തിരുവനന്തപുരം: കാലവർഷക്കെടുതിക്കൊപ്പം സംസ്ഥാനം ഇപ്പോൾ പകർച്ചവ്യാധിയുടെ ഭീഷണിയിലേക്ക്. സംസ്ഥാനത്ത് പനി ബാധിതരുടെ എണ്ണം വർധിക്കുന്നതായാണ് റിപ്പോർട്ടുകൾ. പ്രതിദിന പനിബാധിതരുടെ എണ്ണം എണ്ണായിരം കടന്നു. സർക്കാർ ആശുപത്രിയിലെ മാത്രം പനി ബാധിതരുടെ എണ്ണമാണ് എണ്ണായിരം കടന്നത്. സ്വകാര്യ ആശുപത്രികളിലെയും ക്ലിനിക്കുകളിലെയും കണക്കെടുക്കുമ്പോൾ ഇത് പലമടങ്ങ് വർധിക്കും. ഡെങ്കിപ്പനി, എലിപ്പനി കേസുകളിലും വർധനയുണ്ട്. 

ഒരു മാസത്തിനിടെ സംസ്ഥാനത്ത് 11 പേർ എലിപ്പനി ബാധിച്ച് മരിച്ചു. ആറു പേരാണ് ഡെങ്കിപ്പനി ബാധിച്ച് മരിച്ചത്. ഈ മാസം മാത്രം പനി ബാധിച്ച് 20 പേരാണ് മരിച്ചത്. അഞ്ചുമാസത്തിനിടെ സംസ്ഥാനത്ത് എഴുപത് മരണങ്ങൾ റിപ്പോർട്ട് ചെയ്തു. മഴയെ തുടർന്ന് ക്യാമ്പുകളിൽ കഴിയുന്നവർ ഉൾപ്പെടെ ജാഗ്രത പാലിക്കണമെന്ന് ആരോഗ്യവകുപ്പ് അറിയിച്ചു. 

മലിനജലത്തിലൂടെയും വായുവിലൂടെയും പടരുന്നതും കൊതുക് പരത്തുന്നതുമായ രോഗങ്ങളാണ് ഈ കാലാവസ്ഥയിൽ ഭീഷണിയായി ഉള്ളത്. ഈ സാഹചര്യത്തിൽ, പകര്‍ച്ചവ്യാധികള്‍ക്കെതിരെ ജാഗ്രത പുലർത്തണമെന്ന് ആരോഗ്യവകുപ്പ് നിര്‍ദേശം നല്‍കി. ആരോഗ്യകേന്ദ്രങ്ങളില്‍ മരുന്നുകളുടെ ലഭ്യത ഉറപ്പാക്കാനും ബന്ധപ്പെട്ടവർക്ക്  നിർദേശം നൽകിയിട്ടുണ്ട്.

അതേസമയം, കനത്ത മഴയെ തുടർന്ന് സംസ്ഥാനത്തെ നദികളിൽ ജലനിരപ്പ് അപകടകരമായി ഉയരുന്ന സാഹചര്യത്തിൽ പ്രളയ സാധ്യതാ മുന്നറിയിപ്പ് പുറപ്പെടുവിച്ചു. അച്ചൻകോവിൽ, മണിമല, ഉപ്പള നദികളിൽ ഓറഞ്ച് അലേർട്ട് പ്രഖ്യാപിച്ചിരിക്കുകയാണ്. കണ്ണൂർ പെരുമ്പ, കാസർഗോഡ് ചന്ദ്രഗിരി, ഷിറിയ നദികളിലും, കോട്ടയം മീനച്ചിലാറിലും മഞ്ഞ അലേർട്ട് നൽകിയിട്ടുണ്ട്.