മലപ്പുറം: മലപ്പുറം വഴിക്കടവ് മഴവെള്ളപാച്ചിലിൽ ചങ്ങാടം ഒലിച്ചുപോയി. പുഞ്ചക്കൊല്ലി അളക്കൽ നഗറിലെ മുളകൊണ്ടുള്ള ചങ്ങാടമാണ് ഒലിച്ചുപോയത്. ഇതോടെ പ്രദേശത്തെ 34 ആദിവാസി കുടുംബങ്ങൾ ഒറ്റപ്പെടുകയും ചെയ്തു. ഇന്നലെ രാത്രി മുതലുള്ള ശക്തമായ മഴയിലും മഴ വെള്ളപാച്ചിലിനും പിന്നാലെയാണ് ചങ്ങാടം ഒലിച്ചുപോയത്. 

കേരളത്തിൽ ശക്തമായി പെയ്യുന്ന മഴയിൽ നിരവധി സ്ഥലങ്ങളിൽ വലിയ നാശനഷ്ടങ്ങൾ റിപ്പോർട്ട് ചെയ്യപ്പെടുന്നുണ്ട്. മലപ്പുറം കൊണ്ടോട്ടിയിലെ ശക്തമായ കാറ്റിലും മഴയിലും വലിയ രീതിയിലുള്ള കൃഷി നാശം ഉണ്ടായിട്ടുണ്ട്. എണ്ണൂറിൽ അധികം നേന്ത്ര വാഴകളാണ് മഴയിൽ നശിച്ചത്. അഞ്ചു ലക്ഷം രൂപയോളം നഷ്ടം സംഭവിച്ചുവെന്നാണ് കർഷകർ അറിയിച്ചത്. 

കേരളത്തിൽ കാലവർഷം അടുത്ത രണ്ട് ദിവസത്തിനുള്ളിൽ എത്തിച്ചേരാൻ സാധ്യയുണ്ടെന്നാണ് കേന്ദ്ര കാലാവസ്ഥ വകുപ്പ് അറിയിച്ചത്. അറബിക്കടലിൽ രൂപപ്പെട്ട ന്യൂനമർദത്തിന്റെ സ്വാധീനഫലമായി സംസ്ഥാനത്ത് അടുത്ത അഞ്ചുദിവസം തീവ്രവും അതിതീവ്രവുമായ മഴയ്ക്ക് സാധ്യതയുള്ളതായി കേന്ദ്ര കാലാവസ്ഥ വകുപ്പ് അറിയിച്ചു. ഇന്ന് കണ്ണൂർ, കാസർകോട് ജില്ലകളിലും നാളെ മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലും തിങ്കളാഴ്ച പത്തനംതിട്ട, ഇടുക്കി, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലും കേന്ദ്ര കാലാവസ്ഥ വകുപ്പ് റെഡ് അലർട്ട് പ്രഖ്യാപിച്ചു.

Heavy rains Tribal families stranded at Malappuram crossing