വെടിനിര്‍ത്തല്‍ നടപ്പിലായതിന് പിന്നാലെ ഇറാന്‍ ജനതക്ക് പ്രസിഡന്റിന്റെ സന്ദേശം. ഇസ്‌റാഈലിന്റേയും കൂട്ടാളി അമേരിക്കയുടേയും പരാജയമെന്ന് ലോകം വിലയിരുത്തിയ ഈ വിജയത്തിന്റെ മുഴുവന്‍ ക്രഡിറ്റും ഇറാന്‍ ജനതക്കുള്ളതാണെന്ന് അദ്ദേഹം സന്ദേശത്തില്‍ വ്യക്തമാക്കുന്നു. ഈ യുദ്ധത്തിലൂടെ ഇറാന്റെ ശക്തിയും ശത്രുക്കളുടെ ചതിയും ലോകം മനസ്സിലാക്കിയെന്നും അദ്ദേഹം വ്യക്തമാക്കി.

' ഈ ചരിത്ര വിജയം അഭിമാനപൂര്‍വ്വം മഹത്തായ സംസ്‌ക്കാരത്തിന്റെ ഉടമകളായ ഇറാന്‍ ജനതക്ക് അവകാശപ്പെട്ടതാണ്. 
നമ്മുടെ മഹാന്മാരും ചരിത്രം സൃഷ്ടിച്ചവരുമായ ജനങ്ങളുടെ ധീരമായ ചെറുത്തുനില്‍പ്പിന് ശേഷം ഇന്ന് നാം വെടിനിര്‍ത്തലിനും 12 ദിവസത്തെ യുദ്ധത്തിന്റെ അവസാനത്തിനും സാക്ഷ്യം വഹിക്കുകയാണ്. സയണിസ്റ്റ് രാജ്യം ഇറാന്‍ ജനതക്കുമേല്‍ അടിച്ചേല്‍പിച്ചതായിരുന്നു ഈ യുദ്ധം. ജനതയുടെ പൂര്‍ണ പിന്തുണയോടെയുള്ള ഇറാന്റെ ശക്തിക്ക് ലോകം സാക്ഷ്യം വഹിക്കുകയായിരുന്നു പിന്നീട്.

ALSO READ: മുമ്പ് ഗസ്സയില്‍, ഇപ്പോള്‍ ഇറാനിലും പരാജയം; ഒരുലക്ഷ്യവും നേടിയെടുക്കാനാകാതെ ഇസ്‌റാഈല്‍  

ഈ യുദ്ധത്തിന് തുടക്കമിട്ടത് ഭീകരനായ ശത്രുവായിരുന്നു. എന്നാല്‍ ഇറാന്‍ ജനതയുടെ ആത്മവിശ്വാസവും കരുത്തും അതിന് അന്ത്യം കുറിച്ചു. 

ദുര്‍ബലവും ആവര്‍ത്തിച്ചുള്ളതുമായ ഒഴികഴിവുകള്‍ ഉപയോഗിച്ചായിരുന്നു ഭീകരാക്രമണത്തിന്റെ തുടക്കം. പൊതുജനാഭിപ്രായത്തിലെ ഏതെങ്കിലും തെറ്റിദ്ധാരണ ഇല്ലാതാക്കാന്‍ ഇറാന്‍ നടത്തിയ നയതന്ത്ര ശ്രമങ്ങളള്‍ക്ക് സമാനമായി ഇത് സംഭവിച്ചു. നയനന്ത്ര ചര്‍ച്ചകളില്‍ ഇറാന്‍ സന്നിഹിതനായിരുന്നു. ഇറാന്‍ ഉറച്ച നിലപാടും സ്ഥിരമായ തീരുമാനങ്ങളും സ്വീകരിക്കുന്നത് ലോകം കണ്ടു.
ഇറാന്റെ ശത്രുക്കള്‍ ഉടമ്പടികളും ചട്ടങ്ങളും ലംഘിച്ചത് ചരിത്രം മറക്കില്ല, അവര്‍ ചര്‍ച്ചകള്‍ക്കിടെ ആക്രമണവും അധിനിവേശവും നടത്തി.

ശക്തിയും ബലഹീനതയും തിരിച്ചറിഞ്ഞ് പുനര്‍നിര്‍മ്മാണത്തിലും ഇരകള്‍ക്ക് നഷ്ടപരിഹാരം നല്‍കുന്നതിലും ഞങ്ങള്‍ ശ്രദ്ധ കേന്ദ്രീകരിക്കും. വിജയിച്ച ഈ  പരീക്ഷണത്തില്‍, ഇനി രാജ്യത്തുടനീളം കാര്യങ്ങള്‍ സാധാരണ നിലയിലാക്കുന്ന പ്രക്രിയ ഞങ്ങള്‍ തുടരും. അയല്‍രാജ്യങ്ങളോടും പ്രാദേശിക രാജ്യങ്ങളോടും ഞങ്ങള്‍ സഹവര്‍ത്തിത്വത്തിലും സ്ഥിരതയിലും ഉറച്ചു വിശ്വസിക്കുന്നുവെന്ന് ഞാന്‍ പ്രഖ്യാപിക്കുന്നു'. ടെലഗ്രാം വഴി പുറത്തു വന്ന സന്ദേശത്തില്‍ ഇറാന്‍ പ്രസിഡന്റ് വ്യക്തമാക്കി. 

