കോഴിക്കോട്: മലാപ്പറമ്പിൽ ഫ്‌ളാറ്റ് വാടകയ്ക്കെടുത്ത് സ്ത്രീകളെ എത്തിച്ച് അനാശാസ്യകേന്ദ്രം നടത്തിയ പൊലിസുകാരന്റെ പാസ്‌പോർട്ട് കണ്ടെടുത്തു. കേസിലെ പ്രതിയും ഇപ്പോൾ സസ്പെൻഷനിലുള്ളയാളുമായ പൊലിസ് ഡ്രൈവർ കെ. ഷൈജിത്തിന്റെ പാസ്‌പോർട്ടാണ് വീട്ടിൽ നിന്ന് കണ്ടെടുത്തത്. 

കേസിൽ പ്രതിചേർത്തതിനു പിന്നാലെ ഷൈജിത്ത് ഒളിവിലാണ്. ഇയാൾ വിദേശത്തേക്ക് കടക്കാനുള്ള സാധ്യതയുണ്ടെന്ന് ഇന്റലിജൻസ് റിപ്പോർട്ട് സമർപ്പിച്ചിരുന്നു. തുടർന്നാണ് നടക്കാവ് ഇൻസ്പെക്ടർ എൻ. പ്രജീഷിന്റെ നേതൃത്വത്തിൽ അന്വേഷണം നടത്തി പാസ്‌പോർട്ട് കണ്ടെടുത്തത്. അതേസമയം കേസിലെ പ്രതിയായ മറ്റൊരു പൊലിസ് ഡ്രൈവർ കെ. ഷനിത്തിന് പാസ്‌പോർട്ടില്ലെന്നാണ് പ്രാഥമികാന്വേഷണത്തിൽ വ്യക്തമായത്. ഷനിത്തും ഒളിവിലാണുള്ളത്. പ്രതികൾക്കായി പൊലിസ് അന്വേഷണം ഊർജിതമാക്കിയിട്ടുണ്ട്. 

ALSO READ: ഗസ്സയില്‍ വെടിനിര്‍ത്തല്‍ വേണമെന്നാവശ്യപ്പടുന്ന പ്രമേയത്തില്‍നിന്ന് വിട്ടുനിന്ന് ഇന്ത്യ; അങ്ങേയറ്റം ലജ്ജാകരമെന്ന് പ്രിയങ്കാഗാന്ധി | Priyanka Gandhi on Gaza Ceasefire

അനാശാസ്യകേന്ദ്രം നടത്തിപ്പുകാരിൽ ഒരാളും കേസിലെ പ്രതിയുമായ അനിമേഷിനെതിരേ ലുക്കൗട്ട് സർക്കുലർ പുറത്തിറക്കാനുള്ള നടപടികൾ ആരംഭിച്ചു. ഇയാൾ നിലവിൽ വിദേശത്താണുള്ളത്. അതിനാലാണ് ലുക്കൗട്ട് സർക്കുലർ പുറത്തിറക്കുന്നത്. രണ്ടു വർഷത്തിനിടെ പൊലിസുകാരുടെ അക്കൗണ്ടിലേക്ക് അനാശാസ്യ കേന്ദ്രം വഴി 50 ലക്ഷം രൂപയിലേറെ ഇടപാട് നടന്നിട്ടുണ്ടെന്നാണ് പൊലിസ് അന്വേഷണത്തിൽ വ്യക്തമായത്. പ്രതികളുടെ ബാങ്ക് അക്കൗണ്ട് വിവരങ്ങൾ പൊലിസ് പരിശോധിച്ചുവരുകയാണ്.

Malaparamba Sex Trafficking Case Policemans Passport Seized