തിരുവനന്തപുരം: മുഖ്യമന്ത്രി പിണറായി വിജയന്‍ നാളെ കേന്ദ്ര മന്ത്രിമാരുമായി കൂടിക്കാഴച്ച നടത്തും. രണ്ട് ദിവസത്തെ ഔദ്യോഗിക മീറ്റിങ്ങുകള്‍ക്കായാണ് മുഖ്യമന്ത്രി ഡല്‍ഹിയിലെത്തുക. സംസ്ഥാനത്തെ വിവിധ പദ്ധതികളുമായി ബന്ധപ്പെട്ട ചര്‍ച്ചകളാണ് നടത്തുക. നാളെ കേന്ദ്ര റെയില്‍വേ മന്ത്രി അശ്വിനി വൈഷ്ണവുമായും, മറ്റന്നാള്‍ കേന്ദ്ര ഉപരിതല ഗതാഗത മന്ത്രി നിതിന്‍ ഗഡ്കരിയുമായും മുഖ്യമന്ത്രി കൂടിക്കാഴ്ച്ച നടത്തും. 

വയനാട് തുരങ്കപാതയ്ക്ക കേന്ദ്ര പരിസ്ഥിതി മന്ത്രാലയം അനുമതി നല്‍കിയ പശ്ചാത്തലത്തിലാണ് പുതിയ കൂടിക്കാഴ്ച്ചക്ക് കളമൊരുങ്ങുന്നത്. എല്‍ഡിഎഫ് സര്‍ക്കാരിന്റെ സ്വപ്‌ന പദ്ധതിയായ സില്‍വര്‍ ലൈന്‍ വീണ്ടും പൊടിതട്ടിയെടുക്കാനുള്ള നീക്കവും നടക്കുന്നുണ്ട്. പദ്ധതിക്ക് കേന്ദ്ര റെയില്‍വേ മന്ത്രാലയത്തിന്റെ അനുമതി വീണ്ടും തേടുമെന്നാണ് റിപ്പോര്‍ട്ട്.

ALSO READ: 34.07 കോടി രൂപയുടെ ആസ്തി; 20.06 കോടി രൂപയുടെ ബാധ്യത; പിവി അന്‍വറിന്റെ സ്വത്ത് വിവരങ്ങള്‍  Read more 

ഏറെ നാളത്തെ കാത്തിരിപ്പിനൊടുവിലാണ് വയനാട് തുരങ്കപാതയ്ക്ക് കേന്ദ്ര പരിസ്ഥിതി മന്ത്രാലയം അനുമതി നല്‍കിയത്. പരിസ്ഥിതിക്കും, സുരക്ഷയ്ക്കും മുന്‍ഗണന നല്‍കി 60ഓളം ഉപാധികളോടെയാണ് പദ്ധതിക്ക് അനുമതി നല്‍കിയിരിക്കുന്നത്. 

കോഴിക്കോട് ജില്ലയിലെ ആനക്കാംപൊയിലില്‍ നിന്ന് 22 കിലോമീറ്റര്‍ ദൂരത്തില്‍ വയനാട്ടിലെ മേപ്പാടിയിലേക്കാണ് പാത. നാലുവരിയിലായാണ് തുരങ്ക റോഡ് നിര്‍മിക്കുക. നിലവിലുള്ള ചുരം റോഡിന് ബദലായാണ് പുതിയ പാത നിര്‍മിക്കുന്നത്. ഇതോടെ വയനാട്ടിലേക്കുള്ള യാത്ര എളുപ്പവും, വേഗത്തിലുമാവുമെന്നാണ് വിലയിരുത്തല്‍.