കൊച്ചി: അറബിക്കടലില്‍ അപകടത്തില്‍പ്പെട്ട കപ്പലിലെ മുഴുവന്‍ പേരും സുരക്ഷിതര്‍. 24 ജീവനക്കാരില്‍ 21 പേരെയും രക്ഷപ്പെടുത്തി നേവിയുടെ കപ്പലുകളിലേക്ക് മാറ്റി. മൂന്നുപേര്‍ അപകടത്തില്‍പ്പെട്ട കപ്പലില്‍ തുടരുകയാണ്. ജീവനക്കാര്‍ക്ക് നിലവില്‍ ആരോഗ്യ പ്രശ്‌നങ്ങളില്ല. കപ്പലിലെ വസ്തുക്കള്‍ നാളെ മുതല്‍ മാറ്റി തുടങ്ങും. 

അതേസമയം വിഴിഞ്ഞത്ത് നിന്ന് പോയ കപ്പലാണ് അറബിക്കടലിൽ അപകടത്തിൽപ്പെട്ടത്. കപ്പലിൽ നിന്ന് ചരക്ക് കയറ്റിയിരുന്ന കണ്ടയ്നറുകൾ കടലിലേക്ക് വീണിട്ടുണ്ട്. ഇന്നലെ രാത്രിയാണ് MSC ELSA 3 എന്ന കാർഗോ കപ്പൽ വിഴിഞ്ഞത്ത് നിന്ന് പുറപ്പെട്ടത്. ലൈബീരിയയുടെ പതാകയുള്ള കപ്പലാണ് അപകടത്തിൽപ്പെട്ടത്. തീരത്ത് നിന്ന് 70 കിലോമീറ്റർ അകലെ ചുഴിയിൽപ്പെട്ടാണ് കപ്പൽ മറിഞ്ഞതെന്നാണ് റിപ്പോർട്ട്. 

കപ്പലിലുണ്ടായിരുന്ന 24 ജീവനക്കാരിൽ 9 പേർ ചങ്ങാടങ്ങളിൽ പുറത്തുകടന്നു. ബാക്കിയുള്ള 15 പേർക്കായി രക്ഷാദൗത്യം തുടരുകയാണ്. 28 ഡിഗ്രി വരെയാണ് കപ്പൽ ചരിഞ്ഞിരിക്കുന്നത്. ഇത് പൂർണ്ണമായും ചരിഞ്ഞാൽ അപകടസ്ഥിതിയിലേക്ക് പോകുമെന്ന് നേവി മുന്നറിയിപ്പ് നൽകിയിട്ടുണ്ട്. 

ആകെ 9 കണ്ടയ്‌നറുകളാണ് കടലിലേക്ക് വീണത്. ഉൾക്കടലിൽ നിന്ന് കേരള തീരത്തിന് 38 നോട്ടിക്കൽ മൈൽ അകലെയാണ് കണ്ടയ്‌നറുകൾ കണ്ടതെന്നാണ് റിപ്പോർട്ട്. കണ്ടയ്‌നറുകളോടൊപ്പം കപ്പലിലുണ്ടായിരുന്ന എണ്ണയും കടലിൽ വീണതായി കോസ്റ്റ് ഗാർഡിൽ നിന്ന് റിപ്പോർട്ടുണ്ട്. അപകടകരമായ വസ്തുക്കളാണ് കാർഗോയിലുള്ളതെന്നും, തീരത്തടിഞ്ഞാൽ പൊതുജനം അടുത്ത് പോകരുതെന്നും നിർദേശമുണ്ട്. വടക്കൻ തീരത്ത് കാർഗോ എത്തുമെന്നാണ് വിവരം. ചിലപ്പോൾ കേരള തീരത്ത് നിന്ന് ഒഴിഞ്ഞ് മാറാനും സാധ്യതയുണ്ടെന്നും ദുരന്ത നിവാരണ അതോറിറ്റി അറിയിച്ചു.