തൃശൂര്‍∙ പ്രായം തികയാത്ത പെണ്‍കുട്ടിയെ പലതവണ ലൈംഗികമായി പീഡിപ്പിച്ചതിന് ബന്ധുവായ പ്രതിക്ക് കഠിന ശിക്ഷ. പോര്‍ക്കുളം സ്വദേശിയായ പ്രതിക്ക് കുന്നംകുളം പോക്‌സോ കോടതി 33 വര്‍ഷം കഠിനതടവും 3,05,000 രൂപ പിഴയും വിധിച്ചു. ഈ തുകയില്‍ നിന്നു 1 ലക്ഷം രൂപ അതിജീവിതയ്ക്ക് നല്‍കണമെന്നുമാണ് കോടതി ഉത്തരവിട്ടത്. പോക്‌സോ കോടതി ജഡ്ജിയായ എസ്. ലിഷയാണ് ശിക്ഷ വിധിച്ചത്.

2019 മുതല്‍ 2024 വരെ സ്വന്തം വീട്ടില്‍വച്ചായിരുന്നു പ്രതി പെണ്‍കുട്ടിയെ പീഡിപ്പിച്ചിരുന്നത്. പല ഘട്ടങ്ങളിലും പ്രതി കുട്ടിക്ക് നേരെ ലൈംഗിക അതിക്രമങ്ങള്‍ നടത്തി. മാത്രമല്ല, കത്തി ഉപയോഗിച്ച് മുറിവേല്‍പ്പിക്കുകയും, ലൈംഗികമായി പ്രദര്‍ശനം നടത്തുകയും, പിന്നീട് അപവാദപ്രചാരണം നടത്തുകയും ചെയ്തു. ഇതിനെ തുടര്‍ന്ന് മാനസികമായി തളര്‍ന്ന പെണ്‍കുട്ടി ആത്മഹത്യയ്ക്ക് ശ്രമിക്കുകയും ചെയ്തു.

ആത്മഹത്യാശ്രമത്തെത്തുടര്‍ന്ന് കുന്നംകുളത്തെ സ്വകാര്യ ആശുപത്രിയില്‍ ചികിത്സ തേടിയ പെണ്‍കുട്ടിയുടെ പരാതിയിലാണ് കേസിന് തുടക്കമായത്. കുന്നംകുളം പോലീസ് സ്റ്റേഷനിലെ സബ് ഇന്‍സ്‌പെക്ടര്‍ വി. ജിഷിൽ കേസെടുത്തു. തുടര്‍ന്ന് സബ് ഇന്‍സ്‌പെക്ടര്‍ എം. ജോര്‍ജ് അന്വേഷണം പൂര്‍ത്തിയാക്കി കുറ്റപത്രം സമര്‍പ്പിച്ചു.

കേസിന്റെ വിചാരണക്കിടെ പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. കെ.എസ്. ബിനോയ്, അഡ്വ. കെ.എന്‍. അശ്വതി, അഡ്വ. ചിത്ര, ഗ്രേഡ് എ.എസ്.ഐ. എം. ഗീത എന്നിവരും ചേര്‍ന്ന് പ്രവര്‍ത്തിച്ചു.