മലപ്പുറം: നിലമ്പൂര്‍ ഉപതെരഞ്ഞെടുപ്പിലെ ബിജെപി നിലപാടിനെ രൂക്ഷമായി വിമര്‍ശിച്ച് അഖില ഭാരത് ഹിന്ദുമഹാസഭ സംസ്ഥാന പ്രസിഡന്റ് സ്വാമി ഭദ്രാനന്ദ. സനാതന ധര്‍മ്മത്തെ വിറ്റ് കാശാക്കുന്ന ബിജെപിക്കെതിരെയാണ് തങ്ങളുടെ പോരാട്ടമെന്നും, തോക്ക് സ്വാമി എന്നറിയപ്പെടുന്ന സ്വാമി ഭദ്രാനന്ദ പറഞ്ഞു. ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിനും, കേന്ദ്രമന്ത്രി സുരേഷ് ഗോപിക്കുമെതിരെ രൂക്ഷ വിമര്‍ശനമാണ് ഹിന്ദു മഹാസഭ നടത്തിയത്. 

നിലമ്പൂര്‍ ഉപതെരഞ്ഞെടുപ്പില്‍ ഹിന്ദു മഹാസഭ സ്ഥാനാര്‍ഥിയെ പ്രഖ്യാപിച്ച് മാധ്യമങ്ങളോടെ സംസാരിക്കുന്നതിനിടയിലാണ് പരാമര്‍ശം. നിലമ്പൂര്‍ സ്വദേശിയായ സതീഷ് എന്നയാളാണ് സ്ഥാനാര്‍ഥി. നിലമ്പൂരില്‍ ഹിന്ദു മഹാസഭയ്ക്ക് കിട്ടുന്ന ഓരോ വോട്ടും കപട ബിജെപിക്കാരുടെ മുഖത്ത് കിട്ടുന്ന അടിയായിരിക്കുമെന്ന് ഭദ്രാനന്ദ പറഞ്ഞു. 

'സുരേഷ് ഗോപിക്ക് പാര്‍ട്ടിയെന്താണെന്ന് അറിയില്ല. അദ്ദേഹത്തിന് ഇന്ത്യന്‍ രാഷ്ട്രീയത്തെക്കുറിച്ച് ഒന്നുമറിയില്ല. രാജീവ് ചന്ദ്രശേഖര്‍ പറഞ്ഞത് നിലമ്പൂരില്‍ മത്സരിക്കാന്‍ താല്‍പര്യമില്ലെന്നാണ്. ഇവിടെയുള്ളവരെന്താ അടിമകളോ, പട്ടികളോ ആണോ? 

അനാവശ്യ മത്സരമെന്ന വാക്കാണ് ചന്ദ്രശേഖറും, സുരേഷ് ഗോപിയും ഉപയോഗിച്ചത്. സുരേഷ് ഗോപിക്ക് മാധ്യമങ്ങളുടെ മെക്കിട്ട് കേറാനും, മസില്‍ പിടിച്ച് നടക്കാനും മാത്രമേ അറിയൂ. അതല്ല രാഷ്ട്രീയം. എഴുതിയ സ്‌ക്രിപ്റ്റ് പാര്‍ലമെന്റില്‍ പോയി വായിച്ചാല്‍ രാഷ്ട്രീയമാകില്ല. 

ബിജെപി ഗുരുജി ഗോള്‍വാര്‍ക്കറിന്റെ ഒരു ഐഡിയോളജിയും പിന്തുടരുന്നില്ല. സംഘപരിവാര്‍ എന്താണെന്നറിയാത്തവരും, ഓണ്‍ലൈന്‍ സംഘികളും കൂടെ സംഘത്തിന്റെ മഹത്വം നശിപ്പിച്ചിരിക്കുന്നു. എട്ടാം ക്ലാസ് മുതല്‍ സംഘത്തില്‍ പോവുന്നവനാണ് ഞാന്‍. എന്നാല്‍ ആ സംഘം അല്ല ഇന്നത്തെ സംഘം. ഹിന്ദു മഹാസഭയ്ക്ക് കിട്ടുന്ന ഓരോ വോട്ടും, ബിജെപിയുടെ മുഖത്ത് കിട്ടുന്ന അടിയാണ്.' സ്വാമി ഭദ്രാനന്ദ പറഞ്ഞു.