കൊച്ചി: അറബിക്കടലില്‍ കാര്‍ഗോ വീണത് വിഴിഞ്ഞത്ത് നിന്ന് പോയ കപ്പലില്‍ നിന്ന്. ഇന്നലെ രാത്രിയാണ് MSC ELSA 3 എന്ന കാര്‍ഗോ കപ്പല്‍ വിഴിഞ്ഞത്ത് നിന്ന് പുറപ്പെട്ടത്. ലൈബീരിയയുടെ പതാകയുള്ള കപ്പലാണ് അപകടത്തില്‍പ്പെട്ടത്. തീരത്ത് നിന്ന് 70 കിലോമീറ്റര്‍ അകലെ ചുഴിയില്‍പ്പെട്ടാണ് കപ്പല്‍ മറിഞ്ഞതെന്നാണ് റിപ്പോര്‍ട്ട്. 

കപ്പലിലുണ്ടായിരുന്ന 24 ജീവനക്കാരില്‍ 9 പേര്‍ ചങ്ങാടങ്ങളില്‍ പുറത്തുകടന്നു. ബാക്കിയുള്ള 15 പേര്‍ക്കായി രക്ഷാദൗത്യം തുടരുകയാണ്. 28 ഡിഗ്രി വരെയാണ് കപ്പല്‍ ചരിഞ്ഞിരിക്കുന്നത്. ഇത് പൂര്‍ണ്ണമായും ചരിഞ്ഞാല്‍ അപകടസ്ഥിതിയിലേക്ക് പോകുമെന്ന് നേവി മുന്നറിയിപ്പ് നല്‍കിയിട്ടുണ്ട്. 

ആകെ 9 കണ്ടയ്‌നറുകളാണ് കടലിലേക്ക് വീണത്. ഉള്‍ക്കടലില്‍ നിന്ന് കേരള തീരത്തിന് 38 നോട്ടിക്കല്‍ മൈല്‍ അകലെയാണ് കണ്ടയ്‌നറുകള്‍ കണ്ടതെന്നാണ് റിപ്പോര്‍ട്ട്. കണ്ടയ്‌നറുകളോടൊപ്പം കപ്പലിലുണ്ടായിരുന്ന എണ്ണയും കടലില്‍ വീണതായി കോസ്റ്റ് ഗാര്‍ഡില്‍ നിന്ന് റിപ്പോര്‍ട്ടുണ്ട്. അപകടകരമായ വസ്തുക്കളാണ് കാര്‍ഗോയിലുള്ളതെന്നും, തീരത്തടിഞ്ഞാല്‍ പൊതുജനം അടുത്ത് പോകരുതെന്നും നിര്‍ദേശമുണ്ട്. വടക്കന്‍ തീരത്ത് കാര്‍ഗോ എത്തുമെന്നാണ് വിവരം. ചിലപ്പോള്‍ കേരള തീരത്ത് നിന്ന് ഒഴിഞ്ഞ് മാറാനും സാധ്യതയുണ്ടെന്നും ദുരന്ത നിവാരണ അതോറിറ്റി അറിയിച്ചു. 

15 Workers Missing 9 Cargo Containers Lost in a ship from vizhinjam port