മലപ്പുറം: നിലമ്പൂർ ഉപതിരഞ്ഞെടുപ്പിൽ മത്സരിക്കാനായി തൃണമൂൽ കോൺഗ്രസ് സംസ്ഥാന കൺവീനറും നിലമ്പൂർ മുൻഎംഎൽഎയുമായ പി.വി അൻവർ നൽകിയ ഒരു സെറ്റ് നാമനിർദ്ദേശ പത്രിക തള്ളി. തൃണമൂൽ കോൺഗ്രസ് സ്ഥാനാർഥിയായി നൽകാൻ വേണ്ടി നൽകിയ പത്രികയാണ് തള്ളിയത്. എന്നാൽ സ്വതന്ത്ര സ്ഥാനാർഥിയായി മത്സരിക്കാൻ പി.വി അൻവർ നൽകിയ നാമനിർദ്ദേശ പത്രിക തിരഞ്ഞെടുപ്പ് കമ്മീഷൻ സ്വീകരിച്ചു. ഇതോടെ അൻവറിന് തൃണമൂൽ കോൺഗ്രസ് സ്ഥാനാർത്ഥിയായി മത്സരിക്കാനുള്ള സാധ്യത അടഞ്ഞു എന്നാണ് ലഭ്യമാകുന്ന വിവരം. 

പത്രിക തള്ളിയതിന്റെ കാരണം വ്യക്തമായിട്ടില്ല. പത്രികയിൽ സാങ്കേതിക പിഴവുണ്ടായെന്നാണ് സൂചന. അതേസമയം, തൃണമൂൽ കോൺഗ്രസ് സ്ഥാനാർത്ഥിയായി മത്സരിക്കാമോ എന്നതിൽ വ്യക്തത വരുത്താൻ സംസ്ഥാന തിരഞ്ഞെടുപ്പ് കമ്മീഷണർ കേന്ദ്ര തിരഞ്ഞെടുപ്പ് കമ്മീഷനെ സമീപിച്ചതായും റിപ്പോർട്ട് ഉണ്ട്. തൃണമൂൽ കോൺഗ്രസ് കേരളത്തിലെ രജിസ്റ്റേർഡ് പാർട്ടിയല്ല എന്ന സാങ്കേതിക പ്രശ്നമാണ് പത്രിക തള്ളാൻ കാരണമെന്നാണ് സൂചന. എന്നാൽ ഈ സാങ്കേതികത മറികടക്കാനായാൽ അൻവറിന് തൃണമൂൽ ചിഹ്നത്തിൽ തന്നെ മത്സരിക്കാം. അല്ലെങ്കിൽ അദ്ദേഹത്തിന് സ്വതന്ത്ര സ്ഥാനാർഥിയായി മത്സരിക്കാം.

തൃണമൂൽ കോൺഗ്രസിന് കേരളത്തിൽ രജിസ്‌ട്രേഷൻ ഇല്ലെന്ന കാര്യം ഇന്നലെ തന്നെ ചില പാർട്ടികൾ ഉന്നയിച്ചിരുന്നു. തൃണമൂൽ ലേബലിൽ മത്സരിച്ചില്ലെങ്കിൽ ബംഗാൾ മുഖ്യമന്ത്രിയും തൃണമൂൽ കോൺഗ്രസ് പാർട്ടിയുടെ ചെയർപേഴ്സണുമായി മമത ബാനർജിയെയും മറ്റു നേതാക്കളെയും നിലമ്പൂരിൽ എത്തിക്കാനുള്ള അൻവറിന്റെ ശ്രമങ്ങൾക്ക് കൂടി തിരിച്ചടിയാകും.