ആനയും ആനക്കുട്ടികളും നമുക്കെന്നും കൗതുകവും അദ്ഭുതവുമാണ്. പ്രത്യേകിച്ചും ആനക്കുട്ടികളെ കാണുമ്പോള്‍. വളരെ ക്യൂട്ടാണ് ആനക്കുട്ടികള്‍. അതുകൊണ്ട് തന്നെ ആനക്കുട്ടികളുടെ വിഡിയോയ്ക്ക് ആരാധകരും കൂടുതലാണ്. അതുപോലെ രസകരമായ ഒരു വിഡിയോയാണ് സോഷ്യല്‍ മീഡിയയില്‍ വൈറലായിക്കൊണ്ടിരിക്കുന്നത്. മനോഹരമായ ഒരു കാഴ്ചയാണിത്. 

റിട്ടയേര്‍ഡ് ഫോറസ്റ്റ് സര്‍വിസ് ഓഫിസര്‍ സുശാന്ത നന്ദയാണ് വിഡിയോ എക്‌സില്‍ (ട്വിറ്റര്‍) ഷെയര്‍ ചെയ്തിരിക്കുന്നത്. മരങ്ങളാല്‍ തണല്‍ വിരിച്ച തിരക്കുള്ള ഒരു റോഡാണ് വിഡിയോയില്‍ കാണുന്നത്. അതിലൂടെ ഒരുകൂട്ടം ആനകളെ കൊണ്ടുപോകുന്നതും കാണാം. ആനപ്പുറത്ത് പാപ്പാന്മാരും ഇരിപ്പുണ്ട്. എന്നാല്‍, അക്കൂട്ടത്തില്‍ ഒരു കുട്ടിയാനയും ഉണ്ട്.

ഇവന്റെ കുസൃതിയാണ് ആളുകളെ ചിരിപ്പിച്ചത്. ഒരു വലിയ റോഡിന്റെ സൈഡിലൂടെയാണ് ആനകള്‍ നടക്കുന്നത്. ഇതിന്റെ തൊട്ടടുത്ത റോഡില്‍ മറുഭാഗത്തായി ഒരു ഉന്തുവണ്ടിയില്‍ കൊണ്ടു നടന്ന് രണ്ടു പേര്‍ പഴങ്ങള്‍ വില്‍ക്കുന്നുണ്ട്. ഏറ്റവും പിന്നിലാണ് കുട്ടിയാന നടക്കുന്നത്. ഉന്തുവണ്ടിക്കടുത്ത് എത്തിയതും ആനക്കുട്ടി കൂട്ടത്തില്‍ നിന്നും മാറി നേരെ അങ്ങോട്ടേക്ക്് ഓടി. മാത്രമല്ല, പഴം എടുക്കാനായി അവന്‍ ശ്രമം നടത്തുന്നതും വിഡിയോയില്‍ കാണാം.

A quick snacks break for Chotu. Cute💕 pic.twitter.com/euuOjJkzN8

— Susanta Nanda IFS (Retd) (@susantananda3) June 23, 2025

പഴങ്ങള്‍ വില്‍ക്കുന്നവരാകട്ടെ, ആദ്യം ഒന്നമ്പരന്നു മാറിനിന്നെങ്കിലും കുട്ടിയാനക്ക് പഴം വേണമെന്ന് മനസിലാക്കി അവന് പഴമെടുത്തു കൊടുക്കുന്നതും കാണാം. ശേഷം അവന്‍ വേഗത്തില്‍ ഓടി ആനക്കൂട്ടത്തിന്റെ ഒപ്പം എത്താന്‍ ശ്രമിക്കുന്നതാണ് കാണുന്നത്. നിരവധിപേരാണ് ഈ ക്യൂട്ട് വിഡിയോയ്ക്ക് കമന്റുകളിട്ടിരിക്കുന്നത്. രസകരമായ കമന്റുകളും ഇട്ടിട്ടുണ്ട്. ആരാണ് ഇതിന്റെ പൈസ കൊടുക്കുക എന്നാണ് ഒരാള്‍ കമന്റ് നല്‍കിയത്.

എല്ലാ കുട്ടിയാനകള്‍ക്കും ഏത് ഭക്ഷണവും എപ്പോഴും എവിടെയാണെങ്കിലും കിട്ടണം. അത് നിയമമാണ്. ഇനി അഥവാ അങ്ങനെയല്ലെങ്കില്‍, അത് അങ്ങനെ ആവണമെന്നും ഇനി മുതല്‍ അത് മാറ്റാനാവാത്ത നിയമമായി പ്രഖ്യാപിക്കപ്പെടുന്നു എന്നുമാണ് ഒരാള്‍ നല്‍കിയ കമന്റ്. വിഡിയോ കണ്ടവരൊക്കെ എത്ര മനോഹരമായ വിഡിയോ എന്നാണ് അഭിപ്രായപ്പെടുന്നത്.