കൊച്ചി: രാഹുല്‍ മാങ്കൂട്ടത്തില്‍ പി.വി അന്‍വര്‍ കൂടിക്കാഴ്ചയില്‍ കോണ്‍ഗ്രസ് നേതാക്കള്‍ക്ക് ഭിന്നാഭിപ്രായം. പി.വി അന്‍വറിനെ കാണാന്‍ പാടില്ലായിരുന്നുവെന്നാണ് പ്രതിപക്ഷ നേതാവ് വി.ഡി സതീശന്‍ പ്രതികരിച്ചത്. അന്‍വറിനെ കാണാന്‍ രാഹുലിനെ ചുമതലപ്പെടുത്തിയിട്ടില്ല. രാഹുലിന്റെ ഭാഗത്ത് നിന്ന് ഉണ്ടായത് തെറ്റായ നടപടിയാണെന്നും  പ്രതിപക്ഷ നേതാവ് ചൂണ്ടിക്കാട്ടി.  പി.വി അന്‍വറിന്റെ വിഷയം പാര്‍ട്ടി അവസാനിപ്പിച്ചതാണെന്ന് ചൂണ്ടിക്കാടിടയ അദ്ദേഹം അതിനായി തന്നെയാണ് ചുമതലപ്പെടുത്തിയതെന്നും കൂട്ടിച്ചേര്‍ത്തു.

പി.വി അന്‍വറിന് മുന്നില്‍ യു.ഡി.എഫിന്റെ വാതിലുകള്‍ അടച്ചുവെന്നും വി.ഡി സതീശന്‍ വ്യക്തമാക്കി. ഒരു കോണ്‍ഗ്രസ് നേതാവും അന്‍വറിനെ കാണാന്‍ പാടില്ല. രാഹുലിനെ സംഘടനാപരമായല്ലാതെ ശാസിക്കുമെന്നും അദ്ദേഹം പറഞ്ഞു. 

നിലമ്പൂരിലും ബി.ജെ.പി-സി.പി.എം കൂട്ടുകെട്ട് വ്യക്തമാണെന്നും ഇതിനാലാണ് ആദ്യം ബി.ജെ.പി സ്ഥാനാര്‍ഥിയെ നിശ്ചയിക്കാതിരുന്നതെന്നും അദ്ദേഹം ആരോപിച്ചു.  പിന്നീട് വലിയ പ്രതിഷേധമുണ്ടായപ്പോഴാണ് ബി.ജെ.പി സ്ഥനാര്‍ഥിയെ തീരുമാനിച്ചതെന്നും അദ്ദേഹം ചൂണ്ടിക്കാട്ടി. 
 കോണ്‍ഗ്രസിന് ഏറ്റവും ശക്തമായ അടിത്തറയുള്ള മണ്ഡലമാണ് നിലമ്പൂരെന്ന് ചൂണ്ടിക്കാട്ടിയ പാലക്കാടിനേക്കാളും വലിയ സംഘടനാശേഷി കോണ്‍ഗ്രസിന് നിലമ്പൂരുണ്ടെന്നും വലിയ ഭൂരിപക്ഷത്തില്‍ യു.ഡി.എഫ് വിജയിക്കുമെന്നും കൂട്ടിച്ചേര്‍ത്തു. 

സന്ദര്‍ശനം തീര്‍്തതും വ്യക്തിപരമാണെന്ന് കെ.പി.സി.സി പ്രസിഡന്റ് സണ്ണിജോസഫ് ചൂണ്ടിക്കാട്ടി. അടച്ച വാതില്‍ തുറക്കില്ലെന്നായിരുന്നു പ്രതിപക്ഷ നേതാവ് പറഞ്ഞതെങ്കില്‍ രാഷ്ട്രീയത്തില്‍ തുറക്കാത്ത വാതിലുകള്‍ ഇല്ലെന്നായിരുന്നു പാര്‍ട്ടി അധ്യക്ഷന്റെ പ്രതികരണം. 

രാഹുല്‍ മാങ്കൂട്ടത്തില്‍ കൂടിക്കാഴ്ച നടത്തിയത് തികച്ചും വ്യക്തിപരമെണ് കെ. മുരളീധരനും പ്രതികരിച്ചത്. അതില്‍ തെറ്റുണ്ടെന്ന് തോന്നുന്നില്ലെന്നും അദ്ദേഹം കൂട്ടിച്ചേര്‍ത്തു. അന്‍വര്‍ മത്സരിക്കരുതെന്ന് രാഹുല്‍ വ്യക്തിപരമായി പറഞ്ഞു കാണും. അതിനെ ആ രീതിയില്‍ മാത്രം കണ്ടാല്‍ മതി. ഏതെങ്കിലും ദൗത്യം പൂര്‍ത്തീകരിക്കാന്‍ വേണ്ടിയല്ല രാഹുല്‍ പോയതെന്നും മുരളീധരന്‍ മാധ്യമങ്ങളോട് പറഞ്ഞു.

'അന്‍വറിന് അദ്ദേഹത്തിന്റെ നിലപാട് പുനഃപരിശോധിക്കാന്‍ ഒരുപാട് സമയമുണ്ട്. രാഹുല്‍ പി.വി. അന്‍വറിനെ കണ്ടതില്‍ തെറ്റ് കാണുന്നില്ല. സുഹൃത്തിനെ കണ്ടു എന്ന രീതിയിലെടുത്താല്‍ മതി. അന്‍വറിനോട് മത്സരിക്കരുത്, സഹകരിക്കണം എന്ന് പറഞ്ഞുകാണും. യു.ഡി.എഫ് സ്ഥാനാര്‍ഥിക്ക് പിന്തുണ പ്രഖ്യാപിച്ചു കഴിഞ്ഞാല്‍ ചിലത് മറക്കേണ്ടിവരും. അത് സ്വാഭാവികമാണ്' -മുരളീധരന്‍ ചൂണ്ടിക്കാട്ടി. 

സന്ദര്‍ശനം വിവാദമായതിന് പിന്നാലെ രാഹുല്‍ വിശദീകരണം നല്‍കിയിരുന്നു.  പാര്‍ട്ടി ചുമതലപ്പെടുത്തിയിട്ടല്ല അന്‍വറിന്റെ വീട്ടില്‍ പോയതെന്നും പിണറായിസത്തിനെതിരായ പോരാട്ടത്തില്‍ യു.ഡി.എഫിനെ പിന്തുണക്കണമെന്നാണ് അദ്ദേഹത്തോട് ആവശ്യപ്പെട്ടതെന്നുമാണ് രാഹുല്‍ വിശദീകരിച്ചത്.