നാവികസേനയിൽ (ബി.ടെക്) കേഡറ്റ് എൻട്രി സ്കീമിലൂടെ സൗജന്യ ബി.ടെക് പഠനത്തിന് അവസരം. കോഴ്സ് പൂർത്തിയാക്കുന്നവരെ  കമീഷൻഡ് ഓഫിസറായി നിയമനം ലഭിക്കും. ഏഴിമല നാവിക അക്കാദമിയിൽ കോഴ്സുകൾ അടുത്ത വർഷം ജനുവരിയിൽ ആരംഭിക്കും. വിജയകരമായി കോഴ്സ് പൂർത്തിയാക്കുന്നവർക്ക് ജവഹർലാൽ നെഹ്റു യൂനിവേഴ്സിറ്റി ബിരുദം സമ്മാനിക്കും.  ആകെ 44 ഒഴിവുകളാണുള്ളത്. ഇതിൽ ആറെണ്ണത്തിൽ വനിതകളെ പരിഗണിക്കും. യോ​ഗ്യരായവർക്ക് ഓൺലൈനായി ജൂൺ 30 മുതൽ ജൂലൈ 14 വരെ അപേക്ഷിക്കാം.

വിജ്ഞാപനം/ അപേക്ഷ:  www.joinindiannavy.gov.in ൽ. 

ബ്രാഞ്ചുകൾ

അപ്ലൈഡ് ഇലക്ട്രോണിക്സ് ആൻഡ് കമ്യൂണിക്കേഷൻ, മെക്കാനിക്കൽ, ഇലക്ട്രോണിക്സ് ആൻഡ് കമ്യൂണിക്കേഷൻ എൻജിനീയറിങ് ബ്രാഞ്ചുകളിലാണ് പഠനം. 

യോഗ്യത

അവിവാഹിതരായ സ്ത്രീകൾക്കും, പുരുഷൻമാർക്കുമാണ് അവസരം. 

ജെ.ഇ.ഇ മെയിൻ-2025 (ബി.ഇ/ബി.ടെക്) അഖിലേന്ത്യ കോമൺ റാങ്ക്‍ലിസ്റ്റിൽ ഉൾപ്പെട്ടിട്ടുള്ളവരാകണം. 

ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങൾക്ക് മൊത്തം 70 ശതമാനവും ഇംഗ്ലീഷിന് 50 ശതമാനവും മാർക്കിൽ കുറയാതെ ഹയർ സെക്കൻഡറി/പ്ലസ്ടു/തത്തുല്യ ബോർഡ് പരീക്ഷ പാസായിരിക്കണം. 

(ഇംഗ്ലീഷിന് 10ാം ക്ലാസ് പരീക്ഷയിൽ 50 ശതമാനം മാർക്കുണ്ടായാലും മതി). 

മെഡിക്കൽ, ഫിസിക്കൽ ഫിറ്റ്നസുണ്ടായിരിക്കണം. 

പുസ്തകങ്ങളടക്കം മുഴുവൻ പഠന-പരിശീലന ചെലവുകളും നാവികസേന വഹിക്കും. 

ALSO READ: കുവൈത്തില്‍ അധ്യാപകജോലിക്ക് പുതിയ വ്യവസ്ഥകള്‍; എല്ലാ പോസ്റ്റിലേക്കും പ്രവാസികള്‍ക്ക് അപേക്ഷിക്കാനാകില്ല; യോഗ്യതകളും അപേക്ഷിക്കേണ്ട വിധവും അറിയാം | Kuwait Teaching Recruitment Rules 

പ്രായപരിധി

വിദ്യാർഥികൾ 2006 ജൂലൈ രണ്ടിനും 2009 ജനുവരി ഒന്നിനും മധ്യേ ജനിച്ചവരാകണം. 

തെരഞ്ഞെടുപ്പ്

ഇന്റർവ്യൂ മാർക്ക് അടിസ്ഥാനത്തിൽ മെറിറ്റ് ലിസ്റ്റ് തയാറാക്കി വൈദ്യപരിശോധനയും നടത്തിയാണ് കാഡറ്റുകളെ തിരഞ്ഞെടുക്കുന്നത്. ജെ.ഇ.ഇ മെയിൻ റാങ്ക് അടിസ്ഥാനത്തിൽ അപേക്ഷകരെ ഷോർട്ട്‍ലിസ്റ്റ് ചെയ്ത് ബാംഗ്ലൂർ/ഭോപാൽ/കൊൽക്കത്ത/വിശാഖപട്ടണം എന്നിവിടങ്ങളിൽ 2025 സെപ്റ്റംബർ മുതൽ സർവിസസ് സെലക്ഷൻ ബോർഡ്  നടത്തുന്ന അഭിമുഖത്തിന് ക്ഷണിക്കും. കോൾ ലെറ്ററുകൾ ഡൗൺലോഡ് ചെയ്ത് ആവശ്യമായ രേഖകൾ സഹിതം ഇന്റർവ്യൂവിൽ പ​ങ്കെടുക്കേണ്ടതാണ്. 

പഠന-പരിശീലനങ്ങൾ പൂർത്തിയാക്കുന്നവരെ നാവികസേനയിൽ എക്സിക്യൂട്ടിവ്, ടെക്നിക്കൽ ബ്രാഞ്ചിൽ സ്ഥിരം കമീഷൻഡ് ഓഫിസറായി നിയമിക്കും. സേവന-വേതന വ്യവസ്ഥകൾ, ആനുകൂല്യങ്ങൾ അടക്കം കൂടുതൽ വിവരങ്ങൾ വെബ്സൈറ്റിലുണ്ട്.

ALSO READ: രണ്ടുദിവസം കൂടി; എസ്എസ്‌സി കമ്പെെൻഡ് ട്രാൻസ്ലേറ്റർ പരീക്ഷയ്ക്ക് അപേക്ഷിക്കാം; ഡിഗ്രിക്കാർക്ക് അവസരം 

കൂടുതല്‍ Career വാര്‍ത്തകള്‍ക്ക് ഗ്രൂപ്പില്‍ ജോയിന്‍ ചെയ്യുക