ബെംഗളുരു: ആര്‍സിബിയുടെ ഐപിഎല്‍ 2025ലെ കിരീടനേട്ടത്തോടനുബന്ധിച്ച് നടന്ന വിജയാഘോഷത്തിനിടെ ഉണ്ടായ തിക്കിലും തിരക്കിലും പെട്ട് 6 പേര്‍ മരിച്ചതായി റിപ്പോര്‍ട്ടുകള്‍. ബംഗളുരുവിലെ ചിന്നസ്വാമി സ്റ്റേഡിയത്തിനു സമീപത്താണ് അപകടമുണ്ടായത്. തിക്കിലും തിരക്കിലും പെട്ട് 25ഓളം പേര്‍ക്ക് ഗുരുതരമായി പരുക്കേറ്റതായാണ് വിവരം.

ആയിരക്കണക്കിന് ക്രിക്കറ്റ് പ്രേമികള്‍ വിവിധ ഗേറ്റുകളിലൂടെ തിടുക്കത്തില്‍ സ്റ്റേഡിയത്തിലേക്ക് പ്രവേശിക്കാന്‍ ശ്രമിച്ചതാണ് അപകടത്തിന് കാരണമായത്. സ്ഥലത്തുണ്ടായിരുന്ന പൊലിസ് പരുക്കേറ്റവരെ ആംബുലന്‍സുകളില്‍ കയറ്റി അടുത്തുള്ള ബൗറിംഗ് ആശുപത്രിയിലേക്ക് മാറ്റി.

ALSO READ: ഐപിഎൽ ചരിത്രം തിരുത്തിക്കുറിച്ച് കന്നി കിരീടത്തിൽ മുത്തമിട്ട് ആർസിബി; പഞ്ചാബിനെ തകർത്തത് 6 റൺസിന്

റോഡുകളിലെ തിരക്ക് കാരണം ആംബുലന്‍സുകള്‍ക്ക് വേഗത്തില്‍ ആശുപത്രിയിലേക്ക് പോകാന്‍ കഴിഞ്ഞില്ലെന്ന് പൊലിസ് പറഞ്ഞു. 

നിരവധി പൊലിസുകാര്‍ സംഭവ സ്ഥലത്ത് ഉണ്ടായിരുന്നെങ്കിലും ജനക്കൂട്ടത്തെ നിയന്ത്രിക്കാന്‍ പാടുപെടുകയായിരുന്നു. ആഘോഷം കാണാന്‍ ആളുകള്‍ മരങ്ങളില്‍ കയറുന്നതും ചില്ലകളില്‍ ഇരിക്കുന്നതും വീഡിയോകളില്‍ കാണാം. സംഭവത്തെക്കുറിച്ചുള്ള കൂടുതല്‍ വിവരങ്ങള്‍ ഇതുവരെ പുറത്തുവന്നിട്ടില്ല.

സുരക്ഷാ കാരണങ്ങള്‍ ചൂണ്ടിക്കാട്ടി വിധാന്‍ സൗധയില്‍ നിന്ന് ചിന്നസ്വാമി ക്രിക്കറ്റ് സ്റ്റേഡിയത്തിലേക്കുള്ള വിജയാഘോഷ പരേഡ് കര്‍ണാടക സര്‍ക്കാര്‍ നേരത്തെ റദ്ദാക്കിയിരുന്നു. ചൊവ്വാഴ്ച രാത്രി മുതല്‍ ആഘോഷവേളയില്‍ ജനക്കൂട്ടത്തെ നിയന്ത്രിക്കുന്നുണ്ടെന്ന് പൊലിസ് പറഞ്ഞു. 

സര്‍ക്കാര്‍ സംഘടിപ്പിച്ച അനുമോദന പരിപാടി കാണാന്‍ വിധാന്‍ സൗധ പരിസരത്ത് വന്‍ ജനക്കൂട്ടമാണ് തടിച്ചുകൂടിയിരിക്കുന്നത്. ജനക്കൂട്ടത്തെ നിയന്ത്രിക്കാന്‍ പൊലിസിന് ലാത്തി വീശേണ്ടി വന്നു. കര്‍ണാടക ഉപമുഖ്യമന്ത്രി ഡികെ ശിവകുമാര്‍ ബുധനാഴ്ച എച്ച്എഎല്‍ വിമാനത്താവളത്തില്‍ നേരിട്ടെത്തിയാണ് ആര്‍സിബി ടീമിനെ സ്വീകരിച്ചത്. 

A tragic stampede during Royal Challengers Bangalore’s IPL victory celebration claimed 7 lives and left 25 injured. The incident occurred amid overcrowding and lack of crowd control measures.