ന്യൂഡൽഹി: കോഴിക്കോട്-വയനാട് ജില്ലകളെ ബന്ധിപ്പിക്കുന്ന ആനക്കാംപൊയിൽ-കള്ളാടി-മേപ്പാടി തുരങ്കപാത പദ്ധതിക്ക് കേന്ദ്ര പരിസ്ഥിതി മന്ത്രാലയത്തിന്റെ അനുമതി. വിദഗ്ധ സമിതിയാണ് അന്തിമ പാരിസ്ഥിതിക അനുമതി നൽകിയത്. 60 ഉപാധികളോടെയാണ് പദ്ധതി നടപ്പാക്കാൻ അനുമതി ലഭിച്ചിരിക്കുന്നത്. മേയ് 14-15 തീയതികളിൽ നടന്ന വിദഗ്ധ സമിതി യോഗത്തിന്റെ ശുപാർശ പ്രകാരം, അന്തിമ പാരിസ്ഥിതിക അനുമതി ലഭിച്ചതോടെ കരാർ തയ്യാറാക്കി നിർമാണ പ്രവർത്തനങ്ങൾ ഉടൻ ആരംഭിക്കാനാകും.

പശ്ചിമഘട്ട മലനിരകളിലൂടെ കടന്നുപോകുന്ന ഈ തുരങ്കപാതയുടെ നിർമാണം പരിസ്ഥിതിക്ക് ദോഷകരമാകാതിരിക്കാൻ കർശനമായ നിർദേശങ്ങൾ പാലിക്കണമെന്ന് സമിതി വ്യക്തമാക്കി. സിഎസ്ഐആർ, സിഐഎംഎഫ്ആർ തുടങ്ങിയ സ്ഥാപനങ്ങൾ നൽകിയ നിർദേശങ്ങൾ പൂർണമായും നടപ്പാക്കണം. നിർമാണ സമയത്ത് സ്‌ഫോടനങ്ങൾ മൂലമുണ്ടാകാവുന്ന ആഘാതം, വൈബ്രേഷൻ, പ്രളയ സാധ്യത, ഭൂമിശാസ്ത്രപരമായ പഠനങ്ങൾ എന്നിവ പരിശോധിക്കണം. ഇതിനായി ആറ് മാസത്തിലൊരിക്കൽ പരിസ്ഥിതി മന്ത്രാലയത്തിന് റിപ്പോർട്ട് സമർപ്പിക്കണം.

നാല് ഗ്രൗണ്ട് വൈബ്രേഷൻ മോണിറ്ററിങ് സ്റ്റേഷനുകൾ സ്ഥാപിക്കണമെന്നും, മണ്ണിടിച്ചിൽ, വെള്ളപ്പൊക്കം തുടങ്ങിയ അപകടങ്ങൾ തടയാൻ ആവശ്യമായ സംവിധാനങ്ങൾ ഒരുക്കണമെന്നും നിർദേശമുണ്ട്. ജൈവവൈവിധ്യ സമ്പന്നമായ പശ്ചിമഘട്ടത്തിലെ ബാണാസുര ചിലപ്പൻ ഉൾപ്പെടെയുള്ള പക്ഷികളുടെയും വന്യമൃഗങ്ങളുടെയും സംരക്ഷണത്തിന് പ്രത്യേക നടപടികൾ സ്വീകരിക്കണം. അപ്പൻകാപ്പ് ആന ഇടനാഴിയുടെ സംരക്ഷണത്തിനായി സ്ഥിരമായ നിരീക്ഷണം ഉറപ്പാക്കാൻ ജില്ലാ കളക്ടർ ശുപാർശ ചെയ്യുന്ന നാലംഗ വിദഗ്ധ സമിതി രൂപീകരിക്കണം.

ഇരുവഴിഞ്ഞി പുഴയുടെ സ്വാഭാവിക ഒഴുക്കിനെ തടസ്സപ്പെടുത്താതെ നിർമാണം നടത്തണം. തുരങ്കത്തിനുള്ളിലെ വായുവിന്റെ ഗുണനിലവാരം തുടർച്ചയായി നിരീക്ഷിക്കാൻ സംവിധാനങ്ങളും ഒരുക്കണം. ഈ ഉപാധികൾ കർശനമായി പാലിക്കുന്നതോടെ, തുരങ്കപാത പദ്ധതി പരിസ്ഥിതി സൗഹൃദമായി നടപ്പാക്കാനാകുമെന്നാണ് വിദഗ്ധ സമിതിയുടെ വിലയിരുത്തൽ.