മീററ്റ്: ഉത്തര്‍പ്രദേശിലെ മീററ്റില്‍ ഡ്യൂട്ടിക്കിടയില്‍ ഡോക്ടര്‍മാര്‍ ഉറങ്ങിയത് കാരണം വാഹനാപകടത്തില്‍ പരിക്കേറ്റ് അത്യാഹിത വിഭാഗത്തിലുണ്ടായിരുന്ന രോഗി രക്തം വാര്‍ന്നു മരിച്ചു. ലാലാ ല്ജപത് റായ് മെമ്മോറിയല്‍ മെഡിക്കല്‍ കോളജിലാണ് ഈ അനാസ്ഥ റിപോര്‍ട്ട് ചെയ്തത്. തിങ്കളാഴ്ച വൈകുന്നേരം നടന്ന റോഡപകടത്തില്‍ ഗുരുതരമായി പരിക്കേറ്റ സുനില്‍ എന്ന യുവാവിനെ പൊലിസ് ആണ് ആശുപത്രിയില്‍ എത്തിക്കുന്നത്. 

സുനില്‍ സ്ട്രച്ചറില്‍ രക്തം വാര്‍ന്ന് വേദന കൊണ്ട് കരയുന്ന സമയത്ത് ജൂനിയര്‍ ഡോക്ടര്‍മാരായ ഭൂപേഷ് കുമാര്‍ റായിയും അനികേതും അദ്ദേഹത്തിനു വൈദ്യസഹായം നല്‍കുന്നതിനു പകരം ഡ്യൂട്ടി റൂമില്‍ ഇരുന്ന് ഉറങ്ങുകയായിരുന്നു. കസേരയില്‍ ചാരിയിരുന്ന് മേശപ്പുറത്ത് കാല് കയറ്റിവച്ച് ഇരുന്നുറങ്ങുന്ന ഡോക്ടറുടെ ദൃശ്യങ്ങളും പുറത്തു വന്നു. 

ആശുപത്രിയിലെ അത്യാഹിത വിഭാഗത്തില്‍ പകര്‍ത്തിയതെന്നു പറയപ്പെടുന്ന സംഭവത്തിന്റെ വിഡിയോ സോഷ്യല്‍ മീഡിയയില്‍ വൈറലാണ്. ഈ സമയം കുഞ്ഞുമായെത്തിയ ഒരു യുവതി ഡോക്ടറെ തട്ടിയുണര്‍ത്താന്‍ ശ്രമിക്കുന്നുണ്ടെങ്കിലും ഡോക്ടര്‍ ഉറക്കത്തില്‍ തന്നെയായിരുന്നു. തൊട്ടപ്പുറത്ത് വേദന കൊണ്ട് സുനിലും പുളയുകയാണ്. സംഭവം നടക്കുമ്പോള്‍ ചുമതലയുള്ള ഡോക്ടര്‍ ശശാങ്ക് ജിന്‍ഡാല്‍ ആശുപത്രിയില്‍ ഉണ്ടായിരുന്നുമില്ല. എന്നാല്‍ സംഭവം അറിഞ്ഞയുടനെ താന്‍ ആശുപത്രിയിലെത്തി രോഗിയെ അടിയന്തരചികിത്സയ്ക്കു വിധേയമാക്കി എന്നാണ് ജിന്‍ഡില്‍ പറയുന്നതെന്നാണ് എന്‍ഡിടിവി റിപോര്‍ട്ട് ചെയ്യുന്നത്.

 ചൊവ്വാഴ്ച രാവിലെ 7 മണിയോടെ സുനില്‍ മരിക്കുകയും ചെയ്തു. ചികിത്സ വൈകിയതാണ് മരണകാരണമെന്നാണ് കുടുംബം ആരോപിക്കുന്നത്. എന്നാല്‍ ആശുപത്രിയില്‍ എത്തുമ്പോള്‍ തന്നെ രോഗി ഗുരുതരാവസ്ഥയിലായിരുന്നുവെന്നാണ് ഡോക്ടര്‍ ജിന്‍ഡാല്‍ പറയുന്നത്. സംഭവത്തെ കുറിച്ച് അന്വേഷിക്കാന്‍ മീററ്റ് ജില്ലാ മജിസ്‌ട്രേറ്റിനോട് ഉത്തരവിട്ടിട്ടുണ്ട്. രണ്ടു ഡോക്ടര്‍മാരെയും സസ്‌പെന്‍ഡും ചെയ്തുവെന്നാണ് റിപോര്‍ട്ട്.