ഹൈദരാബാദ്: ഗസ്സയിൽ നടക്കുന്ന ഇസ്റഈൽ സൈനിക നടപടികളിൽ ടാറ്റയുടെ ഫാഷൻ റീട്ടെയിൽ ബ്രാൻഡായ സുഡിയോ പങ്കാളിയാണെന്ന് ആരോപിച്ച്, ഹൈദരാബാദിലെ സെക്കന്തരാബാദ് സുഡിയോ ഔട്ട്‌ലെറ്റിന് മുന്നിൽ ഇന്ത്യൻ പീപ്പിൾ ഇൻ സോളിഡാരിറ്റി വിത്ത് ഫലസ്തീൻ (ഐപിഎസ്പി) സംഘടനയുടെ നേതൃത്വത്തിൽ വൻ പ്രതിഷേധ പ്രകടനം. മെയ് 28 ബുധനാഴ്ച നടന്ന ഈ പ്രതിഷേധം, സുഡിയോ ബ്രാൻഡിനെ ബഹിഷ്കരിക്കണമെന്ന ദേശീയ പ്രചാരണത്തിന്റെ ഭാഗമായിരുന്നു.

ഡൽഹി, പൂനെ, മുംബൈ, പട്ന, വിശാഖപട്ടണം, ചണ്ഡീഗഢ്, റോഹ്തക്, വിജയവാഡ തുടങ്ങിയ നഗരങ്ങളിലും ഇസ്റഈലുമായി ബന്ധമുള്ള ടാറ്റയുടെ അനുബന്ധ കമ്പനികളെ ബഹിഷ്കരിക്കണമെന്ന് ആവശ്യപ്പെട്ട് സമാനമായ പ്രതിഷേധങ്ങളും അരങ്ങേറി. ഹൈദരാബാദിൽ, പ്രതിഷേധക്കാർ സർഗ്ഗാത്മക പ്ലക്കാർഡുകളും ബാനറുകളും പ്രദർശിപ്പിക്കുകയും, ഫലസ്തീനിലെ മരണവും നാശവും ഉയർത്തിക്കാട്ടി തെരുവ് നാടകങ്ങൾ അവതരിപ്പിക്കുകയും ചെയ്തു. 

സുഡിയോയിൽ ഷോപ്പിംഗ് നടത്തുന്നതിലൂടെ, ഇന്ത്യൻ ഉപഭോക്താക്കൾ ഫലസ്തീനികൾക്കെതിരായ ഇസ്രായേലിന്റെ ക്രൂരമായ നടപടികളിൽ പരോക്ഷമായി പങ്കാളികളാകുന്നു," ഐപിഎസ്പി അംഗങ്ങൾ സമ്മേളനത്തിൽ വ്യക്തമാക്കി. 2016-ൽ ആരംഭിച്ച്, ടാറ്റ ഗ്രൂപ്പിന്റെ ട്രെന്റ് ലിമിറ്റഡിന്റെ ഉടമസ്ഥതയിലുള്ള സുഡിയോ, ഇന്ത്യയിൽ 750-ലധികം ഔട്ട്‌ലെറ്റുകൾ പ്രവർത്തിപ്പിക്കുകയും മിഡിൽ ഈസ്റ്റിലേക്ക് വ്യാപനം ആരംഭിക്കുകയും ചെയ്തിട്ടുണ്ട്.

ഐപിഎസ്പിയുടെ ആരോപണ പ്രകാരം, ടാറ്റ ഗ്രൂപ്പിന്റെ ഇസ്റഈലുമായുള്ള സാമ്പത്തിക, പ്രതിരോധ സഹകരണങ്ങൾ, ഇസ്റഈലിന്റെ സൈനിക പ്രവർത്തനങ്ങളിലും നിരീക്ഷണ സംവിധാനങ്ങളിലും നേരിട്ടുള്ള പങ്കാളിത്തത്തിന് തുല്യമാണ്. "ഫലസ്തീനിലെ അധിനിവേശവും വംശഹത്യയും സാധ്യമാക്കുന്ന കമ്പനികളെയും വ്യക്തികളെയും ബഹിഷ്കരിക്കാനുള്ള ആഗോള ബിഡിഎസ് (ബോയ്കോട്ട്, ഡിവെസ്റ്റ്മെന്റ്, സാങ്ഷൻസ്) ആഹ്വാനത്തെ പിന്തുണയ്ക്കണമെന്നും ഐപിഎസ്പി ആവശ്യപ്പെട്ടു.