ഇസ്‌റാഈലും ഇറാനും തമ്മിലുള്ള വെടിനിര്‍ത്തല്‍ പ്രാബല്യത്തില്‍ വന്നതായി യു.എസ് പ്രസിഡന്റ് ഡൊണാള്‍ഡ് ട്രംപ് ആണ് പ്രഖ്യാപിച്ചത്.
വെടിനിര്‍ത്തല്‍ റഷ്യ സ്വാഗതം ചെയ്തു. വെടിനിര്‍ത്തല്‍ തുടരണമെന്ന് ബ്രിട്ടിഷ് പ്രധാനമന്ത്രി കെയ്ര് സ്റ്റാര്‍മര്‍ പറഞ്ഞു. ഇസ്‌റാഈലില്‍നിന്ന് ബ്രിട്ടന്‍ പൗരന്മാരെ ഒഴിപ്പിച്ചു.

ഇസ്‌റാഈലില്‍ വെടിനിര്‍ത്തല്‍ കരാര്‍ ലംഘിക്കുന്നതു വരെ തങ്ങളും കരാര്‍ ലംഘിക്കില്ലെന്ന് ഇറാന്‍ പ്രസിഡന്റ് മസൂദ് പെസെഷ്‌കിയാന്‍ മലേഷ്യന്‍ പ്രധാനമന്ത്രി അന്‍വര്‍ ഇബ്രാഹിമിനോട് ഫോണില്‍ അറിയിച്ചു. യു.എസ് പ്രസിഡന്റ് പ്രഖ്യാപിച്ച വെടിനിര്‍ത്തലിനെ തങ്ങള്‍ ബഹുമാനിക്കുന്നുവെന്ന് ഇര്‍ന വാര്‍ത്താ ഏജന്‍സി റിപ്പോര്‍ട്ട് ചെയ്തു. യു.എസ് പ്രസിഡന്റ് ഡൊണാള്‍ഡ് ട്രംപും ഇസ്‌റാഈല്‍ പ്രധാനമന്ത്രി ബെന്യാമിന്‍ നെതന്യാഹുവും വെടിനിര്‍ത്തലിനു ശേഷം ഫോണില്‍ സംസാരിച്ചു. പ്രശ്‌നത്തിന്റെ ഗൗരവം നെതന്യാഹുവിനെ പറഞ്ഞു മനസിലാക്കിയെന്നും ട്രംപിന്റെ ആശങ്ക അറിയിച്ചെന്നും സി.എന്‍.എന്‍ റിപ്പോര്‍ട്ട് ചെയ്തു.

ALSO READ: ട്രംപിന്റെ അവകാശവാദങ്ങള്‍ പൊളിഞ്ഞു, ഇറാന്റെ ആണവ കേന്ദ്രങ്ങള്‍ നശിപ്പിക്കാന്‍ യു.എസിന് കഴിഞ്ഞിട്ടില്ലെന്ന് പെന്റഗണ്‍ റിപ്പോര്‍ട്ട്

വെടിനിര്‍ത്തലിനു പിന്നാലെ ഇറാനില്‍ വിജയാഹ്ലാദ പ്രകടനം നടന്നു. പ്രാദേശിക സമയം വൈകിട്ട് 6 ന് ഇങ്കിലാബ് ചത്വരത്തില്‍ വിക്ടറി പരേഡ് എന്ന പേരിലാണ് വിജയാഹ്ലാദ പ്രകടനം നടന്നത്. ഇറാനില്‍ പുതിയ യുഗത്തിന് തുടക്കമെന്ന് ഇറാന്‍ സൈനിക മേധാവി പറഞ്ഞു.
ഇറാന്റെ ശക്തി എന്താണെന്ന് കാണിക്കുന്നതാണ് വെടിനിര്‍ത്തല്‍ പ്രഖ്യാപനമെന്ന് വൈസ് പ്രസിഡന്റ് മുഹമ്മദ് റസ അരീഫ് പറഞ്ഞു. ഈ വിജയം പാശ്ചാത്യശക്തികളുടെ കൊമ്പു തകര്‍ത്തുവെന്നും തങ്ങളുടെ ശക്തി ലോകത്തിന് കാണിച്ചു നല്‍കാന്‍ കഴിഞ്ഞെന്നും അദ്ദേഹം പറഞ്ഞു. വെടിനിര്‍ത്തലിനെ കുറിച്ച് ഇസ്‌റാഈല്‍ പ്രധാനമന്ത്രി ബെന്യാമിന്‍ നെതന്യാഹു മൗനം പാലിച്ചു. 

Following the ceasefire, Iran’s President addressed the nation, calling it a global recognition of Iran’s victory over Israel and the U.S. He praised the Iranian people and highlighted the country's strength and its enemies’ deceit.