ഇതിഹാസതാരം ക്രിസ്റ്റ്യാനോ റൊണാൾഡോ തന്റെ നാല്പതാം വയസ്സിലും പ്രായത്തെ പോലും വെല്ലുന്ന പോരാട്ടവീര്യമാണ് നടത്തിക്കൊണ്ടിരിക്കുന്നത്. ഓരോ മത്സരങ്ങൾ കഴിയുമ്പോഴും തന്റെ ബൂട്ടുകളിൽ നിന്നും ഗോൾ വേട്ട തുടർന്ന് കൊണ്ടിരിക്കുകയാണ് റൊണാൾഡോ. ഇപ്പോൾ തനിക്ക് എത്ര വയസ്സ് വരെ ഫുട്ബോൾ കളിക്കാൻ സാധിക്കുമെന്ന ചോദ്യത്തിന് മറുപടി നൽകിയിരിക്കുകയാണ് റൊണാൾഡോ. അടുത്ത 10 വർഷം വരെ തനിക്ക് ഫുട്ബോൾ കളിക്കാൻ സാധിക്കുമെന്നാണ് റൊണാൾഡോ പറഞ്ഞത്.  

''ഞാൻ അടുത്ത 10 വർഷം ഫുട്ബോൾ കളിക്കും എന്നാണ് തോന്നുന്നത്. ചെറുപ്പമായിരിക്കുമ്പോൾ എപ്പോഴും കളിക്കാൻ കഴിയുമെന്നും എന്നും  ശക്തിയുണ്ടാകുമെന്നും കരുതും. എനിക്ക് 25, 30 വയസ്സുള്ളപ്പോൾ അങ്ങനെയാണ് കരുതിയത്. എന്നാൽ ഫുട്ബോളിൽ കാര്യങ്ങൾ അങ്ങനെയല്ല. പക്ഷെ എനിക്ക് ഇപ്പോൾ വളരെ നല്ലതായിട്ടാണ് തോന്നിയത്. മുമ്പത്തേക്കാൾ വളരെ നന്നായിട്ടാണ് എനിക്ക് തോന്നുന്നത്'' റൊണാൾഡോ ഫിറ്റ്നസ് ട്രാക്കിംഗ് കമ്പനിയായ വൂപ്പിൽ നടന്ന അഭിമുഖത്തിൽ പറഞ്ഞു. 

റൊണാൾഡോ നിലവിൽ സഊദി ക്ലബായ അൽ നസറിന്റെ താരമാണ്. 2023ൽ മാഞ്ചസ്റ്റർ യുണൈറ്റഡിൽ നിന്നുമാണ് റൊണാൾഡോ അൽ നസറിൽ എത്തുന്നത്. റൊണാൾഡോയുടെ വരവിന് പിന്നാലെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. അൽ നസറിനായി ഇതുവരെ 98 ഗോളുകളാണ് റൊണാൾഡോ അടിച്ചുകൂട്ടിയിട്ടുള്ളത്. രണ്ട് ഗോളുകൾ കൂടി നേടിയാൽ അൽ നസറിനായി 100 ഗോളുകൾ എന്ന നേട്ടത്തിലേക്ക് കാലെടുത്തുവെക്കാൻ റൊണാൾഡോക്ക് സാധിക്കും. 

റൊണാൾഡോ ഈ സീസൺ അവസാനത്തോടെ അൽ നസർ വിടുമെന്നും റിപ്പോർട്ടുകൾ ഉണ്ട്. അൽ അഹ്ലി, പാൽമിറാസ്, ചെൽസി എന്നീ ടീമുകൾ താരത്തെ സ്വന്തമാക്കാൻ ശ്രമിക്കുന്നുവെന്നും റിപ്പോർട്ടുകൾ നിലനിൽക്കുന്നുണ്ട്. വരാനിരിക്കുന്ന ഫിഫ ക്ലബ് ലോകകപ്പിൽ ഈ മൂന്ന് ക്ലബ്ബുകളും കളിക്കുന്നുണ്ട്. അതുകൊണ്ട് തന്നെ റൊണാൾഡോ ഈ ടൂർണമെന്റ് കളിക്കാനായി അൽ നസർ വിടാനുള്ള സാധ്യതകളും നിലനിൽക്കുന്നുണ്ട്. 

Cristiano Ronaldo has answered the question of how old he will be able to play football