കാലിഫോർണിയ: മേജർ ലീഗ് സോക്കറിൽ ഇന്റർ മയാമിക്കൊപ്പം പുതിയ ചരിത്രം കുറിച്ച് അർജന്റൈൻ ഇതിഹാസം ലയണൽ മെസി. ഇന്റർ മയാമിക്ക് വേണ്ടി 50 ഗോൾ കോൺട്രിബ്യൂഷൻ നടത്തുന്ന ആദ്യ താരമായി മാറിയാണ് മെസി പുതിയ റെക്കോർഡ് സ്വന്തമാക്കിയത്. എംഎൽഎസ്സിൽ മോൺഡ്രിയലിനെതിരെയുള്ള മത്സരത്തിൽ നേടിയ ഇരട്ട ഗോളിന് പിന്നാലെയാണ് മെസി ഈ നേട്ടം കൈവരിച്ചത്. അമേരിക്കൻ ക്ലബ്ബിനുവേണ്ടി ഇതുവരെ 29 ഗോളുകളും 21 അസിസ്റ്റുകളും ആണ് മെസി സ്വന്തമാക്കിയിട്ടുള്ളത്. 

2023ലാണ് മെസി പാരീസ് സെയ്ന്റ് ജെർമെയ്ൻ വിട്ട് മേജർ ലീഗിലേക്ക് പോയത്. മെസിയുടെ വരവോടെ ഇന്റർ മയാമി വേണ്ടി മിന്നും പ്രകടനമാണ് നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതിന് പുറമെ സപ്പോർട്ടേഴ്‌സ് ഷീൽഡും മയാമി സ്വന്തമാക്കി. ഇപ്പോൾ വെറും രണ്ട് വർഷങ്ങൾ കൊണ്ട് ക്ലബ്ബിന്റെ എക്കാലത്തെയും മികച്ച താരമായി മാറാനും മെസിക്ക് സാധിച്ചിരിക്കുകയാണ്.  

അതേസമയം മത്സരത്തിൽ രണ്ടിനെതിരെ നാല് ഗോളുകൾക്കായിരുന്നു ഇന്റർ മയാമിയുടെ വിജയം. മയാമിക്കായി ലൂയി സുവാരസ് ഇരട്ട ഗോൾ നേടിയും തിളങ്ങി. മോൺഡ്രിയലിനായി ഡാൻറേ സീലി, വിക്ടർ ലോട്ടൂരി എന്നിവരാണ് ഗോളുകൾ നേടിയത്. 

മത്സരത്തിൽ 53 ശതമാനം ബോൾ പൊസഷൻ സ്വന്തമാക്കിയ ഇന്റർ മയാമി 14 ഷോട്ടുകളാണ് എതിരാളികളുടെ പോസ്റ്റിലേക്ക് അടിച്ചുകൂട്ടിയത്. ഇതിൽ നാല് ഷോട്ടുകളും ലക്ഷ്യത്തിലേക്ക് ആയിരുന്നു. മറുഭാഗത്ത് 11 ഷോട്ടുകളിൽ നിന്നും ആറ് ഷോട്ടുകൾ ഓൺ ടാർഗറ്റിലേക്ക് എത്തിക്കാൻ മോൺഡ്രിയലിന് സാധിച്ചു. 

നിലവിൽ മേജർ ലീഗ് സോക്കറിന്റെ പോയിന്റ് പട്ടികയിൽ ആറാം സ്ഥാനത്താണ് മെസിയും സംഘവും. 15 മത്സരങ്ങളിൽ നിന്നും ഏഴ് വിജയവും അഞ്ച് സമനിലയും മൂന്ന് തോൽവിയും അടക്കം 26 പോയിന്റാണ് ഇന്റർ മയാമിക്കുള്ളത്. ജനുവരി ഒന്നിന് കൊളംബസിനെതിരെയാണ് ഇന്റർ മയാമിയുടെ അടുത്ത മത്സരം. മയാമിയുടെ തട്ടകമായ ചെയ്സ് സ്റ്റേഡിയത്തിലാണ് മത്സരം നടക്കുക. 

Lionel Messi Create a Historical Record For Inter Miami in MLS