തിരുവനന്തപുരം: കുട്ടികള്‍ ഇനി സുംബ ഡാന്‍സും പഠിക്കും. ശാരീരികവും മാനസികവുമായ ആരോഗ്യം സംരക്ഷിക്കാനും ലഹരിപ്പിടിയില്‍ അകപ്പെടാതിരിക്കാനുമാണ് എട്ടാം ക്ലാസിലെ കലാപഠനം എന്ന പുസ്തകത്തില്‍ സുംബ പഠനം ഉള്‍പ്പെടുത്തിയത്. ലഹരിവിരുദ്ധ പ്രവര്‍ത്തനങ്ങളുടെ ഭാഗമായി മുഴുവന്‍ സ്‌കൂളുകളിലും സുംബ ഡാന്‍സ് പഠിപ്പിക്കണമെന്നും എല്ലാ ദിവസവും ചെയ്യിക്കണമെന്നും മുഖ്യമന്ത്രി നിര്‍ദേശം നല്‍കിയിരുന്നു. തുടര്‍ന്ന് വിദ്യഭ്യാസ മന്ത്രി വി.ശിവന്‍കുട്ടി മോഡ്യൂള്‍ തയാറാക്കാനും അധ്യാപകര്‍ക്ക് പരിശീലനം നല്‍കാനും നിര്‍ദേശം നല്‍കി. യു.പി മുതല്‍ ഹൈസ്‌കൂള്‍ വരെയുള്ള മുഴുവന്‍ അധ്യാപകര്‍ക്കും പരിശലനം നല്‍കും. ആര്‍.പിമാര്‍ക്ക് പിശീലനം നല്‍കി കഴിഞ്ഞു. സ്‌കൂള്‍ തുറക്കുമ്പാള്‍ 1,60,000 അധ്യാപകര്‍ ഡാന്‍സ് പരിശീലകരാകും. ഇതിനായി അധ്യാപകര്‍ക്ക് പരിശീലനം നല്‍കുന്നുണ്ട്. 

നൃത്തവും ഫിറ്റ്നസും സംയോജിതമായ സുംബ ഡാന്‍സ് ജനപ്രിയ നൃത്തങ്ങള്‍ എന്ന പാഠഭാഗത്തിലാണ് ഉള്‍പ്പെടുത്തിയിരിക്കുന്നത്. ഇത് വന്ന വഴിയും പ്രതിപാദിച്ചിട്ടുണ്ട്. സ്‌കുള്‍ തുറന്നാല്‍ ഉടന്‍ മുഴുവന്‍ വിദ്യാര്‍ഥികളെയും സുംബ ഡാന്‍സ് ചെയ്യിപ്പിക്കും. കുറഞ്ഞ കുട്ടികളുള്ള സ്‌കൂളുകളില്‍ അസംബ്ലിയുടെ ഭാഗമായാണ് സുംബ ഡാന്‍സ് ചെയ്യിപ്പിക്കുക. കുട്ടികള്‍ കൂടുതലുള്ള സ്‌കൂളുകളില്‍ എങ്ങനെ നടപ്പിലാക്കണമെന്ന കാര്യത്തില്‍ അടുത്ത ആഴ്ച തീരുമാനമെടുക്കും.

എന്താണ് സുംബ
സുംബ എന്ന് കേള്‍ക്കുന്നത് തന്നെ ഒരു ഹരം പോലെയുണ്ട്. പക്ഷെ പലര്‍ക്കും സംഭവം കൃത്യമായി അറിയില്ല. മിക്കവര്‍ക്കും അതു ഡാന്‍സ് ആണ്. പലരും ഡാന്‍സ് കളിക്കാന്‍ അറിയില്ലല്ലോ എന്നുകരുതി മാറി നില്‍ക്കും, പക്ഷെ സുംബ ശരിക്കും ഡാന്‍സ് അല്ല, അതൊരു ഫിറ്റ്നസ് ഫോം ആണ്. ഒരുമണിക്കൂറില്‍ പത്തോ പന്ത്രണ്ടോ പാട്ടുകള്‍ പ്ലേ ചെയ്യും. സിമ്പിള്‍ സ്റ്റെപ്പ്സ് ആണ്. എല്ലാം ചെയ്യുന്നത് ഫിറ്റ്നസ് ഫോമില്‍. ഡാന്‍സ് മൂവ്മെന്‍സ് അല്ല, ഡാന്‍സ് കൂട്ടിച്ചേര്‍ക്കുന്നത് ബോറടിക്കാതിരിക്കാനാണ്. വണ്‍ ടു ത്രീ പറഞ്ഞു ചെയ്താല്‍ പെട്ടെന്നു മടുക്കും. അതുകൊണ്ടാണ് ഡാന്‍സ് വരുന്നത്. സുംബ ആര്‍ക്കും മനസിലാക്കാവുന്നതേയുള്ളൂ.