പത്തനംതിട്ട: അഹമ്മദാബാദിൽ വിമാന ദുരന്തത്തിൽ മരിച്ചവരിൽ മലയാളിയും. പത്തനംതിട്ട തിരുവല്ല പുല്ലാട്ട് സ്വദേശിയായ രഞ്ജിത ആർ നായർ ആണ് മരിച്ചത്.  പത്തനംതിട്ട തിരുവല്ല പുല്ലാട്ട് സ്വദേശിയായ യുവതിയുടെ മരണവിവരം ജില്ലാ കളക്ടർ അറിയിച്ചു. ലണ്ടനിൽ നഴ്സായ രജ്‍ഞിത, നാട്ടിൽ സർക്കാർ ജോലി ലഭിച്ചതിനെ തുടർന്ന് തിരുവല്ലയിലെത്തിയിരുന്നു. എന്നാൽ സർക്കാർ ജോലിയിൽ നിന്ന് അവധിയെടുത്ത ശേഷം  ലണ്ടനിലേക്ക് അവധി കഴിഞ്ഞ് മടങ്ങുന്നതിനിടെയാണ് ദാരുണമായ അപകടം സംഭവിച്ചത്.

തിരുവല്ലയിൽ നിന്ന് ഇന്നലെ രഞ്ജിത ട്രെയിനിൽ ചെന്നൈയിലേക്ക് പോയി. തുടർന്ന് അഹമ്മദാബാദ് വഴി ലണ്ടനിലേക്കുള്ള വിമാനത്തിൽ യാത്ര തിരിച്ചു. എന്നാൽ, അഹമ്മദാബാദിൽ നിന്ന് പുറപ്പെട്ട വിമാനം അപകടത്തിൽപ്പെടുകയായിരുന്നു. വിമാനത്തിന്റെ പാസഞ്ചർ ലിസ്റ്റിൽ രഞ്ജിതയുടെ പേര് ഉണ്ടായിരുന്നതായി വിമാന അധികൃതർ ബന്ധുക്കളെ അറിയിച്ചു. 

ലണ്ടനിലെ ജോലി രാജിവെക്കാനായി മടങ്ങുകയായിരുന്ന രഞ്ജിതയുടെ അപകടവാർത്ത കുടുംബത്തെ ഞെട്ടലിലാഴ്ത്തി. വീട്ടിൽ അമ്മയും പത്തിലും ഏഴിലും പഠിക്കുന്ന രണ്ട് മക്കളുമാണ് ഉള്ളത്. നിർമാണത്തിലിരിക്കുന്ന വീട്ടിൽ താമസിക്കുന്ന കുടുംബം ആശങ്കയിൽ കഴിയുകയാണ്. ബന്ധുക്കളും നാട്ടുകാരും വീട്ടിലെത്തി ആശ്വാസം പകരുന്നുണ്ട്.

അപകടത്തെക്കുറിച്ച് കൂടുതൽ വിവരങ്ങൾ ലഭിക്കാനുണ്ട്. രഞ്ജിതയുടെ മരണവിവരത്തിൽ വ്യക്തത വരുത്താൻ സർക്കാരിന്റെ ഭാ​ഗത്ത് നിന്ന് അടിയന്തരമായി ഇടപെടണമെന്ന് നാട്ടുകാർ ആവശ്യപ്പെട്ടു.