തിരുവനന്തപുരം: തലസ്ഥാനത്തെ ഗവൺമെന്റ് കണ്ണാശുപത്രിയിൽ ചികിത്സാപിഴവ് വരുത്തിയ ഡോക്ടറെ സസ്‌പെൻഡ് ചെയ്തു. രോഗവുമായി എത്തിയ സ്ത്രീയുടെ ഇടത് കണ്ണിന് നൽകേണ്ട ചികിത്സ വലത് കണ്ണിന് മാറി നൽകിയ സംഭവത്തിലാണ് നടപടി. അസി. പ്രഫ എസ്.എസ് സുജീഷിനെയാണ് അന്വേഷണ വിധേയമായി അധികൃതർ സസ്പെൻഡ് ചെയ്തത്. കണ്ണിന്റെ നീർക്കെട്ട് കുറയാൻ നൽകേണ്ട കുത്തിവെപ്പ് ആണ് കണ്ണ് മാറി നൽകിയത്.

തിരുവനന്തപുരം ഭീമാപള്ളി സ്വദേശിയായ അസൂറാബീബി എന്ന 55കാരിക്കാണ് ഡോക്ടറുടെ അനാസ്ഥമൂലം തെറ്റായ ചികിത്സ ലഭിച്ചത്. കാഴ്ചക്ക് മങ്ങലുണ്ടായതിനെ തുടർന്നാണ് അസൂറാബീബീ ചികിത്സ തേടിയത്. ഒരുമാസമായി ഇവർ ആശുപത്രിയിൽ ചികിത്സ തേടുന്നുണ്ട്. ചൊവ്വാഴ്ച ഇവർക്ക് ശസ്ത്രക്രിയ നിശ്ചയിച്ചിരുന്നു. എന്നാൽ ശസ്ത്രക്രിയക്ക് മുന്നോടിയായി നൽകുന്ന കുത്തിവെപ്പാണ് കണ്ണ് മാറി നൽകിയത്. 

അതേസമയം, രോഗിയുടെ ആരോഗ്യനിലയിൽ നിലവിൽ ഗുരുതരമായ പ്രശ്നമില്ല. എന്നാൽ, ഡോക്ടറുടെ ഭാഗത്ത് നിന്നുണ്ടായത് ഗുരുതര വീഴ്ചയാണെന്നാണ് ആരോഗ്യവകുപ്പിൻറെ കണ്ടെത്തൽ. ഇതിന് പിന്നാലെയാണ് സസ്‌പെൻഷൻ നൽകിയത്. രോഗിയുടെ കുടുംബം പൊലിസിൽ പരാതി നൽകുകയും ചെയ്തിട്ടുണ്ട്.