ഐപിഎല്ലിൽ പുതിയ റെക്കോർഡ് സ്വന്തമാക്കി പഞ്ചാബ് കിങ്‌സ് നായകൻ ശ്രേയസ് അയ്യർ. രണ്ടാം ക്വാളിഫയർ പോരാട്ടത്തിൽ മുംബൈ ഇന്ത്യൻസിനെതിരെയുള്ള തകർപ്പൻ പ്രകടനങ്ങൾക്ക് പിന്നാലെയാണ് അയ്യർ ഈ നേട്ടം കൈവരിച്ചത്. മത്സരത്തിൽ അയ്യർ 41 പന്തിൽ 87 റൺസ് നേടിയാണ് തിളങ്ങിയത്. അഞ്ചു ഫോറുകളും എട്ട് കൂറ്റൻ സിക്സുകളും അടങ്ങുന്നതായിരുന്നു അയ്യരിന്റെ ഇന്നിംഗ്സ്.

ഇതോടെ ഐപിഎല്ലിൽ നോക്കൗട്ടിലെ ഒരു മത്സരത്തിൽ ഏറ്റവും കൂടുതൽ സിക്സറുകൾ നേടുന്ന ക്യാപ്റ്റനായി മാറാനും അയ്യരിന് സാധിച്ചു. ആദം ഗിൽക്രിസ്റ്റ്, കെഎൽ രാഹുൽ, എംഎസ് ധോണി എന്നിവരെയാണ് അയ്യർ മറികടന്നത്. മൂന്ന് താരങ്ങളും അഞ്ചു സിക്സുകളാണ് നോക്കൗട്ട് മത്സരത്തിൽ നേടിയിട്ടുള്ളത്. 2009 സീസണിൽ ഡൽഹിക്കെതിരെയാണ് ഗിൽക്രിസ്റ്റ് അഞ്ചു സിക്സുകൾ നേടിയത്. ധോണി 2013ൽ മുംബൈക്കെതിരെയും രാഹുൽ 2022ൽ ബെംഗളൂരുവിനെതിരെയുമാണ് അഞ്ചു സിക്സുകൾ സ്വന്തമാക്കിയത്. 

മത്സരത്തിൽ അഞ്ചു വിക്കറ്റുകൾക്കാണ് പഞ്ചാബ് വിജയിച്ചത്. ആദ്യം ബാറ്റ് ചെയ്ത മുംബൈ ആറ് വിക്കറ്റ് നഷ്ടത്തിൽ 203 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ പഞ്ചാബ് 19 ഓവറിൽ അഞ്ചു വിക്കറ്റ് നഷ്ടത്തിൽ ലക്ഷ്യം മറികടക്കുകയായിരുന്നു. നീണ്ട 11 വർഷങ്ങൾക്ക് ശേഷമാണ് പഞ്ചാബ് കിങ്‌സ് ഐപിഎൽ ഫൈനലിലേക്ക് മുന്നേറുന്നത്. 

മത്സരത്തിൽ അയ്യരിന് പുറമെ പഞ്ചാബിനായി നെഹാൽ വധേര 29 പന്തിൽ 48 റൺസും ജോഷ് ഇൻഗ്ലിസ് 21 പന്തിൽ 38 റൺസും നേടി ടീമിന്റെ വിജയത്തിൽ നിർണായകമായി.  

നേരത്തെ ആദ്യം ബാറ്റ് ചെയ്ത മുംബൈക്കായി സൂര്യകുമാർ യാദവ്, തിലക് വർമ്മ എന്നിവർ 44 റൺസ് നേടി മികച്ച പ്രകടനമാണ് നടത്തിയത്. 26 പന്തിൽ 44 റൺസാണ് സ്‌കൈ അടിച്ചെടുത്തത്. നാല് ഫോറുകളും മൂന്ന് സിക്സുകളും ആണ് താരത്തിന്റെ ബാറ്റിൽ നിന്നും പിറന്നത്.  തിലക് വർമ്മ 29 പന്തിൽ രണ്ട് വീതം ഫോറുകളും സിക്സുകളും ഉൾപ്പടെ 44 റൺസും നമൻ ധിർ 18 പന്തിൽ 37 റൺസും നേടി.

പഞ്ചാബ് ബൗളിങ്ങിൽ അസ്മത്തുള്ള ഒമർസായി രണ്ട് വിക്കറ്റുകളും  യുസ്‌വേന്ദ്ര ചഹൽ, വൈശാഖ് വിജയ്‌കുമാർ, മാർക്കസ് സ്റ്റോണിസ്, കൈൽ ജാമിസൺ എന്നിവർ ഓരോ വിക്കറ്റും സ്വന്തമാക്കി.