തെഹ്‌റാന്‍: ഇസ്‌റാഈല്‍ സൈന്യം 'വധിച്ച' ഇറാന്‍ കമാന്‍ഡര്‍ തെഹ്‌റാനിലെ വിജയാഘോഷത്തില്‍. ആക്രണണത്തില്‍ തങ്ങള്‍ കൊലപ്പെടുത്തിയെന്ന് ഇസ്‌റാഈല്‍ സേന അവകാശപ്പെട്ട  ഇറാന്റെ ഐ.ആര്‍.ജി.സിയുടെ ഖുദ്‌സ് വിഭാഗം കമാന്‍ഡര്‍ ഇസ്മാഈല്‍ ഖാനിയാണ് തെഹ്‌റാനില്‍ യുദ്ധവിജയാഘോഷത്തില്‍ പ്രത്യക്ഷപ്പെട്ടത്. തെഹ്‌റാനിലെ വിജയാഘോഷത്തില്‍ ഖാനി പങ്കെടുക്കുന്ന ദൃശ്യങ്ങള്‍ ഇറാനിലെ മെഹര്‍ വാര്‍ത്ത ഏജന്‍സിയാണ് പുറത്തുവിട്ടത്.

'ഓപറേഷന്‍ റൈസിങ് ലയണ്‍' എന്ന പേരില്‍ ഇസ്‌റാഈല്‍ ജൂണ്‍ 13ന് ആരംഭിച്ച യുദ്ധത്തിന്റെ ആദ്യഘട്ടത്തില്‍ തന്നെ  ഖുദ്‌സ് സേനയുടെ തലവനായ ഇസ്മാഈല്‍ ഖാനിയെ വധിച്ചെന്ന് സൈന്യം അവകാശപ്പെട്ടിരുന്നു.  എന്നാല്‍, പിന്നീട് ഇതുസംബന്ധിച്ച് സ്ഥിരീകരണമൊന്നും ഇസ്‌റാഈലിന്റെ ഭാഗത്തു നിന്ന് ഉണ്ടായിരുന്നില്ല. 

ജൂണ്‍ 13ന് നടത്തിയ വ്യോമാക്രമണത്തില്‍ ഖാനി കൊല്ലപ്പെട്ടതെന്ന് ഇറാനിയന്‍ വൃത്തങ്ങളെ ഉദ്ധരിച്ച് ന്യൂയോര്‍ക് ടൈംസ് റിപ്പോര്‍ട്ട് ചെയ്തിരുന്നു. എന്നാല്‍, ഖാനിയുടെ 'മരണം' സംബന്ധിച്ച് ഇറാന്‍ ഇസ്‌റാഈലിനെ കബളിപ്പിക്കുകയായിരുന്നെന്നാണ് ഇപ്പോള്‍ പുറത്തു വരുന്ന റിപ്പോര്‍ട്ടുകള്‍.

#BREAKING
General Qaani, Commander of the IRGC Quds Force, at the victory celebration over the Zionists in Tehran pic.twitter.com/M0TxJ6Qtc9

— Tehran Times (@TehranTimes79) June 24, 2025

ഇതാദ്യമായല്ല ഇസ്മാഈല്‍ ഖാനി ഇസ്‌റാഈല്‍ ആക്രമണത്തില്‍ കൊല്ലപ്പെട്ടതായി റിപ്പോര്‍ട്ടുകള്‍ വരുന്നത്. 2024 ഒക്ടോബറില്‍ ബൈറൂത്തിലുണ്ടായ ആക്രമണത്തില്‍ ഖാനി കൊല്ലപ്പെട്ടതായി വ്യാപകമായി പ്രചരിച്ചിരുന്നു. ഹിസ്ബുല്ല നേതാവ് ഹസന്‍ നസ്‌റുല്ലയെ ഇസ്‌റാഈല്‍ വധിച്ച സംഘര്‍ഷ സാഹചര്യത്തിലായിരുന്നു ഇത്. ഏറെക്കാലത്തിന് ശേഷം ഖാനി വീണ്ടും പൊതുമധ്യത്തിലെത്തുകയായിരുന്നു.

ഇറാനിലെ ശക്തനായ സൈനിക മേധാവിയാണ് ഖാനി. 2020 ജനുവരി മൂന്നിന് ഇറാന്റെ ഉന്നത സൈനിക കമാന്‍ഡര്‍ ജനറല്‍ ഖാസിം സുലൈമാനി ബഗ്ദാദില്‍ യു.എസ് ഡ്രോണാക്രമണത്തില്‍ കൊല്ലപ്പെട്ടതിനെ തുടര്‍ന്നാണ് ജനറല്‍ ഇസ്മായില്‍ ഖാനി ചുമതലയേറ്റത്.

ALSO READ: 'നമ്മുടെ ശക്തി ലോകം നോക്കിക്കണ്ടു, ശത്രുക്കള്‍ കരാര്‍ ലംഘനങ്ങള്‍ നടത്തിയതും; ഈ വിജയം രാജ്യത്തെ ജനതക്കുള്ളതാണ്' ഇറാന്‍ പ്രസിഡന്റിന്റെ സന്ദേശം

പലപ്പോഴും മാധ്യമങ്ങളില്‍ അധികം പ്രത്യക്ഷപ്പെടാത്ത വ്യക്തിത്വമാണ് അദ്ദേഹം. എന്നാല്‍ തന്റെ മുന്‍ഗാമിയോ പോലെ തന്നെ തൊഴിലില്‍ വിട്ടുവീഴ്ചയില്ലാത്ത കാര്‍ക്കശ്യക്കാരനായിരുന്നു അദ്ദേഹം. ഷായുടെ അട്ടിമറിക്ക് ശേഷമുള്ള പ്രക്ഷോഭങ്ങളെ അടിച്ചമര്‍ത്തുന്നതില്‍ ഖാനി ഒരു പ്രധാന പങ്ക് വഹിച്ചിരുന്നു. ഇറാന്‍-ഇറാഖ് യുദ്ധത്തില്‍ പങ്കെടുക്കുകയും ചെയ്തിരുന്നു. 1988-ല്‍, മഷാദ് ആസ്ഥാനമായുള്ള റെവല്യൂഷണറി ഗാര്‍ഡ്സ് ഗ്രൗണ്ട് ഫോഴ്സിന്റെ എട്ടാമത്തെ ഓപ്പറേഷണല്‍ സോണിന്റെ ഡെപ്യൂട്ടി കമാന്‍ഡറായി അദ്ദേഹത്തെ നിയമിച്ചിരുന്നു.

അതേസമയം, ഇസ്‌റാഈലും ഇറാനും വെടിനിര്‍ത്തല്‍ ധാരണയിലെത്തിയതോടെ പശ്ചിമേഷ്യയില്‍ 12 ദിവസമായി തുടര്‍ന്നുവന്ന യുദ്ധത്തിന് അവസാനമായിരിക്കുകയാണ്. 

IRGC Quds Force chief Esmail Qaani, whom Israel claimed to have killed in a June 13 airstrike, appeared at Tehran’s victory rally. Iranian media released footage debunking earlier reports of his death during Operation Rising Lion.