കാലിഫോർണിയ: അമേരിക്കയിലെ ലോസ്ആഞ്ചൽസിൽ യു.എസ് പ്രസിഡന്റ് ഡൊണാൾഡ് ട്രംപിന്റെ കുടിയേറ്റ നയത്തിനെതിരേ നാലു ദിവസമായി തുടരുന്ന കലാപത്തിൽ വ്യാപക കൊള്ള.  കലാപം തടയുന്നതിൽ പൊലിസ് പരാജയപ്പെട്ടതിനെ തുടർന്ന് ട്രംപിന്റെ നിർദേശപ്രകാരം 2000 ത്തോളം നാഷനൽ ഗാർഡിനെ കഴിഞ്ഞ ദിവസം വിന്യസിച്ചിരുന്നു. ലോസ്ആഞ്ചൽസിൽ പ്രക്ഷോഭകർ ഹൈപ്പർമാർക്കറ്റുകൾ അടക്കം കൊള്ളയടിച്ചു. ക്രമസമാധാന നില തകർന്നതിനെ തുടർന്ന് ഭക്ഷ്യക്ഷാമം ഭയന്ന് ആളുകൾ തെരുവിലിറങ്ങി ഷോപ്പുകളിൽനിന്ന് ഭക്ഷ്യസാധനങ്ങൾ എടുത്തുകൊണ്ടുപോകുകയായിരുന്നു. ചിലരെ നാഷനൽ ഗാർഡ് കീഴടക്കി. 

കലാപം നിയന്ത്രണ വിധേയമാക്കാൻ കഴിയാത്തതിനെ തുടർന്ന് ഇന്നലെ 700 അംഗ യു.എസ് മറീനുകളെ കൂടി പ്രശ്നബാധിത പ്രദേശത്ത് വിന്യസിച്ചു. ആയിരത്തിലേറെ സൈനികരെയും ലോസ് ആഞ്ചൽസിലേക്ക് അയച്ചിട്ടുണ്ടെന്ന് കാലിഫോർണിയ ഗവർണർ ഗാവിൻ ന്യൂസം പറഞ്ഞു. പ്രക്ഷോഭകർ പൊലിസുകാരെയും സർക്കാർ ജീവനക്കാരെയും സ്ഥാപനങ്ങളെയുമാണ് ആദ്യം ലക്ഷ്യമിട്ടത്. ഇതു തടയാൻ ഗവർണർക്ക് കഴിഞ്ഞില്ലെന്ന് കഴിഞ്ഞ ദിവസം വൈറ്റ്ഹൗസ് കുറ്റപ്പെടുത്തിയിരുന്നു. ഗവർണറുടെ അനുമതിയില്ലാതെയാണ് പ്രസിഡന്റ് ട്രംപ് സൈന്യത്തെ അയക്കുന്നതെന്ന് സംസ്ഥാനവും കുറ്റപ്പെടുത്തി. 

ശനിയാഴ്ച കലാപത്തെ തുടർന്ന് 29 പേരെയും ഞായറാഴ്ച 21 പേരെയും അറസ്റ്റ് ചെയ്തതായി പൊലിസ് അറിയിച്ചു. 600 ലേറെ റബർ ബുള്ളറ്റുകളാണ് പ്രക്ഷോഭകരെ നേരിടാൻ ഉപയോഗിച്ചത്. 

1965ന് ശേഷം സൈന്യം ആദ്യം

ഏതെങ്കിലും പ്രാദേശിക നിയമം നടപ്പിലാക്കാനും അതുമായി ബന്ധപ്പെട്ട പ്രക്ഷോഭം തടയാനും സൈന്യത്തെ ഇറക്കുന്നത് അമേരിക്കയിൽ പതിവുള്ളതല്ല. 1965ന് ശേഷം ഇതാദ്യമായാണ് പ്രസിഡന്റ് സൈന്യത്തെ ലോസ്ആഞ്ചൽസിലേക്ക് അയക്കുന്നത്. 
2005 ൽ കത്രിന ചുഴലിക്കാറ്റുണ്ടായപ്പോഴും 2001 സെപ്റ്റംബർ 11 ലെ ആക്രമണ സമയത്തും മാത്രമാണ് ഇതിനു മുൻപ് യു.എസ് മറീനുകളെ വിന്യസിച്ചത്. ഇവ രണ്ടും വലിയ ദുരന്തങ്ങളായി പ്രഖ്യാപിച്ചിരുന്നു. കാലിഫോർണിയയിലെ ട്വന്റിനൈൻ പാംസിൽ നിന്നുള്ള 7 ത് മറീനുകളും സെക്കന്റ് ബറ്റാലിയനുകളിലും നിന്നുള്ള 700 മറീനുകളെയാണ് വിന്യസിച്ചത്.

In Los Angeles, USA, widespread looting has occurred during the four-day-long unrest against President Donald Trump's immigration policy.