ന്യൂഡല്‍ഹി: ബിഹാര്‍ വോട്ടര്‍പട്ടിക തീവ്ര പരിശോധനയില്‍ തെരഞ്ഞെടുപ്പ് കമ്മീഷന് താക്കീതുമായി സുപ്രിം കോടതി. വോട്ടര്‍മാരെ കൂട്ടത്തോടെ ഒഴിവാക്കിയെങ്കില്‍ ഇടപെടുമെന്നാണ് താക്കീത്. കരട് വോട്ടര്‍ പട്ടിക പ്രസിദ്ധീകരിക്കുന്നത് തടയാന്‍ കഴിഞ്ഞ ദിവസം സുപ്രിംകോടതി വിസമ്മതിച്ചിരുന്നു. എന്നാല്‍ 65 ലക്ഷം വോട്ടര്‍മാര്‍ ഒഴിവാക്കപ്പെടുമെന്ന ആശങ്ക ഹരജിക്കാര്‍ ഉന്നയിച്ചതോടെയാണ് സുപ്രിംകോടതിയുടെ മുന്നറിയിപ്പ് നല്‍കിയത്. 

ഒരു ജുഡീഷ്യല്‍ അതോറിറ്റി എന്ന നിലയില്‍ ഞങ്ങള്‍ പ്രക്രിയ അവലോകനം ചെയ്യുകയാണ്. കൂട്ടത്തോടെ ഒഴിവാക്കല്‍ ഉണ്ടായാല്‍, ഞങ്ങള്‍ ഉടന്‍ ഇടപെടും. ജസ്റ്റിസുമാരായ സുധാന്‍ഷു ധൂലിയ, ജോയ്മല്യ ബാഗ്ചി എന്നിവരുടെ ബെഞ്ചാണ് വ്യക്തമാക്കി. 

കരട് പട്ടികയില്‍ പോരായ്മയുണ്ടെങ്കില്‍ ശ്രദ്ധയില്‍പ്പെടുത്തണമെന്നും സുപ്രിംകോടതി ഹരജിക്കാരോട് ആവശ്യപ്പെട്ടു. മരിച്ചെന്ന പേരില്‍ ജീവിച്ചിരിക്കുന്ന ആരെയെങ്കിലും ഒഴിവാക്കിയോ എന്ന് ബോധ്യപ്പെടുത്തണമെന്നും ജീവിച്ചിരിപ്പുണ്ടെന്ന് പറയുന്ന 15 പേരെ കൊണ്ടുവരികയെന്നും അവര്‍ ആവശ്യപ്പെട്ടു. 

കരട് പട്ടികയിലെ ആക്ഷേപങ്ങളില്‍ സുപ്രിംകോടതി ആഗസ്റ്റ് 12നും 13നും വാദം കേള്‍ക്കും. കോണ്‍ഗ്രസ് അടക്കമുള്ള പ്രതിപക്ഷ പാര്‍ട്ടികളാണ് ബിഹാര്‍ വോട്ടര്‍പട്ടിക പരിശോധനയ്ക്കെതിരെ സുപ്രിംകോടതിയെ സമീപിച്ചത്.

 64 ലക്ഷം പേരെ പുറന്തള്ളി തെരഞ്ഞെടുപ്പ് കമീഷന്‍ കരട് വോട്ടര്‍പട്ടിക ഇറക്കാന്‍ കേവലം മൂന്ന് ദിവസം മാത്രം ബാക്കിനില്‍ക്കെയാണ് സുപ്രിം കോടതി ഹരജികളില്‍ വാദം കേള്‍ക്കാന്‍ ആരംഭിച്ചത്. വോട്ടര്‍മാര്‍ ഇന്ത്യന്‍ പൗരന്മാരാണെന്ന് തെളിയിക്കാനുള്ള രേഖകളുടെ കൂട്ടത്തില്‍ ആധാര്‍, റേഷന്‍ കാര്‍ഡ്, തെരഞ്ഞെടുപ്പ് തിരിച്ചറിയല്‍ കാര്‍ഡുകള്‍കൂടി ഉള്‍പ്പെടുത്താവുന്നതാണെന്ന സുപ്രിംകോടതി നിര്‍ദേശം സ്വീകാര്യമല്ലെന്ന് കമീഷന്‍ വ്യക്തമാക്കിയിരുന്നു. ഈ സാഹചര്യത്തിലാണ് ഹരജികള്‍ പരിഗണിക്കുന്നത്. ബിഹാറിന് പിന്നാലെ കേരളം, ബംഗാള്‍ അടക്കം മുഴുവന്‍ സംസ്ഥാനങ്ങളിലും 'വോട്ടര്‍ പട്ടിക ശുദ്ധീകരണം' നടത്തുമെന്നാണ് തെരഞ്ഞെടുപ്പ് കമ്മീഷന്‍ കഴിഞ്ഞ ദിവസം പ്രഖ്യാപിച്ചത്. അതിനാല്‍ വിഷയത്തില്‍ സുപ്രിംകോടതി വിധി കേരളത്തിനും ഏറെ നിര്‍ണായകമാണ്.

ALSO READ: ബിഹാര്‍ വോട്ടര്‍പട്ടിക തീവ്ര പുനഃപരിശോധന: ഹരജികള്‍ ഇന്ന് സുപ്രിം കോടതിയില്‍, 'വോട്ട് വിധി' കേരളത്തിനും നിര്‍ണായകം

The Supreme Court has cautioned the Election Commission of India over concerns of mass voter deletions during the Bihar electoral roll revision. The warning came after petitioners raised fears that over 6.5 million voters could be excluded.