കോഴിക്കോട്: താമരശ്ശേരിയിലെ പത്താം ക്ലാസ് വിദ്യാർഥിയായിരുന്ന ഷഹബാസ് കൊല്ലപ്പെട്ട കേസിൽ കുറ്റാരോപിതരായ വിദ്യാർഥികൾക്ക് കേരള ഹൈക്കോടതി ജാമ്യം അനുവദിച്ചു. കേസിൽ അറസ്റ്റിലായി ജുവനൈൽ ഹോമിൽ കഴിയുന്ന 6 വിദ്യാർഥികൾക്കാണ് കോടതി ജാമ്യം നൽകിയത്. കുറ്റാരോപിതരായ വിദ്യാർഥികളിൽ മിക്കവരും മൂന്ന് മാസത്തോളമായി ജുവനൈൽ ഹോമിൽ കഴിയുന്ന സാഹചര്യത്തിലാണ് ജാമ്യം അനുവദിച്ചത്. കുറ്റാരോപിതർക്ക് ജാമ്യം അനുവദിക്കാതിരിക്കുന്നത് ബാലനീതി നിയമത്തിന്റെ ഉദ്ദേശ്യശുദ്ധിക്ക് എതിരാണെന്ന് വ്യക്തമാക്കിയാണ് ജസ്റ്റിസ് ബെച്ചു കുര്യൻ അധ്യക്ഷനായ സിംഗിൾ ബെഞ്ച് ജാമ്യം അനുവദിച്ചത്.

കേസിലെ കുറ്റാരോപിതരായ വിദ്യാർഥികളിൽ ചിലർ 90 ദിവസത്തിലധികവും ചിലർ 100 ദിവസത്തിലധികവുമായി ജുവനൈൽ ഹോമിൽ കഴിഞ്ഞ് വരികയാണ്. ഇതിനിടെ പ്ലസ് വൺ പ്രവേശനം നേടാൻ ഒരു ദിവസം ഇവർ പൊലിസ് അകമ്പടിയിൽ പ്രവേശനം നേടിയ സ്‌കൂളിൽ എത്തിയിരുന്നു. 3 പേർ താമരശേരി ഗവ. വൊക്കേഷനൽ ഹയർസെക്കൻഡറി സ്കൂളിലും മറ്റുള്ളവർ കോഴിക്കോട് ഉള്ള മറ്റു സ്കൂളുകളിലുമാണ് പ്രവേശനം നേടിയത്.

ALSO READ: ഷഹബാസ് വധക്കേസിലെ കുറ്റാരോപിതരായ അഞ്ച് പേരും പ്ലസ് വൺ പ്രവേശനം നേടി; വൻപ്രതിഷേധവുമായി കെഎസ്‌യു, എംഎസ്എഫ് സംഘടനകൾ

അന്വേഷണവുമായി സഹകരിക്കണം, ക്രമിനൽ പശ്ചാത്തലമുള്ളവരുമായി സഹവസിക്കരുത്, 50,000 രൂപ ബോണ്ട് കെട്ടിവെക്കണം, സാക്ഷികളെ സ്വാധീനിക്കരുത് തുടങ്ങിയ നിർദ്ദേശങ്ങളോടെയാണ് ഇവർക്ക് ഹൈക്കോടതി ജാമ്യം നൽകിയത്. ക്രിമിനൽ പ്രവർത്തനങ്ങളിൽ ഏർപ്പെടരുത്, രക്ഷിതാക്കൾ സത്യവാങ്മൂലം നൽകണം എന്നും വിധിയിൽ നിർദേശം ഉണ്ട്. 

ഈ വർഷം ഫെബ്രുവരി 28നാണ് വിദ്യാർഥികൾ തമ്മിലുണ്ടായ സംഘർഷത്തിൽ പരുക്കേറ്റ് ചികിത്സയിലായിരുന്ന ഷഹബാസ് മരിച്ചത്. തുടർന്ന് അറസ്റ്റിലായ ആറു വിദ്യാർഥികളും കോഴിക്കോട് ജുവനൈൽ ഹോമിലാണ് നിലവിൽ ഉള്ളത്. ജാമ്യം ലഭിച്ചതിന് പിന്നാലെ ഇവർ പുറത്തിറങ്ങും. മാർച്ച് ആദ്യവാരത്തിലാണ് ഇവരെ പൊലിസ് അറസ്റ്റ് ചെയ്തത്.