റായ്പൂര്‍: ഛത്തീസ്ഗഡില്‍ മനുഷ്യക്കടത്തും നിര്‍ബന്ധിത മതപരിവര്‍ത്തനവും ആരോപിച്ച് അറസ്റ്റ് ചെയ്ത മലയാളി കന്യാസ്ത്രീകളുടെ ജാമ്യാപേക്ഷ ദുര്‍ഗ് സെഷന്‍സ് കോടതി തള്ളി. ഇതോടെ കന്യാസ്ത്രീകള്‍ ദുര്‍ഗിലെ സെന്‍ട്രല്‍ ജയിലില്‍ തന്നെ തുടരും. 

 ഹൈക്കോടതിയെ സമീപിക്കാന്‍ നിര്‍ദ്ദേശിച്ചു കൊണ്ടാണ് ഹരജി തള്ളിയിരിക്കുന്നത്. ഇവര്‍ക്കെതിരെ ചുമത്തിയിരിക്കുന്നത് ഗുരുതരമായ വകുപ്പുകളാണെന്നും അത് പരിഗണിക്കാന്‍അധികാരമില്ലെന്ന് കോടതി ചൂണ്ടിക്കാട്ടിയെന്നാണ് സൂചന. മനുഷ്യക്കടത്തും, നിര്‍ബന്ധിത മത പരിവര്‍ത്തനവും ഉള്‍പ്പെടെ വരുന്ന ഛത്തീസ്ഗഡ് മത സ്വാതന്ത്ര്യ നിയമത്തിലെ നാല്, ഭാരതീയ ന്യായ സംഹിത 143 എന്നീ വകുപ്പുകളാണ് ചുമത്തിയിട്ടുള്ളത്. ഈ വകുപ്പുകള്‍ പ്രകാരം 10 വര്‍ഷം വരെ തടവുശിക്ഷ ലഭിക്കാം.

ALSO READ: കന്യാസ്ത്രീകളുടെ ജാമ്യാപേക്ഷ കോടതി തള്ളി; ദുർ​ഗിലെ സെൻട്രൽ ജയിലിൽ തുടരും

അസീസി സിസ്റ്റേഴ്സ് ഓഫ് മേരി ഇമ്മാക്യുലേറ്റ് (ഗ്രീന്‍ ഗാര്‍ഡന്‍സ്) സന്ന്യാസസഭയിലെ സിസ്റ്റര്‍മാരായ പ്രീതി മേരി, വന്ദന ഫ്രാന്‍സിസ് എന്നിവരുടെ ജാമ്യാപേക്ഷ കഴിഞ്ഞ ദിവസം മജിസ്‌ട്രേറ്റ് കോടതിയും തള്ളിയിരുന്നു. സിസ്റ്റര്‍ പ്രീതി മേരിയാണ് കേസില്‍ ഒന്നാം പ്രതി. സിസ്റ്റര്‍ വന്ദന ഫ്രാന്‍സിസ് രണ്ടാം പ്രതിയുമാണ്. 

കഴിഞ്ഞ വെള്ളിയാഴ്ചയാണ് സിറോ മലബാര്‍ സഭയുടെ കീഴില്‍ ചേര്‍ത്തല ആസ്ഥാനമായ അസീസി സിസ്റ്റേഴ്സ് ഓഫ് മേരി ഇമ്മാക്യുലേറ്റ് (ഗ്രീന്‍ ഗാര്‍ഡന്‍സ്) സന്ന്യാസ സഭയ്ക്ക് കീഴിലെ സ്ഥാപനങ്ങളിലേക്ക് ജോലിക്കായി മൂന്ന് പെണ്‍കുട്ടികളെ കൂട്ടിക്കൊണ്ടുപോകാന്‍ വന്ന കന്യാസ്ത്രീകള്‍ പിടിയിലാകുന്നത്. ഛത്തീസ്ഗഡിലെ ദുര്‍ഗില്‍ വെച്ചാണ്  മലയാളികളായ ഇവരെ അറസ്റ്റ് ചെയ്തത്. ബജ്‌റംഗ്ദള്‍ പ്രവര്‍ത്തകര്‍ ദുര്‍ഗ് റെയില്‍വേ സ്റ്റേഷനില്‍ വെച്ച് ഇവരെ തടഞ്ഞ് പൊലിസിനെ അറിയിക്കുകയായിരുന്നു. കേസില്‍ പെണ്‍കുട്ടികളുടെ ബന്ധു സുഖ്മന്‍ മണ്ടാവിയെ മൂന്നാം പ്രതിയാക്കിയാണ് എഫ്.ഐ.ആര്‍ ഇട്ടിട്ടുള്ളത്.

A Chhattisgarh sessions court rejected the bail plea of Malayali nuns arrested over allegations of human trafficking and forced religious conversion. The court advised them to approach the High Court, citing the serious charges filed against them.