തിരുവനന്തപുരം: മനുഷ്യ-വന്യജീവി സംഘർഷം രൂക്ഷമാകുന്ന സാഹചര്യത്തിൽ, കാട്ടുപന്നികൾ ഉൾപ്പെടെയുള്ള ജീവനും സ്വത്തിനും ഭീഷണിയാകുന്ന വന്യജീവികളെ കൊല്ലാൻ കേന്ദ്ര സർക്കാരിന്റെ അനുമതി തേടാൻ കേരള മന്ത്രിസഭ തീരുമാനിച്ചു. മുഖ്യമന്ത്രി പിണറായി വിജയൻ അധ്യക്ഷനായ മന്ത്രിസഭാ യോഗത്തിൽ, നിയമനിർമാണ ഭേദഗതികൾക്കായി ശുപാർശകൾ സമർപ്പിക്കാൻ വനംവകുപ്പ് സെക്രട്ടറിയെ ചുമതലപ്പെടുത്തി.

നിയമ വകുപ്പ് സെക്രട്ടറിയുമായി കൂടിയാലോചിച്ച് ആവശ്യമായ നിയമനിർമാണ നിർദേശം തയ്യാറാക്കാൻ വനം-വന്യജീവി വകുപ്പിന് നിർദേശം. കൃഷിക്കും ജീവനും ഭീഷണിയുണ്ടാക്കുന്ന കാട്ടുപന്നികളെ ഉപാധികളോടെ കൊല്ലാനുള്ള ചീഫ് വൈൽഡ് ലൈഫ് വാർഡന്റെ അധികാരം ഹോണററി വൈൽഡ് ലൈഫ് വാർഡനോ മറ്റ് അധികാരപ്പെട്ട ഉദ്യോഗസ്ഥർക്കോ ഡെലിഗേറ്റ് ചെയ്യുന്ന സർക്കാർ ഉത്തരവിന്റെ കാലാവധി ഒരു വർഷത്തേക്ക് നീട്ടി.

വയനാട്, പാലക്കാട്, ഇടുക്കി, പത്തനംതിട്ട തുടങ്ങിയ വനപ്രദേശങ്ങളോട് ചേർന്ന ജില്ലകളിൽ കാട്ടുപന്നികൾ, കുരങ്ങുകൾ, ആനകൾ, പുള്ളിപ്പുലികൾ, കാട്ടുപോത്തുകൾ എന്നിവ ജനവാസ മേഖലകളിലേക്ക് അലഞ്ഞുതിരിയുന്നത് വർധിച്ചതോടെ പരുക്കുകൾ, ജീവഹാനി, വിളനാശം എന്നിവ സാധാരണമായി. കർഷകരും നാട്ടുകാരും സമയബന്ധിതമായ ഇടപെടലും നഷ്ടപരിഹാരവും ആവശ്യപ്പെട്ട് ആവർത്തിച്ച് ആശങ്കകൾ ഉന്നയിച്ചിരുന്നു.

മറ്റ് മന്ത്രിസഭാ തീരുമാനങ്ങൾ:

35-ാമത് ദേശീയ ഗെയിംസിൽ റഗ്ബിയിൽ വെങ്കല മെഡൽ നേടിയ ഹരിശ്രീ എം.ന് കായിക വകുപ്പിൽ ക്ലാർക്കിന്റെ സൂപ്പർന്യൂമററി തസ്തികയിൽ നിയമനം.

ഹോംകോയിൽ ERP സോഫ്റ്റ്‌വേർ നടപ്പാക്കാൻ രണ്ട് ഡാറ്റ എൻട്രി ഓപ്പറേറ്റർമാരെ ദിവസ വേതനാടിസ്ഥാനത്തിൽ നിയമിക്കും.

പൊലീസ് വകുപ്പിന്റെ പർച്ചേസ് സംബന്ധിച്ച ജസ്റ്റിസ് സി.എൻ. രാമചന്ദ്രൻ കമ്മീഷൻ ശുപാർശകൾ അംഗീകരിച്ചു.

തിരുവനന്തപുരം ജില്ലയിലെ മണമ്പൂർ NH-കവലയൂർ-കുളമുട്ടം റോഡ് നവീകരണത്തിന് 4,14,94,245 രൂപയുടെ ടെണ്ടർ അംഗീകരിച്ചു.

പത്തനംതിട്ടയിലെ പാറക്കടവ് പാലം നിർമാണത്തിന് 11,19,86,861 രൂപയുടെ ടെണ്ടർ അംഗീകരിച്ചു.

11 സ്പെഷ്യൽ റവന്യൂ റിക്കവറി ഓഫീസുകളിലെ 221 താത്കാലിക തസ്തികകൾ, 8 തഹസിൽദാർ ഓഫീസുകളിലെ 167 തസ്തികകൾ, ലാൻഡ് റവന്യൂ കമ്മീഷണറേറ്റിലെ 9 തസ്തികകൾ എന്നിവ 2025 ഏപ്രിൽ 1 മുതൽ 2026 മാർച്ച് 31 വരെ തുടരാൻ അനുമതി.

ജില്ലാ കളക്ടറേറ്റുകളിലെ 217 താത്കാലിക തസ്തികകൾക്കും 2025 ഏപ്രിൽ 1 മുതൽ 2026 മാർച്ച് 31 വരെ തുടർച്ചാനുമതി.