ദുബൈ: യുഎഇ ഉള്‍പ്പെടെയുള്ള ഗള്‍ഫ് രാഷ്ട്രങ്ങളില്‍ ഇക്കുറി ബലി പെരുന്നാളും വെള്ളിയാഴ്ചയും ഒന്നിച്ചാണ് എന്ന പ്രത്യേകതയുണ്ട്. ഈ വര്‍ഷത്തെ ഈദ് അല്‍ അദ്ഹ ജൂണ്‍ 6 വെള്ളിയാഴ്ചയാണ് ഉറപ്പിച്ചിരിക്കുന്നത്. ഈ സാഹചര്യത്തില്‍ ഈദ് നിസ്‌കാരവും ജുമുഅ നിസ്‌കാരവും വെവ്വേറെ നടത്തണമെന്ന് യുഎഇ ഫത്‌വ കൗണ്‍സില്‍ ഇന്നലെ പുറത്തിറക്കിയ പ്രസ്താവനയില്‍ വ്യക്തമാക്കി. ഇതുസംബന്ധിച്ച നിരവധി അന്വേഷണങ്ങളോട് പ്രതികരിക്കുകയായിരുന്നു കൗണ്‍സില്‍. 

രണ്ട് സന്ദര്‍ഭങ്ങളും ഒത്തുവരുമ്പോഴുള്ള നിസ്‌കാര നിര്‍വഹണത്തെ സംബന്ധിച്ച ദീര്‍ഘകാല പണ്ഡിത സംവാദത്തെ എടുത്തു പറഞ്ഞ കൗണ്‍സില്‍, രണ്ട് സംഘടിത നിസ്‌കാരങ്ങളും വെവ്വേറെ അതതിന്റെ പ്രാധാന്യത്തോടെ സ്വതന്ത്രമായി ആചരിക്കണമെന്ന് പ്രസ്താവനയില്‍ വിശദീകരിച്ചു.

വിശുദ്ധ ഖുര്‍ആന്‍ സൂക്തങ്ങളുടെയും പരിശുദ്ധ പ്രവാചകന്‍ മുഹമ്മദ് നബി(സ്വ)യുടെ അധ്യാപനങ്ങളുടെയും അടിസ്ഥാനത്തിലാണിത്. ഈ നിലപാടിനെ ഭൂരിഭാഗം ഇസ്‌ലാമിക പണ്ഡിതരും പിന്തുണയ്ക്കുന്നുണ്ടെന്നും അതിന്റെ നിയമ സാധുതയെ കൂടുതല്‍ സ്ഥിരീകരിക്കുന്നുവെന്നും കൗണ്‍സില്‍ കൂട്ടിച്ചേര്‍ത്തു.

നേരത്തെ ബലിപെരുന്നാളിനോടനുബന്ധിച്ച് യുഎഇയിലെ സ്വകാര്യ മേഖലയ്ക്കും പൊതുമേഖലയ്ക്കും അവധി പ്രഖ്യാപിച്ചിരുന്നു. പൊതുമേഖലയിലെന്നത് പോലെ നാലുദിവസത്തെ അവധിയാണ് സ്വകാര്യമേഖലയ്ക്കും മാനവവിഭവ, സ്വദേശിവത്കരണ മന്ത്രാലയം ഔദ്യോഗികമായി പ്രഖ്യാപിച്ചത്. രാജ്യത്തുടനീളമുള്ള മന്ത്രാലയങ്ങളും ഫെഡറല്‍ സ്ഥാപനങ്ങളും ജൂണ്‍ 5 വ്യാഴാഴ്ച (ദുല്‍ഹജ്ജ് 9) മുതല്‍ ജൂണ്‍ 8 ഞായറാഴ്ച (ദുല്‍ഹജ്ജ് 12) വരെ ആണ് അവധി. 

Both the Eid prayer and the Friday Jumu’ah prayer in UAE should be performed on time and in accordance with their Sunnah, even both fall on the same day, Emirates Fatwa Council clarified.