ഇന്ത്യ-പാകിസ്താന്‍ സംഘര്‍ഷത്തിന് പിന്നാലെ മധുര പലഹാരങ്ങളുടെ പേരുകള്‍ മാറ്റി രാജസ്ഥാനിലെ കടയുടമകള്‍. പ്രശസ്തമായ മൈസൂര്‍ പാക്കും ഇത്തരത്തില്‍ പേര് നഷ്ടപ്പെട്ടവരുടെ കൂട്ടത്തില്‍ ഉള്‍പ്പെടും. 

പലഹാരത്തിലെ 'പാക്' പാകിസ്താനെ പ്രതിനിധീകരിക്കുന്നുവെന്നാണ് ആരോപണം. അതുകൊണ്ട് തന്നെ ഇനി പലഹാരങ്ങളില്‍ 'പാക്' എന്നതിന് പകരം 'ശ്രീ' എന്ന് ഉപയോഗിക്കുമെന്ന് ജയ്പൂരിലെ കടയുടമ പറയുന്നു. 

' ഞങ്ങളുടെ കടകളില്‍ നിര്‍മ്മിക്കുന്ന പലഹാരങ്ങളുടെ പേരിലെ 'പാക്' എടുത്ത് കളഞ്ഞിരിക്കുന്നു. ഇനി മുതല്‍ മോടി പാക്, ഗോണ്ട് പാക്, മൈസൂര്‍ പാക് എന്നിവയ്ക്ക് പകരം 'മോടി ശ്രീ', 'ഗോണ്ട് ശ്രീ', 'മൈസൂര്‍ ശ്രീ' എന്നിങ്ങനെ ഉപയോഗിക്കും,' കടയുടമ പറഞ്ഞതായി എന്‍ഡിടിവി റിപ്പോര്‍ട്ട് ചെയ്തു.

വാര്‍ത്ത പുറത്ത് വന്നതിന് പിന്നാലെ നിറഞ്ഞ പരിഹാസമാണ് സമൂഹമാധ്യമങ്ങളില്‍ ഉയരുന്നത്. യഥാര്‍ഥത്തില്‍ മൈസൂര്‍ പാകിലെ 'പാക്' പാകിസ്താനെ പ്രതിനിധീകരിക്കുന്നില്ല. കന്നട ഭാഷയില്‍ മധുരം എന്നതിന് ഉപയോഗിക്കുന്ന പദമാണ് പാക്. കര്‍ണാടകയിലെ പ്രശസ്ത ജില്ലയായ മൈസൂരുമായി ബന്ധിപ്പിച്ചാണ് പലഹാരത്തിന് മൈസൂര്‍ പാക് എന്ന് പേര് ലഭിച്ചത്. 

പഹല്‍ഗാം ഭീകരാക്രമണവും, പിന്നാലെയുണ്ടായ ഓപ്പറേഷന്‍ സിന്ദൂര്‍ സൈനിക നടപടിയും ഇരു രാജ്യങ്ങളും തമ്മില്‍ സംഘര്‍ഷത്തിന് കാരണമായിരുന്നു. നിലവില്‍ ഇന്ത്യയും, പാകിസ്താനും വെടിനിര്‍ത്തല്‍ പ്രഖ്യാപിച്ചെങ്കിലും നയതന്ത്ര തലത്തില്‍ പ്രതിസന്ധി നിലനില്‍ക്കുകയാണ്.