റിയാദ്: യുഎസ് പ്രസിഡന്റ് ഡൊണാള്‍ഡ് ട്രംപ് അടുത്തിടെ നടത്തിയ ഗള്‍ഫ് സന്ദര്‍ശന വേളയില്‍ സിറിയയ്‌ക്കെതിരായ ഉപരോധങ്ങള്‍ നീക്കുന്നതായി പ്രഖ്യാപിച്ച സമയത്തെ സഊദി കിരീടാവകാശിയുടെ നന്ദി സൂചകമായുള്ള പ്രതികരണം വൈറലായിരുന്നു.

ട്രംപിനോടുള്ള നന്ദി പ്രകടിപ്പിച്ചുകൊണ്ട് മുഹമ്മദ് ബിന്‍ സല്‍മാന്‍ നെഞ്ചില്‍ കൈകള്‍ വച്ചിരിക്കുന്ന ദൃശ്യങ്ങള്‍ സോഷ്യല്‍ മീഡിയകളില്‍ വൈറലായിരുന്നു. മുഹമ്മദ് ബിന്‍ സല്‍മാന്റെ വൈറല്‍ ആംഗ്യം ഉടന്‍ തന്നെ ഒരു ഇമോജിയായി മാറിയേക്കാമെന്ന റിപ്പോര്‍ട്ടുകളാണ് ഇപ്പോള്‍ പുറത്തുവരുന്നത്. 

സഊദി കിരീടാവകാശിയില്‍ നിന്ന് പ്രചോദനം ഉള്‍ക്കൊണ്ട് നെഞ്ചില്‍ കൈവച്ചിരിക്കുന്ന ഒരു പുതിയ ഇമോജി സൃഷ്ടിക്കുന്നതിനുള്ള നിര്‍ദ്ദേശം സഊദി സോഫ്റ്റ്‌വെയര്‍ എഞ്ചിനീയര്‍ അലി അല്‍മുതൈരി യൂണികോഡ് കണ്‍സോര്‍ഷ്യത്തിന് സമര്‍പ്പിച്ചു. 

 

 

'ലോകത്തിന്റെ ശ്രദ്ധ പിടിച്ചുപറ്റിയ ആത്മാര്‍ത്ഥമായ ഒരു നിമിഷമായിരുന്നു അത്, ഈ കാലഘട്ടത്തിന്റെ ഭാഷയില്‍ ഇമോജിയില്‍ അത് അനശ്വരമാക്കപ്പെടാന്‍ അര്‍ഹമാണെന്ന് എനിക്ക് തോന്നി. ഈ ആംഗ്യം വൈറലായി, ഇപ്പോള്‍ പല മാനുഷിക സാഹചര്യങ്ങളിലും ആഴത്തിലുള്ള നന്ദി പ്രകടിപ്പിക്കാന്‍ ഇത് ഉപയോഗിക്കുന്നു.' അല്‍മുതൈരി പറഞ്ഞു.

സഊദിയുടെയും ഗള്‍ഫിന്റെയും മൂല്യങ്ങളായ കൃതജ്ഞതയും ബഹുമാനവും പ്രതിഫലിപ്പിക്കുന്നതും മേഖലയിലെ വികസിച്ചുകൊണ്ടിരിക്കുന്ന ഡിജിറ്റല്‍ പദപ്രയോഗങ്ങളുമായി പൊരുത്തപ്പെടുന്നതും ആയ ഇമോജിയുടെ രൂപകല്‍പ്പന അംഗീകൃത മാനദണ്ഡങ്ങള്‍ക്കനുസൃതമായാണ് യൂണികോഡ് കണ്‍സോര്‍ഷ്യത്തിന് ഔദ്യോഗികമായി സമര്‍പ്പിച്ചതെന്ന് അല്‍മുതൈരി പറഞ്ഞു.

'ജാപ്പനീസ് കിമോണോ, ഇന്ത്യന്‍ സാരി, റഷ്യന്‍ മാട്രിയോഷ്‌ക പാവ തുടങ്ങിയ ഇമോജികളില്‍ ഇതിനകം തന്നെ നിരവധി സംസ്‌കാരങ്ങളെ പ്രതിനിധീകരിക്കുന്നുണ്ട്. സഊദി, ഗള്‍ഫ് സംസ്‌കാരങ്ങളെ ഈ ആഗോള ഭാഷയില്‍ അംഗീകരിക്കേണ്ട സമയം അതിക്രമിച്ചിരിക്കുന്നു' അദ്ദേഹം പറഞ്ഞു.

അല്‍മുരൈരി മുന്നോട്ടുവച്ച നിര്‍ദ്ദേശം നിലവില്‍ യൂണികോഡിന്റെ പരിഗണനയിലാണ്. ഇമോജിയെക്കുറിച്ചുള്ള അല്‍മുതൈരിയുടെ ട്വീറ്റുകളിലൊന്ന് 24 മണിക്കൂറിനുള്ളില്‍ 3.2 ദശലക്ഷത്തിലധികം ആളുകളാണ് വായിച്ചത്.

അല്‍മുതൈരിയെ സംബന്ധിച്ചിടത്തോളം, ഈ ഇമോജിയുടെ സൃഷ്ടി ആഗോള ഉപയോഗത്തിന് ലഭ്യമാണെന്ന് ഉറപ്പാക്കുക എന്നതുകൂടിയാണ്. 

Saudi Crown Prince Mohammed bin Salman’s grand gesture of gratitude to Donald Trump goes viral, with a million-dollar reaction now turned into a trending emoji.