മലപ്പുറം: മലപ്പുറം കൂരിയാട് ദേശീയപാത തകര്‍ന്നതില്‍ വിദഗ്ധ സമിതി റിപ്പോര്‍ട്ട് പുറത്തു വന്നു.ഇടിഞ്ഞ ഭാഗത്തെ റോഡ് പൂര്‍ണ്ണമായും പുനര്‍ നിര്‍മ്മിക്കണമെന്ന് റിപ്പോര്‍ട്ടില്‍ ശിപാര്‍ശ ചെയ്യുന്നു. സമിതി  കേന്ദ്രത്തിന് റിപ്പോര്‍ട്ട് സമര്‍പ്പിച്ചു.  ഒരു കിലോമീറ്റര്‍ ദൂരം പൂര്‍ണമായും പുനര്‍ നിര്‍മ്മിക്കണമെന്ന് റിപ്പോര്‍ട്ടില്‍ പറയുന്നു. സ്ഥലത്തെ മണ്ണ് പരിശോധന ഫലപ്രദമായി നടന്നില്ലെന്നും ഡിസൈനില്‍ ഉള്‍പ്പെടെ പാളിച്ചയുണ്ടായി എന്നും റിപ്പോര്‍ട്ടില്‍ വിശദമാക്കുന്നു. കരാര്‍ ഏറ്റെടുത്ത നിര്‍മാണ കമ്പനി കെ.എന്‍.ആര്‍ കണ്‍സ്ട്രക്ഷന്‍സിന് വന്‍ വീഴ്ച സംഭവിച്ചെന്നും റിപ്പോര്‍ട്ടില്‍ പറയുന്നുണ്ട്. 

കേരളത്തിലെ ദേശീയപാതാ തകര്‍ച്ചയില്‍ കേന്ദ്രം നിയോഗിച്ച മൂന്നംഗ സമിതിയുടേതാണ് റിപ്പോര്‍ട്ട്. ഐ.ഐ.ടി പ്രൊഫസര്‍ കെ.ആര്‍ റാവുവിന്റെ നേതൃത്വത്തിലുള്ള സംഘമാണ് റിപ്പോര്‍ട്ട് സമര്‍പ്പിച്ചത്.

നിര്‍മാണ കമ്പനിയായ കെ.എന്‍.ആര്‍ കണ്‍സ്ട്രക്ഷനെതിരെ കേന്ദ്രം നടപടിയെടുത്തിരുന്നു. റോഡ് തകര്‍ന്നതിന് പിന്നാലെ കമ്പനിയെയും കണ്‍സള്‍ട്ടന്റായ ഹൈവേ എഞ്ചിനീയറിങ് കമ്പനിയേയും ഡീബാര്‍ ചെയ്തിരുന്നു.

അതിനിടെ ദേശീയപാത 66ലെ നിര്‍മാണ പ്രവര്‍ത്തി നടക്കുന്ന മലപ്പുറം കൂരിയാട് സംരക്ഷണ ഭിത്തി വീണ്ടും തകര്‍ന്നു. നേരത്തെ വലിയരീതിയിലുള്ള തകര്‍ച്ചയുണ്ടായ സ്ഥലത്തിന് സമീപത്തു തന്നെയാണ് വീണ്ടും സംരക്ഷണ ഭിത്തി പൊളിഞ്ഞിരിക്കുന്നത്. കനത്ത മഴക്കിടെ സംരക്ഷണ ഭിത്തിയുടെ ഒരു ഭാഗം പൂര്‍ണമായും പൊളിഞ്ഞ് സര്‍വിസ് റോഡിലേക്ക് പതിക്കുകയായിരുന്നു. പ്രദേശത്ത് കൂടുതല്‍ സ്ഥലങ്ങളില്‍ സര്‍വീസ് റോഡിന് വിള്ളല്‍ രൂപപ്പെട്ടിട്ടുണ്ട്. കനത്ത മഴ തുടരുന്നതിനാല്‍ തന്നെ സമീപത്തെ വയലുകളില്‍ വെള്ളം കയറിയിട്ടുമുണ്ട്.

കഴിഞ്ഞ ദിവസം നിര്‍മാണം പൂര്‍ത്തിയാകുന്ന ദേശീയപാതയിലെ കൂരിയാട് മേഖലയില്‍ റോഡിന്റെ ഒരു ഭാഗം ഇടിഞ്ഞ് താഴ്ന്ന് സര്‍വിസ് റോഡിലേക്ക് വീണിരുന്നു. കോഴിക്കോട് -തൃശൂര്‍ ദേശീയപാതയില്‍ കൊളപ്പുറത്തിനും കൂരിയാട് പാലത്തിനുമിടയിലായിരുന്നു അപകടമുണ്ടായത്. മൂന്ന് കിലോമീറ്ററിലധികം വയലിലൂടെ നിര്‍മാണം നടക്കുന്ന ദേശീയപാതയുടെ ഒരു കിലോമീറ്ററിലധികം ഭാഗമാണ് തകര്‍ന്നത്. പാത തകര്‍ന്നതോടെ കിഴക്ക് വശത്തെ സര്‍വിസ് റോഡും തകര്‍ന്നു.

An expert committee has recommended the complete reconstruction of a one-kilometer stretch of the Kooriyad national highway in Malappuram after it collapsed. The report blames faulty soil testing, design flaws, and serious lapses by KNR Constructions.