മുംബൈ: മുംബൈയിൽ ടൗൺ പ്ലാനിങ് ഡെപ്യൂട്ടി ഡയറക്ടറുടെ വസതിയിൽ നിന്നു കണക്കിൽപെടാത്ത 32 കോടിയുടെ സ്വത്തുക്കൾ പിടിച്ചെടുത്തു. എന്‍ഫോഴ്‌സ്‌മെന്റ് ഡയറക്ടറേറ്റ് നടത്തിയ റെയ്ഡിൽ 8.6 കോടി രൂപയും 23.25 കോടിയുടെ സ്വർണവും വജ്രാഭരണങ്ങളും കണ്ടെത്തി.

മഹാരാഷ്ട്രയിലെ വസായ്-വിരാർ സിറ്റി മുനിസിപ്പൽ കോർപ്പറേഷനിലെ (VVMസി) ടൗൺ പ്ലാനിങ് ഡെപ്യൂട്ടി ഡയറക്ടർ യുമിഗാനു ശിവ റെഡ്ഡി (YS റെഡ്ഡി)യുടെ വീട്ടിലായിരുന്നു റെയ്ഡ്. ഇവിടെയും കൂടെ നളസൊപ്പാറയിലെ വസതിയിലും മുനിസിപ്പൽ ഓഫീസിലും ഹൈദരാബാദിലെ ഹഫീസ്‌പേട്ടിലെ കുടുംബ വസതികളിലും റെയ്ഡ് നടന്നു.

2009 മുതൽ വസായ് വിരാർ മുനിസിപ്പൽ കോർപ്പറേഷനിലെ സർക്കാർ, സ്വകാര്യ ഭൂമികളിൽ അനധികൃതമായി പാർപ്പിടവും വാണിജ്യ കെട്ടിട സമുച്ചയങ്ങളും നിർമ്മിച്ചതായി കേസിൽ ആരോപിക്കുന്നു. ബുധനാഴ്ച ആരംഭിച്ച റെയ്ഡ് വ്യാഴാഴ്ച അവസാനിപ്പിച്ചു.

മലിനജല സംസ്കരണ പ്ലാന്റിനായി നീക്കിവച്ച സ്ഥലത്ത് 41 അനധികൃത കെട്ടിടങ്ങൾ നിർമ്മിച്ചതായി എന്‍ഫോഴ്‌സ്‌മെന്റ് ഡയറക്ടറേറ്റ് വ്യക്തമാക്കി. 2009 മുതൽ വിവിഎംസി ഉദ്യോഗസ്ഥരുടെ ഒത്താശയോടെ പ്രദേശത്ത് വൻ തോതിലുള്ള അനധികൃത നിർമ്മാണങ്ങൾ നടക്കുകയാണെന്നും കണ്ടെത്തി. ഡെവലപ്പർമാർ ഉദ്യോഗസ്ഥരുടെ സഹകരണത്തോടെ അനധികൃത കെട്ടിടങ്ങൾ നിർമ്മിച്ച് പൊതുജനങ്ങളെ വഞ്ചിച്ചതായി റിപ്പോർട്ട് പറയുന്നു.

അനധികൃത കെട്ടിടങ്ങൾ പൊളിക്കാനുള്ള ബോംബെ ഹൈക്കോടതി ഉത്തരവ് 2024 ജൂലൈ 8-ന് ഇറക്കിയിരുന്നു, ആ ഉത്തരവിൽ സുപ്രീംകോടതി ഒരു ഇളവും നൽകിയിട്ടില്ല.മീര ഭയാന്ദർ പൊലീസ് കമ്മീഷണറേറ്റിൽ രജിസ്റ്റർ ചെയ്ത എഫ്‌ഐആറുകളുടെ അടിസ്ഥാനത്തിലാണ് എന്‍ഫോഴ്‌സ്‌മെന്റ് ഡയറക്ടറേറ്റ് അന്വേഷണം ആരംഭിച്ചത്. 2002ലെ കള്ളപ്പണം വെളുപ്പിക്കൽ തടയൽ നിയമത്തിന്റെ (PMLA) വ്യവസ്ഥകൾ പ്രകാരമാണ് റെയ്ഡ് നടന്നത്.

The Enforcement Directorate conducted a raid at the residence of Y.S. Reddy, Deputy Director of Town Planning in Vasai-Virar Municipal Corporation, uncovering unaccounted assets worth Rs 32 crore. Authorities seized Rs 8.6 crore in cash along with gold and diamond jewelry valued at Rs 23.25 crore. The investigation revealed illegal constructions carried out with officials’ collusion since 2009. A Bombay High Court order mandates demolition of 41 unauthorized buildings in the area.