ന്യൂഡൽഹി: ഇന്ത്യയിൽ ഇലക്ട്രിക് വാഹനങ്ങൾ നിർമ്മിക്കാൻ ടെസ്‌ലയ്ക്ക് താൽപ്പര്യമില്ലെന്നും, ഷോറൂമുകൾ സ്ഥാപിക്കുക മാത്രമാണ് കമ്പനിയുടെ ലക്ഷ്യമെന്നും കേന്ദ്ര ഘനവ്യവസായ മന്ത്രി എച്ച്.ഡി. കുമാരസ്വാമി പറഞ്ഞു. ഇലോൺ മസ്‌കിന്റെ നേതൃത്വത്തിലുള്ള ടെസ്‌ല, ഇന്ത്യൻ ഇലക്ട്രിക് കാർ വിപണിയിൽ പ്രവേശിക്കാനുള്ള ഒരുക്കങ്ങൾ നടത്തുന്നുണ്ടെങ്കിലും, അടുത്തിടെയൊന്നും ഇന്ത്യയിൽ വാഹന ഉൽപ്പാദനം ആരംഭിക്കാനുള്ള പദ്ധതികളൊന്നും കമ്പനിക്കില്ലെന്ന് മന്ത്രി വ്യക്തമാക്കി. 

ഇന്ത്യയുടെ ഇലക്ട്രിക് വാഹന നിർമ്മാണ പദ്ധതിയിൽ ടെസ്‌ലയുടെ പങ്കാളിത്തം വളരെ കുറവാണെന്ന് ഒരു സർക്കാർ ഉദ്യോഗസ്ഥൻ വെളിപ്പെടുത്തി. പ്രാരംഭ ചർച്ചകളിൽ ടെസ്‌ലയുടെ പ്രതിനിധി പങ്കെടുത്തെങ്കിലും, തുടർന്നുള്ള രണ്ടും മൂന്നും ഘട്ട ചർച്ചകളിൽ നിന്ന് കമ്പനി വിട്ടുനിന്നു. ഇലക്ട്രിക് വാഹന നിർമ്മാണത്തെ പ്രോത്സാഹിപ്പിക്കുന്നതിനായി കേന്ദ്രസർക്കാർ അന്തിമമാക്കിയ മാർഗനിർദേശങ്ങൾ പ്രകാരം, മെഴ്‌സിഡസ് ബെൻസ്, സ്കോഡ-ഫോക്‌സ്‌വാഗൺ, ഹ്യുണ്ടായ്, കിയ തുടങ്ങിയ ആഗോള വാഹന നിർമ്മാതാക്കൾ ഇന്ത്യയിൽ നിക്ഷേപം നടത്താൻ താൽപ്പര്യം പ്രകടിപ്പിച്ചിട്ടുണ്ട്.

 

 

2024 മാർച്ചിൽ അവതരിപ്പിച്ച ഇലക്ട്രിക് വാഹന നയം, പ്രാദേശിക നിർമ്മാണ പ്രതിബദ്ധതകൾക്ക് പകരമായി 15 ശതമാനം കുറഞ്ഞ ഇറക്കുമതി തീരുവയിൽ പ്രതിവർഷം 8,000 വാഹനങ്ങൾ ഇറക്കുമതി ചെയ്യാൻ കമ്പനികളെ അനുവദിക്കുന്നു. മൂന്ന് വർഷത്തിനുള്ളിൽ 4,150 കോടി രൂപയുടെ നിക്ഷേപത്തോടെ ഇന്ത്യയിൽ വാഹന നിർമാണം ആരംഭിക്കണമെന്നാണ് നിബന്ധന. എന്നാൽ, ഈ പദ്ധതിയിൽ ടെസ്‌ല പങ്കെടുക്കുന്നില്ലെന്നാണ് മന്ത്രിയുടെ പ്രസ്താവന വ്യക്തമാക്കുന്നത്.

“ഇന്ത്യയിൽ ഫാക്ടറി സ്ഥാപിക്കുന്നത് യുഎസിനോട് കാണിക്കുന്ന അന്യായമാകുമെന്ന് യുഎസ് പ്രസിഡന്റ് ഡൊണാൾഡ് ട്രംപ് നേരത്തെ പറഞ്ഞിരുന്നു. ഇലോൺ മസ്‌ക്, ട്രംപിന്റെ 2024 പ്രസിഡന്റ് തെരഞ്ഞെടുപ്പ് പ്രചാരണത്തിന് വലിയ സംഭാവന നൽകിയവരിൽ ഒരാളാണ്.

മുംബൈയിലെ ബാന്ദ്ര കുർള കോംപ്ലക്സിൽ ഷോറൂം സ്ഥലം ഉറപ്പാക്കിയ ടെസ്‌ല, സ്റ്റോർ മാനേജർമാരും സർവീസ് സ്റ്റാഫും ഉൾപ്പെടെ 25-ലധികം ജീവനക്കാരെ നിയമിച്ചിട്ടുണ്ട്. കമ്പനി, ഇലക്ട്രിക് വാഹനങ്ങളുടെ സർട്ടിഫിക്കേഷനും ഹോമോലോഗേഷനും ആരംഭിച്ച്, അടുത്ത രണ്ടോ മൂന്നോ മാസത്തിനുള്ളിൽ ഇന്ത്യൻ വിപണിയിൽ ആദ്യ കാർ പുറത്തിറക്കാൻ ഒരുങ്ങുകയാണ്.

ഇന്ത്യയുടെ ഇലക്ട്രിക് വാഹന നയം, ലോകത്തിലെ മൂന്നാമത്തെ വലിയ കാർ വിപണിയെ വൈദ്യുത വാഹന നിക്ഷേപത്തിന്റെ കേന്ദ്രമാക്കി മാറ്റാൻ ലക്ഷ്യമിടുന്നു. എന്നാൽ, ടെസ്‌ല നേരിടുന്ന ആഗോള വെല്ലുവിളികൾ 2025-ന്റെ ആദ്യ പാദത്തിൽ 13 ശതമാനം ഡെലിവറി ഇടിവും 71 ശതമാനം അറ്റാദായ കുറവും ഇന്ത്യയിലെ നിർമ്മാണ പദ്ധതികളിൽ കമ്പനിയുടെ താൽപ്പര്യക്കുറവിന് കാരണമായേക്കാമെന്ന് വിദഗ്ധർ ചൂണ്ടിക്കാട്ടുന്നു.

 

 

ഇന്ത്യയിൽ ഇലക്ട്രിക് വാഹന നിർമ്മാണത്തിന് മറ്റ് ആഗോള കമ്പനികൾ താൽപ്പര്യം കാണിക്കുമ്പോൾ, ടെസ്‌ലയുടെ മടി നിരാശാജനകമാണ്, വ്യവസായ വിദഗ്ധർ അഭിപ്രായപ്പെട്ടു. 2026 മാർച്ച് 15 വരെ പദ്ധതിക്കുള്ള അപേക്ഷകൾ തുറന്നുകിടക്കുമെന്നും സർക്കാർ അറിയിച്ചു.