതി.  പ്രതികളായ,  മീനടം പീടികപ്പടിയിൽ വാടകയ്ക്കു താമസിച്ചിരുന്ന മുട്ടമ്പലം സ്വദേശി എ.ആർ വിനോദ്‌കുമാർ (കമ്മൽ വിനോദ്), ഭാര്യ എൻ.എസ് കുഞ്ഞുമോൾ എന്നിവരാണ് കോട്ടയം അഡിഷനൽ സെഷൻസ് കോടതി - 2 ജഡ്ജി ജെ. നാസർ കുറ്റക്കാരാണെന്ന് കണ്ടെത്തിയത്.

പയ്യപ്പാടി മലകുന്നം സന്തോഷ് ഫിലിപ്പ് (34) ആണ് കൊല്ലപ്പെട്ടത്. സന്തോഷിൻ്റെ ശരീരം പലകഷ്ണങ്ങളാക്കി മുറിച്ചു ചാക്കിൽ കെട്ടി ഉപേക്ഷിക്കുകയായിരുന്നു. കേസ് ശിക്ഷ വിധിക്കാനായി മാറ്റി. 2017 ഓഗസ്റ്റ് 23ന് രാത്രിയിലാണ് കൊല നടന്നത്. പിന്നീട്  ഓഗസ്റ്റ് 27 നാണ് തലയില്ലാത്ത ശരീരഭാഗം രണ്ട് ചാക്കിൽ കെട്ടി ഉപേക്ഷിക്കപ്പെട്ട നിലയിൽ കോട്ടയം മാങ്ങാനം മന്ദിരം കലുങ്കിന് സമീപത്തു നിന്നും കണ്ടെത്തിയത്.

പ്രതികളെ അറസ്റ്റു ചെയ്തതിനു ശേഷം 28നാണ് തല സമീപത്തെ തുരുത്തേൽ പാലത്തിന് സമീപത്തു നിന്ന് കിട്ടിയത്. വിനോദിന്റെ ഭാര്യ കുഞ്ഞുമോളും  സന്തോഷുമായി ബന്ധമുണ്ടായിരുന്നെന്നും ഇതിൽ വിനോദിനുള്ള വൈരാഗ്യമാണ് കൊലപാതകത്തിനു കാരണമെന്നും കോട്ടയം ഈസ്റ്റ് പൊലിസ് കുറ്റപത്രത്തിൽ വ്യക്തമാക്കിയിട്ടുണ്ട്.

കുഞ്ഞുമോളുടെ ഫോണിൽ നിന്നും വിളിച്ചതനുസരിച്ചു വീട്ടിലെത്തിയ സന്തോഷിനെ  വിനോദ് തലയ്ക്കടിച്ചു കൊന്നു എന്നാണ് കേസ്. തുടർന്ന് വിനോദും കുഞ്ഞുമോളും ചേർന്ന് ശരീരം കഷ്ണങ്ങളാക്കി ഓട്ടോറിക്ഷയിൽ  പലയിടത്തായി ഉപേക്ഷിക്കുകയായിരുന്നു.