കോഴിക്കോട്: മെഡി. കോളജിലെ അത്യാഹിത വിഭാഗത്തിൽ തീപിടിത്തമുണ്ടായി ഒരുമാസം പിന്നിട്ടെങ്കിലും ഇതുവരെ അത്യാഹിത വിഭാഗം പ്രവർത്തന സജ്ജമായിട്ടില്ല. നിന്നുതിരിയാൻ ഇടമില്ലാത്ത പഴയ കാഷ്വാലിറ്റിയിലാണ് രോഗികളെ പരിശോധിക്കുന്നത്.

കഴിഞ്ഞ മെയ് രണ്ടിനാണ് പി.എം.എസ്.എസ്.വൈ കോംപ്ലക്സിൽ പ്രവർത്തിക്കുന്ന അത്യാഹിത വിഭാഗത്തിലെ യു.പി.എസ് റൂമിൽ തീപിടിച്ചത്. 37 ഓളം ബാറ്ററികൾ കത്തിനശിച്ചിരുന്നു. തുടർന്ന് ഒരുദിവസം ബീച്ച് ആശുപത്രിയിൽ അത്യാഹിതവിഭാഗം പ്രവർത്തിച്ചു. ശേഷം മെഡി. കോളജ് എൻ.എം.സി.എച്ച് ബ്ലോക്കിനോട് ചേർന്ന പഴയ അത്യാഹിത വിഭാഗത്തിലേക്ക് മാറ്റി. നിലവിൽ പ്രവർത്തിക്കുന്നത് ഇവിടെത്തന്നെയാണ്. 

മെയ് അഞ്ചിന് വീണ്ടും തീപിടിത്തമുണ്ടായി. തൊട്ടടുത്ത ദിവസം ഓപറേഷൻ തീയറ്റർ ഉദ്ഘാടനം ചെയ്യാനിരിക്കെയാണ് വീണ്ടും അഗ്നിബാധയുണ്ടായത്. ലക്ഷങ്ങളുടെ നഷ്ടമുണ്ടായി. തുടർന്ന് അന്വേഷണത്തിനായി വിവിധ ഏജൻസികളെ ചുമതലപ്പെടുത്തിയിരുന്നു. അഗ്നിരക്ഷാസേന, പി.ഡബ്ലു.ഡി ഇലക്ട്രിക്കൽ വിഭാഗം, ഇലക്ടിക്കൽ ഇൻസ്പെക്ടറേറ്റ്, ഫോറൻസിക് വിഭാഗം, പൊലിസ് എന്നിവക്ക് പുറമെ ആരോഗ്യവകുപ്പ് മന്ത്രി പ്രഖ്യാപിച്ച അഞ്ചംഗ മെഡിക്കൽ സംഘവും പരിശോധന നടത്തി. അതിനിടെ തീപിടിത്ത സമയത്ത് അഞ്ചുപേർ മരിച്ച സംഭവം തീപിടിത്ത സമയത്ത് ചികിത്സാ പിഴവിനെ തുടർന്നാണെന്ന് ആരോപണമുയർന്നിരുന്നു. മരിച്ച നാലുപേരുടെയും പോസ്റ്റ്മോർട്ടം റിപ്പോർട്ടും അഞ്ചംഗ സമിതി പരിശോധിച്ചു. 

അതേസമയം ആശുപത്രിയിലെ വേണ്ടത്ര പരിജ്ഞാനമില്ലാത്തവർ മെഷീനുകൾ കൈകാര്യം ചെയ്തതാണ് സംഭവത്തിന് കാരണമെന്ന് നിർമാണ പ്രവർത്തനത്തിന് നേതൃത്വം നൽകിയ എച്ച്.എൽ.എൽ കമ്പനി അധികൃതർ പരാതിപ്പെട്ടിരുന്നു. സംഭവത്തെ തുടർന്ന് സമഗ്രാന്വേഷണം ആവശ്യപ്പെട്ട് പ്രതിപക്ഷ സംഘടനകൾ മെഡി. കോളജിലേക്ക് മാർച്ച് നടത്തിയിരുന്നു.

A month after the fire incident, the Emergency Department of Kozhikode Medical College remains non-operational. Patients are being redirected to other departments, causing inconvenience and delays in critical care services.